قازاقستاندىق زەينەتكەر اقىن-جازۋشىعا زەينەتاقىسىنان تىس, اي سايىن بەرىلىپ تۇراتىن قوسىمشا كومەك اقشا كەرەك. ويتكەنى زەينەت جاسىنان اسقان قالامگەرلەردىڭ ماتەريالدىق جاعدايى, بىلايشا ايتقاندا, جان باعىسى وتە ناشار. الاتىن ايلىق زەينەتاقىسى تىرشىلىك تاۋقىمەتىن كوتەرە المايدى.
سوڭعى شيرەك عاسىردان استام ۋاقىت بەدەرىندە قالامگەرلەردىڭ جاعدايى كۇرت ناشارلاي باستادى. كىتاپتار شىقپادى, شىقسا دا از مولشەردە شىقتى. قالاماقى تولەنبەدى. ونىڭ ەسەسىنە اۆتوردىڭ وزىنە ساتىپ الۋعا كىتاپ بەرىلدى. قالامگەر شىققان كىتابىن الىپ, ەل ارالادى. وسى جاعداي كۇنى بۇگىنگە دەيىن جالعاسىپ كەلەدى...
مەرزىمدى ءباسپاسوز بەتتەرىندە اقىن-جازۋشىلاردىڭ ءتۇرلى جازعاندارى: ادەبي دۇنيەلەرى, ماقالالارى, عىلىمي زەرتتەۋلەرى, تاريحي ەڭبەكتەرى جارىق كورىپ جاتتى. بىراق سول شىققان ماتەريالدارعا دا قالاماقى بەرىلمەدى. اۆتورلار اقشاسىز قالدى. وسىنىڭ سالدارىنان قالامى قارىمدى اۆتورلار جازۋىن توقتاتتى. ەسەسىنە كوممەرتسيالىق ادەبيەت بەلەڭ الدى. ادەبيەتتى كوركەمدىك ەمەس, اقشا بيلەدى. كىمنىڭ قالتاسىندا اقشاسى بار, سونىڭ كىتابى شىقتى. ال جازۋشىلاردىڭ كوبىنىڭ كەزىندەگى ايلىق اقىسى تىم از بولعاندىقتان, ولاردىڭ زەينەتاقى قورلارىنا دا اقشا از اۋدارىلدى. مىنە, وسى سەبەپتى الاتىن زەينەتاقىسى دا مۇلدەم ماردىمسىز بولىپ وتىر. ساناتوري مەن كۋرورتقا بارۋ, شەتەل اسۋ دەگەن جايىنا قالدى.
بۇعان قوسا, زەينەت جاسىنان اسقان قالامگەرلەردىڭ دەنساۋلىعى دا سىن كوتەرمەيدى. كوپشىلىگى ەمحانانىڭ ەسەبىندە تۇرادى. ادامعا اس قانشالىقتى قاجەت بولسا, اۋرۋشاڭ ادامعا ءدارى-دارمەك تە سونشالىقتى كەرەك. ونى الۋعا كوپ جاعدايدا مۇمكىندىگى جەتە بەرمەيدى. جالپى سانى جاعىنان ولار تىم كوپ تە ەمەس. سولارعا كومەك كورسەتۋگە مەملەكەتىمىزدىڭ كۇش-قۋاتى تولىعىمەن جەتەدى. تەك كوڭىل ءبولۋ كەرەك. زەينەت جاسىنداعىلار, اشىعىن ايتقاندا, جار باسىنا جاقىنداپ قالعاندار...
اقىن-جازۋشىلار اتىنان تىلەك ءبىلدىرۋشى –
دانەش احمەت ۇلى,
قازاقستان جازۋشىلار وداعىنىڭ مۇشەسى