قر پرەمەر-ءمينيسترى ءاليحان سمايىلوۆ دۇنيەجۇزىلىك بانكتىڭ ەۋروپا جانە ورتالىق ازيا ايماعى بويىنشا ۆيتسە-پرەزيدەنتى اننا بەردەمەن كەزدەستى, دەپ حابارلايدى Egemen.kz.
ۇكىمەتتىڭ Telegram پاراقشاسى تاراتقان مالىمەتتە باسقوسۋدا قر مەن دۇنيەجۇزىلىك بانكتىڭ ينفراقۇرىلىم, تسيفرلىق تەحنولوگيالار جانە قارجى سالالارىنداعى بىرلەسكەن جوبالاردى ىسكە اسىرۋعا قاتىستى ءوزارا ىنتىماقتاستىعىنىڭ پەرسپەكتيۆاسى تالقىلانعاندىعى ايتىلعان.
ايتا كەتەيىك, بيىل قازاقستان مەن دۇنيەجۇزىلىك بانك ىنتىماقتاستىعىنىڭ 30 جىلدىعىن اتاپ وتەدى.
«سەرىكتەستىگىمىزدىڭ وتىز جىلدىعى ىشىندە ءبىز شاعىن جانە ورتا بيزنەس, قارجى, تكش, ەنەرگەتيكا, اۋىل شارۋاشىلىعى جانە اقپاراتتىق تەحنولوگيالارمەن قاتار ەكونوميكانىڭ ءتۇرلى سالالارىندا بارلىعى 55-تەن استام جوبانى ءساتتى ىسكە اسىردىق», دەدى ءا. سمايىلوۆ.
بىرلەسكەن ينفراقۇرىلىمدى دامىتۋ جوبالارى بويىنشا «دوستىق – مويىنتى» جول ۋچاسكەسىن سالۋ جوباسى تالقىلانۋدا.
قازىرگى ۋاقىتتا جول قۇرىلىسى, ءبىلىم جانە عىلىم, اۋىل شارۋاشىلىعى, شاعىن جانە ورتا بيزنەس سالاسىندا 7 جوبا ىسكە اسىرىلۋدا.