ەلىمىزدەگى جەتەكشى ساياسي پارتيانىڭ اتى وزگەرىپ, رەبرەندينگ جاساپ جاتقانى وزگەرىستىڭ باسى دەپ باعالانۋى كەرەك سياقتى. پارتيالىق دامۋدىڭ ءبىر كەزەڭى ءوتتى دەسەك بولادى. ەندى جاڭا كەزەڭ كۇتىپ تۇر.
پارتيا ءارى قاراي قالاي جىلجۋى مۇمكىن دەگەنگە كەلسەك, كوپ دۇنيە قۇرامىنداعى ادامدارعا بايلانىستى. ونىڭ ۇستىنە بۇل بيلىك پارتياسى بولىپ ەسەپتەلەدى.
پارتيا قۇرامى قازىرگىدەن دە جاڭارا تۇسەدى دەپ ۇمىتتەنەمىز. ونسىز دا وسىنىڭ الدىنداعى سەزدە ايتارلىقتاي جاڭارعانىن بىلەمىز. پارتيا ورگانىنىڭ باسقارۋ قۇرامىنا باسقا ادامدار ەندى دەگەندەي. بۇرىنعىلاردىڭ ءبىر بولىگى قۇرامنان شىعارىلدى دا. وسى تۇرعىدان الساق, قانداي دا ءبىر قوزعالىستىڭ بار ەكەنى انىق بايقالادى. ونىڭ ىشىندە كادرلىق تۇرعىدان دا, پارتيا ساياساتى تۇرعىسىنان دا قوزعالىس بار دەپ ايتا الامىز.
ەندى نە بولادى دەسەك, بۇل پرەزيدەنتتىڭ ناۋرىز ايىنىڭ ورتاسىندا ەلدىڭ ساياسي دامۋ جولى تۋرالى نە ايتاتىنىنا, قانداي ماسەلەلەردى كۇن تارتىبىنە شىعاراتىنىنا قاتىستى. ناقتىلاي ايتقاندا, كوپ ماسەلە قاسىم-جومارت توقاەۆتىڭ مەملەكەت باسشىسى رەتىندە ەلدىڭ ساياسي دامۋىن قالاي كورەتىنىنە, كوزقاراسى قالاي بولاتىنىنا تىكەلەي بايلانىستى. وسى ماسەلەگە جاۋاپ ىزدەگەن كەزدە پارتيانىڭ قالاي العا جىلجيتىنى تۋرالى ناقتىراق بولجام ايتۋعا بولادى.
ازىرگە پرەزيدەنت وسى پارتيانىڭ باسشىسى بولعاندىقتان, Amanat پارتياسىنىڭ العا جاسايتىن قادامى دا سول كەزدە ايتىلاتىن ماسەلەلەرگە نەگىزدەلەدى دەپ ويلايمىن. پرەزيدەنت وسى جولى جاڭا ساياسي ۇسىنىستار ايتادى دەپ توپشىلاپ وتىرمىن. پارتيا وسى رەفورمالار اياسىنداعى نۇسقاۋلارمەن, شەشىمدەرمەن قارۋلانىپ, ەكىنشى تىنىسى اشىلادى دەپ ەسەپتەيمىن.
مارات سارسەمباەۆ,
بۇۇ ادام قۇقىقتارى جونىندەگى كوميتەتىنىڭ بۇرىنعى مۇشەسى, زاڭ عىلىمدارىنىڭ دوكتورى, پروفەسسور