پارتيا اتاۋىنىڭ Amanat بولىپ وزگەرىپ جاتقانىنىڭ ءوزى جاقسىلىقتىڭ نىشانىنداي كورىنەدى. بۇل – ۇلتىمىز ءۇشىن وتە كيەلى ۇعىم. پرەزيدەنت ايتقانداي, ەگەمەندىگىمىز, ەلدىگىمىز بەن بىرلىگىمىز, كەڭ-بايتاق جەرىمىز – بىزگە بابالاردان جەتكەن امانات بولسا, وسى اماناتقا قيانات جاساماي, بولاشاققا ميراس ەتۋىمىز كەرەك.
قازىر الەمدەگى احۋال وزگەرىپ جاتىر. وسىنداي اۋمالى-توكپەلى زاماندا جاڭا قازاقستان قۇرۋعا جۇمىلا كىرىسىپ جاتىرمىز. حالىق وزگەرىس كۇتىپ وتىر. پارتيانىڭ اتى وزگەرگەن سوڭ, زاتى دا وزگەرەدى دەپ سەنىپ وتىر. پرەزيدەنتىمىز وتە دۇرىس ايتتى. پارتيانىڭ جۇمىسى اشىق بولۋى كەرەك, پارتيا مۇشەلەرى حالىقتىڭ مۇڭىن ەستۋى كەرەك, كەرى بايلانىس جاساۋعا ءتيىس. جوعارىدان تاپسىرما كۇتىپ وتىراتىن كۇن ارتتا قالدى.
ەندى سايلاۋ كەزىندە حالىققا بەرگەن ۋادەلەردى ءىس جۇزىندە ىسكە اسىراتىن ۋاقىت كەلدى. پرەزيدەنت تە بەرىلگەن ۋادەلەر قاعاز جۇزىندە قالماۋى ءتيىس ەكەنىن اتاپ كورسەتتى.
سەزدە پارتيا جۇمىسىن مودەرنيزاتسيالاۋدىڭ جەتى باعىتى اتالدى. بۇل پارتياعا, ونىڭ مۇشەلەرىنە جاڭا ماقساتتار مەن ناقتى مىندەتتەر جۇكتەيدى. زامان, ۋاقىت, ءداۋىر وزگەرىپ, تالاپ جاڭارعان ساتتە ارقايسىسىمىز ىسىمىزبەن ەلىمىزدى دامىتۋعا ۇلەس قوسۋىمىز قاجەت.
قازاقستاننىڭ ازاماتتىق اليانسىنىڭ قاتارىنداعى 3 مىڭ ۇەۇ-نىڭ ۇجىمدىق ەڭبەگى ەلەۋلى. ازاماتتىق قوعام – ۇەۇ عانا ەمەس, ساياسي پارتيالار, ەتنومادەني بىرلەستىكتەر, كاسىپوداق ۇيىمدارى, ءدىني بىرلەستىكتەر, اقپارات قۇرالدارى, ازاماتتىق بەلسەندىلەر. ءبىز وڭىرلەردە نە بولىپ جاتقانىن, حالىقتى قانداي ماسەلەلەر تولعاندىراتىنىن جاقسى بىلەمىز.
بۇگىنگى تاڭدا قوعامدا ساياسي جاڭارۋ تۋرالى ۇلكەن ءۇمىت بار. ادامدار ءوز قۇقىقتارىن قورعاۋعا بەل بۋدى. ولار وزگەرىستى كۇتۋدە. بۇل جاعدايدا مەملەكەتتىك ورگانداردىڭ جاڭا ءومىر مەن سىن-تەگەۋرىندەرگە بەيىمدەلە ءبىلۋى ەرەكشە ماڭىزدى بولىپ وتىر.
بەلگىلەنگەن رەفورمالاردى تابىستى جۇزەگە اسىرۋ ءۇشىن ازاماتتىق قوعام كۇش-جىگەردى بىرىكتىرۋگە ءتيىس. ءوزارا سەنىم نەگىزىندە قوعام مەن مەملەكەتتى ورتاق مۇددەگە جۇمىلدىرۋ وتە ماڭىزدى.
بانۋ نۇرعازيەۆا,
«قازاقستاننىڭ ازاماتتىق اليانسى» زتب پرەزيدەنتى