يندۋستريا جانە ينفراقۇرىلىمدىق دامۋ مينيسترلىگى ءباسپاسوز قىزمەتىنىڭ ۇيىمداستىرۋىمەن وتكەن Mير PRESS CUP – 2022 تۋرنيرىنە رەسپۋبليكالىق باق-تاردان 7 قىزدار كومانداسى قاتىستى: «Qazaqstan» رترك, «حابار» اگەنتتىگى, «جەتىنشى ارنا», «ەۋرازيا – ءبىرىنشى ارناسى», «Baq.kz» اقپاراتتىق پورتالى, «Egemen Qazaqstan» جانە «ايقىن» گازەتتەرى.
جەرەبە قورىتىندىسى بويىنشا كوماندالار ەكى توپقا ءبولىنىپ, ولاردىڭ جەڭىمپازدارى فينالدا تۋرنير كۋبوگىنا تالاستى. باس سپورتتىق جۇلدە اقتىق سايىستا جەڭىسكە جەتكەن «Qazaqstan» رترك كومانداسىنا بۇيىردى. ەكىنشى ورىندى «جەتىنشى ارنا» قىزمەتكەرلەرى يەلەندى. قولا جۇلدە «حابار» اگەنتتىگىنىڭ قورجىنىندا. جۇلدەلى ءتورتىنشى ورىن «Baq.kz» اقپاراتتىق پورتالىنىڭ ارۋلارىنا تاپسىرىلدى. جارىسقا بەلسەندى قاتىسقان «ەۋرازيا – ءبىرىنشى ارناسى» تەلەارناسى – «كورەرمەن كوزايىمى», «Egemen Qazaqstan» گازەتى – «ەڭ سۇيكىمدى كوماندا», «ايقىن» گازەتى «ەڭ سۇلۋ كوماندا» اتالىمدارىن يەلەنىپ, باعالى سىيلىقتارمەن ماراپاتتالدى.
«جارىس ماقساتى – جۋرناليستەر اراسىنداعى دوستىقتى ارتتىرۋ, حالىقارالىق ايەلدەر مەرەكەسىمەن قۇتتىقتاۋ. سپورتتىق سايىس بولعاندىقتان سالا-ماتتى ءومىر سالتىن ناسيحاتتاۋ. دوستىق بار جەردە ءوسۋ بار, بىرلىك بار جەردە-بەرەكە بار. سونى قولداپ, بۇگىن وسىنداي ءىس-شارا وتكىزىپ جاتىرمىز. بۇل جەردە ماڭىزدىسى – جۇلدەلى ورىن الۋ ەمەس, وسىندا كەلىپ قاتىسۋ, باس قوسىپ, ءبىر-بىرىمەن تانىسۋ. ءبىزدىڭ دە ۇيىمداستىرۋداعى ماقساتىمىز سول», دەدى يدم ءباسپاسوز حاتشىسى جانجىگىت ومارحان.
ايتا كەتەرلىگى, تۋرنيرگە Qazaq geophysics جانە Kazakhmys barlau كومپانيالارى قولداۋ ءبىلدىردى. ۇيىمداستىرۋ جۇمىستارىنا BAQ League جۋرناليستەر ليگاسى اتسالىستى. BAQ League باق ۇجىمدارى ءۇشىن تيمبيلدينگ. بۇعان دەيىن ميني-فۋتبولدان توعىز ماۋسىم جانە ۆولەيبولدان چەمپيونات وتكىزگەن. جالپى العاندا, BAQ League ماۋسىمدارىنا قازاقستاننىڭ ءتۇرلى وڭىرلەرىنەن 50-دەن استام باق-تان 700-دەن استام جۋرناليست قاتىستى.