Amanat پارتياسىنىڭ اتقارۋشى حاتشىسى اسحات ورالوۆ الماتىعا جۇمىس ساپارىنىڭ ەكىنشى كۇنى قاڭتار ايىنداعى وقيعالار كەزىندە زارداپ شەككەن شاعىن جانە ورتا بيزنەس وكىلدەرىمەن كەزدەستى جانە پارتيانىڭ جاستار قاناتىنىڭ بەلسەندىلەرىمەن الداعى جۇمىس باسىمدىقتارىن تالقىلادى.
كەزدەسۋ بارىسىندا الماتىلىق كاسىپكەرلەر اسحات ورالوۆقا نىسانداردى قالپىنا كەلتىرۋ جاعدايى جانە قازىرگى تاڭدا ورىن الىپ وتىرعان ءتۇيىندى ماسەلەلەر تۋرالى ايتتى.
«پارتيا توراعاسى, پرەزيدەنت قاسىم-جومارت توقاەۆتىڭ تاپسىرماسى بويىنشا نىسانداردى قالپىنا كەلتىرۋ جانە زارداپ شەككەن كاسىپكەرلەرگە كەلتىرىلگەن زالالدى وتەۋ بويىنشا شارالار قابىلدانۋدا. جەرگىلىكتى بيلىكتىڭ مالىمەتى بويىنشا, الماتىدا مىڭنان استام كاسىپكەر 3,7 ملرد تەڭگە سوماسىندا تولەم الدى. ولاردىڭ ىشىندە ساۋدا, قوعامدىق تاماقتانۋ, لوگيستيكا, باق جانە باسقا دا سالالاردىڭ سۋبەكتىلەرى بار. 10 ناۋرىزعا دەيىن تاعى 200-دەن استام ءوتىنىشتى قاراۋ جوسپارلانۋدا, وسىلايشا وتىنىشتەردىڭ 90%-ى قاناعاتتاندىرىلادى», دەدى اسحات ورالوۆ كەزدەسۋ قورىتىندىسىندا.
ونىڭ ايتۋىنشا, قازىرگى تاڭدا ەلىمىزدە حالىقتىڭ 40%-عا جۋىعىنا جۇمىس بەرىپ وتىرعان 1,4 ملن-نان استام كاسىپكەر بار. الماتى قالاسىنىڭ وزىندە 200 مىڭنان استام شوب سۋبەكتىسى جۇمىس ىستەيدى. سوندىقتان كاسىپكەرلىكتى دامىتۋ مەن قولداۋ ماسەلەلەرى ارقاشان Amanat پارتياسىنىڭ باسىمدىعى بولىپ قالا بەرەدى.
وسى كۇنى اسحات ورالوۆ پارتيا جاستار قاناتىنىڭ بەلسەندىلەرىمەن دە كەزدەستى.
«پارتيانى ترانسفورماتسيالاۋ ءجۇرىپ جاتقان كەزەڭدە Jas Otan جەرگىلىكتى جەرلەردەگى جاستاردىڭ پروبلەمالارىن شەشۋگە باعىتتالعان جۇمىستى بۇرىنعىدان دا كۇشەيتىپ, ونى كۇن تارتىبىنەن تۇسىرمەۋگە ءتيىس. قازىرگى ۋاقىتتا پارتيا جاستاردىڭ, ونىڭ ىشىندە NEET ساناتىنداعى جاس بۋىننىڭ ءتۇيىندى ماسەلەلەرىن انىقتاۋ بويىنشا كەشەندى تالداۋ جۇرگىزۋدە. وسى جۇمىستىڭ قورىتىندىسى بويىنشا جاڭا جاستار باعدارلاماسى ازىرلەنىپ, Jas Otan فورۋمىندا قابىلدانادى», دەپ تۇيىندەدى اسحات ورالوۆ.