جاقىندا قاراعاندى وبلىسىنىڭ جاڭاارقا اۋدانىندا براكونەرلىككە قاتىستى قىلمىستىق ءىس تىركەلدى. وسى ءوڭىردىڭ تابيعاتتى قورعاۋ پوليتسيا قىزمەتكەرلەرى «قىزىل كىتاپقا» ەنگەن جانۋارلاردىڭ ءمۇيىزىن ساتۋمەن اينالىسىپ كەلگەن توپتى اشكەرەلەگەن.
جەدەل الدىن الۋ وپەراتسياسى كەزىندە ءتارتىپ ساقشىلارى 29 جاستاعى جۇرگىزۋشىنىڭ رەسەيدە ەسەپتە تۇرعان ۆاز 2114 اۆتوكولىگىن توقتاتىپ, تەكسەرۋ جۇرگىزەدى. كولىكتى ءتىنتۋ كەزىندە ىشىنەن 844 كيىكتىڭ ءمۇيىزى تابىلعان. بۇل دەگەنىڭىز براكونەرلەر اقشا ءۇشىن 422 ءتۇز تاعىسىن قىرىپ تاستاعان دەگەن ءسوز.
قازىرگى تاڭدا كۇدىكتى ۋاقىتشا ۇستاۋ يزولياتورىنا قامالىپ, ونىڭ ەكى سەرىگىنىڭ ۇستىنەن دە قىلمىستىق ءىس قوزعالدى. ال مۇيىزدەر ارنايى ساراپتاماعا جىبەرىلگەن.
قىلمىستىق كودەكستىڭ 339-بابى 1-تارماعىنا سايكەس بۇل قىلمىس ءۇشىن ايىپتىنىڭ بۇكىل مۇلكى تاركىلەنىپ, ءوزى ءۇش جىلدان بەس جىلعا دەيىن باس بوستاندىعىنان ايىرىلۋى مۇمكىن.
ەستەرىڭىزگە سالا كەتەيىك, قاراعاندىلىق پوليتسيا قىزمەتكەرلەرى وتكەن جىلى وسى جاڭاارقا اۋدانىندا كيىك مۇيىزدەرىن ساتۋمەن اينالىسىپ كەلگەن توپتى ۇستاپ, ولاردان 274 ءمۇيىزدى تاركىلەنگەن. سوت شەشىمىمەن ولاردىڭ ءبىرى 4,5 جىلعا, ۇشەۋى 3,5 جىلعا شارتتى تۇردە باس بوستاندىعىنان ايىرىلعان ەدى.
ىشكى ىستەر مينيسترلىگى اكىمشىلىك پوليتسيا كوميتەتى تابيعاتتى قورعاۋ پوليتسيا توبىنىڭ ينسپەكتورى, پوليتسيا كاپيتانى الىشەر جارماعامبەتوۆتىڭ مالىمدەۋىنشە, جىل باستالعالى بەرى ەلىمىزدە تابيعاتتى قورعاۋ زاڭناماسىن بۇزۋعا قاتىستى 80-نەن استام قىلمىس تىركەلگەن ەكەن. ونىڭ ىشىندە زاڭسىز اڭ اۋلاۋ جانە سيرەك كەزدەسەتىن جانۋارلاردىڭ ءمۇيىزىن ساتۋ فاكتىلەرى كوپ.
«ەكى ايدىڭ ىشىندە قىلمىستىق كودەكستىڭ 335-بابى – بالىق رەسۋرستارىن, باسقا دا سۋ جانۋارلارىن نەمەسە وسiمدiكتەرىن زاڭسىز الۋ بويىنشا 19 قىلمىس انىقتالسا, زاڭسىز اڭشىلىق فاكتىسى 26-عا جەتكەن. ال «وسiمدiكتەردىڭ نەمەسە جانۋارلاردىڭ سيرەك كەزدەسەتiن جانە قۇرىپ كەتۋ قاۋپi تونگەن, سونداي-اق پايدالانۋعا تىيىم سالىنعان تۇرلەرىمەن, ولاردىڭ بولىكتەرىمەن نەمەسە دەريۆاتتارىمەن زاڭسىز اينالىسۋ» دەپ اتالاتىن 339-باپپەن 20 دەرەك تىركەلىپ وتىر. وكىنىشكە قاراي, ەلىمىزدە قارا باقىر ءۇشىن كيەلى اڭدارعا قاستاندىق جاسايتىندار ازايماي تۇر. وسىعان وراي ىشكى ىستەر ورگاندارى براكونەرلىككە جول بەرمەۋ, مۇنداي زاڭسىزدىقتاردىڭ الدىن الۋ ماقساتىندا ۇدايى جەدەل ءىس-شارالاردى جۇزەگە اسىرىپ كەلەدى», دەيدى پوليتسيا كاپيتانى.
جالپى, زاڭسىز اينالىمنان 5,8 توننادان استام بالىق, ونىڭ ىشىندە بەكىرە تۇقىمدى بالىقتىڭ 320 كيلوسى, 350,4 تەكشە مەتر زاڭسىز دايىندالعان ورمان اعاشى, 14 سۋ كولىگى, 274 قۇقىق بۇزۋشىلىق قۇرالى, ونىڭ ىشىندە 114 وتاتقىش اڭشىلىق قارۋ تاركىلەندى. ال تابيعاتقا كەلتىرىلگەن شىعىن كولەمى 2,5 ملرد تەڭگەگە جەتكەن. تەرگەۋ بارىسىندا ونىڭ تەك 13,1 ميلليون تەڭگەسى ءوندىرىلدى.