سىرماق سىرۋ, الاشا توقۋ سىندى ۇلتىمىزدىڭ ۇمىت بولىپ بارا جاتقان ونەرىن جاڭاشا ستيلدە قايتا جاڭعىرتىپ, تورىمىزگە شىعارىپ جۇرگەن سۋرەتشىلەردىڭ قولدارىنا قۇداي قۋات بەرسىن دەيمىز. كۇنى كەشە وسكەمەندەگى وبلىستىق ونەر مۋزەيىندە «تۋعان ولكەنىڭ پاليتراسى» اتتى كەسكىندەمە جانە ساندىك قولدانبالى ونەردىڭ كورمەسى اشىلدى.
سوناۋ الاتاۋدان التايعا ات ارىتىپ, سۋرەتشىلەر گۇلجامال تاگەنوۆا مەن گۇلجانات قابيجانوۆالار ەرەكشە كورمە اكەلدى. ەكەۋى دە شىعىستىڭ تۋمالارى بولعاندىقتان, كورمە اتاۋىن «تۋعان جەردىڭ پاليتراسى» دەپ قويعان ەكەن. ونەر مۋزەيىندەگى ەكى زالعا ىلىنگەن تۋىندىلاردان تۋعان جەردىڭ, اۋىلدىڭ ءيىسى اڭقىپ تۇردى. بوياۋلارى ويناقى, قانىق ءارى ماعىنالى دەپ ونەرتانۋشىلار, كورەرمەندەر ءوز باعالارىن بەرىپ جاتتى. اسىرەسە, ورتاداعى داستارقاندا جاتقان قىزىلدى-جاسىلدى جىپتەن توقىلعان المالار كوپتىڭ كوڭىلىن اۋداردى. شىنايى المادان ايىرماشىلىعى جوق. ونەردىڭ قاسيەتىن تۇسىنەتىندەر اسقان شەبەرلىكپەن جاسالعانىن بىردەن اڭعارادى.
قازىرگى تاڭدا تۋعان جەرلەرىنە كەلىپ كورمە وتكىزىپ جاتقان ەكى سۋرەتشى دە ونەر ورداسى – الماتىدا تۇرادى, سوندا قىزمەت ەتەدى. ەسىمدەرى ەلىمىزگە تانىمال شەبەرلەر قازاقتىڭ ۇلتتىق ونەرىن الىس-جاقىن شەتەلدەرگە دە تانىتىپ ءجۇر.
گۇلجامال تاگەنوۆا قازاقستان سۋرەتشىلەر وداعىنىڭ مۇشەسى, كوپتەگەن بايقاۋدىڭ جەڭىمپازى, حالىقارالىق پلەنەرلەر مەن سيمپوزيۋمداردىڭ قاتىسۋشىسى جانە ديپلومانتى. ءومىرىن ونەرگە ارناعان ول «سىمبات ءسان» اكادەمياسىندا سۋرەت پەن كەسكىندەمەدەن ساباق بەرەدى. ال گۇلجانات قابيجانوۆا پەداگوگيكا عىلىمدارىنىڭ كانديداتى. بەينەلەۋ ونەرىنىڭ كوپتەگەن سالاسىندا شىعارماشىلىق تاجىريبەسى بار. اتاپ ايتساق, كىتاپ گرافيكاسى, گوبەلەن, كيىز, باتيك, ينتەرەر ديزا- ينى سىندى سالالارىن ابدەن مەڭگەرگەن. سوڭعى جىلدارى كەسكىندەمەمەن عانا ەمەس, كيىزبەن جۇمىس ىستەۋدى قولعا العان. سونىمەن قاتار تابيعي جىبەك پەن كيىزدەن ءساندى كيىمدەر تىگىپ ءجۇر. بۇل جۇمىستارى ءۇشىن قازاقستان سۋرەتشىلەر وداعىنىڭ التىن مەدالىمەن دە ماراپاتتالعان.
– زايسان قالاسىندا تۋىپ-ءوستىم. مەكتەپتى تامامداعان سوڭ ارمان قۋىپ الماتىعا كەتتىم. سودان بەرى ونەر جولىندا ەڭبەك ەتىپ كەلەمىن. ال تۋعان وڭىردە العاش رەت كورمە وتكىزىپ وتىرمىز. كورەرمەندەردىڭ قىزىعۋشىلىعىنا ريزا بولدىم. بۇعان دەيىن شەتەلدەرگە كوپ شاقىرتۋ الىپ تۇردىق. بۇدان بىلاي وسكەمەنگە ءجيى كەلەمىز. كەيىنگى جىلدارى توقىما ونەرىمەن, گوبەلەنمەن, كەستەمەن اينالىسىپ ءجۇرمىن. سۋرەتشى بولعان سوڭ كەسكىندەمە, اكۆارەل, گرافيكانى دا تاستامايمىز, – دەيدى سۋرەتشى گۇلجانات قابيجانوۆا.
ايتا كەتسەك, ەكى سۋرەتشىمىز دە حالىقارالىق تاۋەلسىز ايەل سۋرەتشىلەر قورىنىڭ مۇشەسى. ۇلتتىق ونەردى الەمدىك دەڭگەيگە كوتەرۋ باعىتىندا ايانباي ەڭبەك ەتىپ كەلە جاتقاندىقتارىن, وسكەمەندەگى كورمەدەن-اق كورۋگە بولادى. سۋرەتشىلەردىڭ ايتۋىنشا, «تۋعان ولكەنىڭ پاليتراسى» اتتى كورمەگە قويىلعان جۇمىستارعا سۇرانىس بولسا, ساتىلۋى دا مۇمكىن. كورمە 10 ساۋىرگە دەيىن جالعاسادى.
شىعىس قازاقستان وبلىسى