جەر توڭى ءجىبىپ, العاشقى كوك دۇركىرەپ شىعا باستاعان كەزدە شىبىق قاداپ, تال وتىرعىزۋ – ساۋاپتى ءىس. ويتكەنى, جەرگە شانشىلعان ءاربىر تال كۇتىمى جاقسى بولسا, كۇنى ەرتەڭ جاپىراعى داراققا اينالىپ, جازدا سايا, قىستا قامساۋ بولادى. ءارى ەكولوگيالىق احۋالدى جاقسارتىپ, قوڭىرجاي كليمات قالىپتاستىرۋعا اسەرىن تيگىزەدى. بۇل باعىتتا ەلىمىزدىڭ مادەنيەت جانە سپورت مينيسترلىگى كوگالداندىرۋ جۇمىسىنا بۇكىل ەل بولىپ جۇمىلۋدى ۇسىنىپ وتىر, دەپ حابارلايدى Egemen.kz.
«ناۋرىز – تازالىق پەن ەكولوگياعا قامقورلىق مەرەكەسى. بۇل الەۋەتتى اۋقىمدى ەكولوگيالىق اكتسيالاردى وسكەلەڭ ۇرپاقتى ەكولوگيالىق تاربيەلەۋ ءۇشىن پايدالانۋ قاجەت. وسى كۇنى بۇكىل ەل بويىنشا جاپپاي اعاش وتىرعىزۋ جانە ەلدى مەكەندەر مەن اۋلالاردىڭ اۋماقتارىن تازارتۋ بويىنشا «تازا تابيعات» رەسپۋبليكالىق اكتسياسى باستالادى», دەدى قر مادەنيەت جانە سپورت ۆيتسە-ءمينيسترى نۇرعيسا داۋەشوۆ ورتالىق كوممۋنيكاتسيالار قىزمەتىندە وتكەن ءباسپاسوز ءماسليحاتىندا.
ونىڭ ايتۋىنشا, ەل بويىنشا اعاش وتىرعىزۋ ءار وڭىردەگى اۋا رايىنا بايلانىستى جۇرەدى.
«سونىمەن ءبىر مەزگىلدە بۇكىل ەل بويىنشا الەۋمەتتىك جەلىلەردە ء«ار وتباسىنان ءبىر اعاش» چەللەندجىن وتكىزۋ ۇسىنىلادى. اعاش وتىرعىزۋ اۋا رايىنىڭ جاعدايىنا قاراي جۇرگىزىلەدى. ياعني كوكتەم كەش كەلەتىن ايماقتاردا اكتسيانى دا كەيىنىرەك ۇيىمداستىرۋعا جول بەرىلەدى», دەيدى ول.