شىمكەنتتەگى كەڭەس وداعىنىڭ باتىرى سابىر راحيموۆ اتىنداعى رەسپۋبليكالىق «جاس ۇلان» مەكتەبىنىڭ ساپتىق الاڭىندا جاس پاتريوتتاردىڭ ءبىرىنشى قىسقى سپارتاكياداسىنىڭ جەڭىمپازدارى ماراپاتتالدى, دەپ حابارلايدى Egemen.kz.
مەكتەپ باسشىسى, پولكوۆنيك عازيز تولەۋشەۆ قۇتتىقتاۋ سوزىندە جاسوسپىرىمدەردىڭ دەنە شىنىقتىرۋ باعىتىنداعى دايىندىعىنىڭ ماڭىزدىلىعىن اتاپ ءوتتى.
«سپورتپەن شۇعىلدانۋدىڭ قارۋلى كۇشتەر قاتارىنداعىلاردىڭ بولاشاق قىزمەتىنە تيگىزەر پايداسى كوپ. جەڭىسكە جەتۋ جولىندا بىرقاتار قيىن سىناقتاردان ءوتىپ, كوپتەگەن داعدىلاردى كورسەتۋ كەرەك بولادى. ءبىزدىڭ ۇلاندار سول سىناقتى كەرەمەت ورىندادى», دەدى مەكتەپ باسشىسى.
اسكەري مەكتەپتىڭ تاربيەلەنۋشىسى اسىلانبەك ەرنۇر وسىناۋ جارىسقا قاتىسىپ, ۇزدىك ناتيجە كورسەتتى.
«مەن جارىستىڭ بارلىق كەزەڭىنە قاتىستىم. سىناقتان ءساتتى وتۋگە سپورتقا دەگەن ماحابباتىم كومەكتەستى. مەكتەپتە ساباقتان بوس ۋاقىتتا جەڭىل اتلەتيكامەن اينالىسامىن, فۋتبول مەن ۆولەيبول وينايمىن. مەكتەپتى بىتىرگەننەن كەيىن اسكەري ينستيتۋتقا ءتۇسىپ ارميادا قىزمەتىمدى جالعاستىرامىن», دەپ بولاشاق جوسپارىمەن ءبولىستى اسىلانبەك ەرنۇر.
قارۋلى كۇشتەردىڭ 30 جىلدىعىنا ارنالعان جارىسقا ەلىمىزدىڭ بارلىق وڭىرلەرىنەن «جاس سارباز» اسكەري پاتريوتتىق قوزعالىسىنىڭ جانە «جاس ۇلان» رەسپۋبليكالىق مەكتەپتەرىنىڭ 80 تاربيەلەنۋشىسى قاتىستى. وقۋ ورىندارى اراسىنداعى كوماندالىق سايىستا شىمكەنت قالاسىنىڭ ۇلاندارى ۇزدىك اتاندى.
جارىس شوقان ءۋاليحانوۆ اتىنداعى اسكەري كوللەدج جانە قورعانىس مينيسترلىگى ورتالىق سپورت كلۋبىنىڭ وقۋ-جاتتىعۋ ورتالىعىندا وتكىزىلدى. ءتورت كۇن بويى جاسوسپىرىمدەر پنەۆماتيكالىق ۆينتوۆكادان اتۋ, بەلتەمىرگە تارتىلۋ, شاڭعى جارىسى جانە اسكەريلەندىرىلگەن ەستافەتادان سايىسقا ءتۇستى.