ەلىمىزدەگى جەتەكشى پارتيانىڭ كەزەكتەن تىس ءححىى سەزى جاڭا باستامالارعا جول اشتى, سونىمەن قاتار جاۋاپكەرشىلىگى جوعارى امانات جۇگىن ارتتى.
بۇل سەزدەن كوپشىلىك وزگەرىس, جاڭا باستاما كۇتتى. ءماجىلىس توراعاسى ەرلان قوشانوۆ Nur Otan پارتياسىنىڭ اتىن Amanat دەپ وزگەرتۋدى ۇسىندى. پارتيانى ەلمەن بىرگە جاڭارتۋ, ۇيىمنىڭ قىزمەتىن جاڭا مازمۇنمەن تولىقتىرۋ كەرەك دەگەن ۇسىنىستى دەلەگاتسيا مۇشەلەرى دە قولدادى.
پرەزيدەنت قاسىم-جومارت توقاەۆ استارىندا ۇلكەن ءمانى بار «امانات» ءسوزىنىڭ ماعىناسى تەرەڭ ەكەنىن, ەلىمىزدىڭ تاريحى مەن مادەنيەتىندە ايرىقشا سيمۆولدىق ءمانى بار ەكەنىن, قۋاتتى مەملەكەت پەن ورتاق ۇلتتىق بىرلىك قۇندىلىقتارىن بىلدىرەتىنىن اتاپ ءوتتى.
پرەزيدەنت پارتيا اتاۋىنىڭ وزگەرتىلۋىمەن عانا توقتاماي, پارتيا مۇشەلەرىنەن ناقتى ناتيجە تالاپ ەتىپ وتىر.
سەزد بارىسىندا پارتيانىڭ 7 نەگىزگى باعىتى قابىلداندى. ول بويىنشا پارتيا مۇشەلەرىنە جوعارىدان تاپسىرما كۇتىپ وتىرماي, جەرگىلىكتى حالىقپەن تىعىز جانە اشىق جۇمىس ىستەۋ, بەرگەن ۋادەلەردى ءسوز جانە قاعاز جۇزىندە عانا ەمەس, ءىس جۇزىندە ىسكە اسىرۋ سەكىلدى ناقتى مىندەتتەر مەن پارتيانىڭ جاس قاناتىن جاڭارتۋ ماسەلەسى ءسوز بولدى. بۇل جۇيەلى جەتى باعىت پارتيانىڭ جۇمىس بارىسىن ءارى قاراي جانداندىرۋعا نەگىز بولماق.
بابالار اڭساپ, كەيىنگىگە مۇرا قالدىرعان اماناتىن ودان ءارى جەتكىزۋگە Amanat پارتياسى ءوز ۇلەسىن قوسادى دەپ ويلايمىن. بۇل – پرەزيدەنتىمىزدىڭ جاڭا قازاقستان قۇرۋعا, جاڭا ۇرپاقتىڭ جولىن اشۋعا جاساعان قادامى.
ابزال بەكبوسىنوۆ,
نۇر-سۇلتان قالالىق ادۆوكاتتار القاسىنىڭ مۇشەسى