باس شاھاردىڭ بەيبىتشىلىك جانە كەلىسىم سارايىندا وتاندىق ەسترادا انشىلەرىنىڭ قاتىسۋىمەن كسرو جانە قازاقستاننىڭ حالىق ءارتىسى, حالىق قاھارمانى روزا باعلانوۆانىڭ 100 جىلدىق مەرەيتويىنا ارنالعان «اينالايىن, حالقىمنان ەركەلەتكەن» اتتى سالتاناتتى كونتسەرت ءوتتى. تاعىلىمدى كەشكە التىنبەك قورازباەۆ, سۇلۋشاش نۇرماعامبەتوۆا باستاعان قازاق ونەرىنىڭ قايراتكەرلەرى مەن تالانتتى جاس ونەرپازدار قاتىسىپ, ايگىلى ءانشىنىڭ رۋحىنا تاعزىم ەتتى.
– روزا باعلانوۆا – اڭىز ادام, قازاق ەستراداسىنىڭ جارىق جۇلدىزى, تۇعىرى بيىك تۇلعا. ول كىسىنىڭ ءان الەمىندەگى ءجۇرىپ وتكەن ونەگەلى جولى ىزىنەن ەرىپ كەلە جاتقان جاس ونەرپازدار ءۇشىن عۇمىرلىق تاعىلىم. بۇگىندە «قازاقكونتسەرت» ۇيىمى ۇلى ءانشىنىڭ ەسىمىمەن اتالادى. بۇل – قازاق ءانىنىڭ اڭىزىنا كورسەتىلگەن زور قۇرمەت. قازاق ءانى مەن تالعامپاز تىڭدارمانى باردا روزا باعلانوۆانىڭ ەسىمى وشپەك ەمەس, حالىق جادىندا ماڭگى جاسايدى, دەدى قازاقستاننىڭ حالىق ءارتىسى, كومپوزيتور التىنبەك قورازباەۆ.
قازاق ونەرىندە قايتالانباس ءىز قالدىرعان تاريحي تۇلعانىڭ مەرەيتويىنا ارنالعان كەشتە اڭىز ءانشىنىڭ رەپەرتۋارىنداعى اندەر جاندى داۋىستا شىرقالدى. ەسىمى ەلگە بەلگىلى ونەرپازدارمەن بىرگە ايتۋلى كونتسەرتتە روزا باعلانوۆانىڭ نەمەرەسى ءۇربيبى باعلانوۆا دا ونەر كورسەتتى.
ءۇربيبى – روزا باعلانوۆانىڭ ازان شاقىرىپ قويعان ەسىمى. ۇلى تۇلعانىڭ ەسىمىن يەلەنگەن تالانتتى قىز اجەسىنىڭ جولىن قۋىپ, ونەردەگى ءوزىنىڭ قايتالانباس جولىن قالىپتاستىرۋدى ماقسات ەتىپتى.
روزا تاجىبايقىزى – حالىق قاھارمانى اتاعىنا يە بولعان قازاقستانداعى جالعىز ءانشى. ول ءومىرىنىڭ 70 جىلىنان استامىن ساحنادا وتكىزىپ, الەمنىڭ 50-دەن اسا ەلىندە بولىپ 25 تىلدە ءان شىرقاعان. ءسويتىپ, جارتى عاسىردان استام ۋاقىت بويى قازاق حالقىنىڭ ءداستۇرلى مادەنيەتى مەن ونەرىنىڭ وركەندەپ, الەمگە تانىلۋىنا زور ۇلەس قوستى.
الىپ سارايدى تولتىرعان تالعامپاز تىڭدارماننىڭ كوڭىل-كۇيىنەن ۇلى تۇلعاعا دەگەن شەكسىز قۇرمەت لەبى ەسەدى. كۇمىس كومەي ءانشىنىڭ تاماشا اندەرى حالىقتىڭ انشىگە دەگەن ساعىنىشىن ۇدەتە تۇسكەندەي. بەيبىتشىلىك جانە كەلىسىم سارايىنا جينالعان ونەرسۇيەر قاۋىم اسەم اننەن قۋات الىپ, رۋحاني دەمالىپ قايتتى.
ءانشى مەرەيتويىنا ارنالعان ءىس-شارالار الداعى ۋاقىتتا دا جۇيەلى جالعاسىن تابادى. اتاپ ايتساق, مادەنيەت جانە سپورت مينيسترلىگىنىڭ ۇيىمداستىرۋىمەن قىزىلوردا, الماتى, ماسكەۋ قالالارىندا ءانشىنىڭ شىعارماشىلىعىنا ارنالعان مەرەيتويلىق كونتسەرتتەر جانە نۇر-سۇلتان قالاسىندا حالىق قاھارمانى روزا باعلانوۆا اتىنداعى حالىقارالىق ۆوكالدىق كونكۋرس ۇيىمداستىرىلادى دەپ جوسپارلانۋدا. سونىمەن قاتار روزا باعلانوۆانىڭ 100 جىلدىعى يۋنەسكو-نىڭ پاريج قالاسىنداعى شتاب پاتەرىندە اتالىپ وتەدى.
روزا باعلانوۆانىڭ ءانى باردا ول ەشقاشان ولمەيدى. بۇلبۇل ءانشىنىڭ بىرەگەي شىعارماشىلىعى, عيبراتتى عۇمىرى, قايراتكەرلىك قاسيەتتەرى وسكەلەڭ ۇرپاقتىڭ جادىندا ماڭگىگە ساقتالادى.