شىعىس قازاقستان وبلىسىندا قار كوشكىنى ءجۇرۋ قاۋپىنە وراي تاسجولداردىڭ ءبىرى جابىلدى, دەپ حابارلايدى Egemen.kz.
شقو توتەنشە جاعدايلار دەپارتامەنتى ءباسپاسوز قىزمەتىنىڭ مالىمەتىنە سۇيەنسەك, وڭىردەگى تاسجولداردىڭ ءبىرىن قار كوشكىنى باسىپ قالۋى مۇمكىن.
«رەسپۋبليكالىق ماڭىزى بار «وسكەمەن-التاي-ۇلكەن نارىن-كاتونقاراعاي-راحمان قاينارى» تاسجولىنىڭ 420-450 شاقىرىمىندا (بەرەل اۋىلىنان راحمان قاينارى ساناتوريىنە دەيىنگى ارالىق) كولىكتىڭ بارلىق تۇرلەرى ءۇشىن قوزعالىسقا تىيىم سالىنادى», دەلىنگەن اقپاراتتا.
وسى رەتتە, قۇتقارۋشىلار ءوڭىر جۇرتشىلىعىنا الىس ساپارعا شىعار الدىندا جولداردىڭ جاي-كۇيىن «دارمەن» ءموبيلدى قوسىمشاسى ارقىلى تەكسەرىپ وتىرۋعا كەڭەس بەردى.