پرەزيدەنت قاسىم-جومارت كەمەل ۇلى توقاەۆ ۇكىمەتتىڭ كەڭەيتىلگەن وتىرىسىندا سويلەگەن سوزىندە جاڭا قازاقستاندى قۇرۋ ءۇشىن تۇسىنىكتى ءارى ءادىل مەملەكەتتىك ساياسات جۇرگىزىلۋى كەرەكتىگىن, مۇنداي ساياساتتىڭ باسەكەگە جانە تەحنولوگياعا نەگىزدەلگەن ەكونوميكانى قالىپتاستىراتىنىن اتاپ كورسەتتى.
سايىپ كەلگەندە, الەمدىك باسەكەگە قابىلەتتى جانە زاماناۋي يننوۆاتسيالىق تەحنولوگياعا ارقا سۇيەيتىن ەكونوميكانى ورنىقتىرىپ, ونىڭ ۇنەمى ىلگەرىلەپ وتىرۋى ءۇشىن ەڭ اۋەلى, مەملەكەتتىك شارۋاشىلىقتىڭ بارلىق سالاسىندا ءوز ءىسىن جەتىك بىلەتىن بىلىكتى ماماندار قاجەت ەكەنى اقيقات. بۇل رەتتە مەملەكەت باسشىسى اتاپ كورسەتكەندەي, جاڭا ەكونوميكا قۇرۋ ءۇشىن جوعارى وقۋ ورىندارىنىڭ باسەكەگە قابىلەتتىلىگىن كۇشەيتۋدىڭ ماڭىزى زور. ەندەشە, كادرلار دايارلاۋ ساپاسىن ارتتىرۋ باستى تالاپتاردىڭ ءبىرى دەسەك, وتاندىق ءبىلىم بەرۋ جۇيەسىنە قاتىسى بار مەكەمەلەردىڭ قايسىسى بولسىن ءوز مىندەتتەرىن وسى ولشەم تۇرعىسىنان باعامداۋى, ءومىردىڭ وزىنەن تۋىنداپ وتىرعان شارتتارعا ساي ارەكەت جاساپ, وڭ ناتيجەگە جەتۋدى ماقسات تۇتۋى كەرەك دەپ ويلايمىن.
ۇلت بولاشاعى – بىلىكتى, مادەنيەتتى, العىر جاستاردىڭ قولىندا. ءبىلىمى تەرەڭ جاس تولقىننىڭ ەل ىشىندە باسەكەگە قابىلەتتى بولا الاتىنى, تولايىم تابىستارعا جەتىپ, لايىقتى ءومىر ءسۇرۋ ءۇشىن دە مۇمكىندىگى جوعارى تۇراتىنى داۋسىز.
مەملەكەت باسشىسىنىڭ «تەحنيكالىق ماماندىقتارعا باسىمدىق بەرىپ, ينجەنەرلەردىڭ, ونەركاسىپشىلەردىڭ جاڭا بۋىنىن ءوسىرۋىمىز كەرەك» دەگەن سوزدەرىن ابدەن قۇپتاۋعا بولادى. بۇل باعدار ستۋدەنتتەرگە, جوعارى وقۋ ورىندارىنىڭ بارشا قىزمەتكەرلەرىنە ەرەكشە جىگەر قوسقانىن اتاپ وتكىم كەلەدى.
مەملەكەت باسشىسىنىڭ جوعارى وقۋ ورىندارىندا ءبىلىم ساپاسىن ارتتىرۋدىڭ بارلىق مۇمكىندىگىن قاراستىرۋ جانە ستۋدەنتتەردى جاتاقحانامەن قامتاماسىز ەتۋ جونىندە بەرگەن تاپسىرمالارىن جۇزەگە اسىرۋ – ءبىز ءۇشىن ءبىرىنشى كەزەكتەگى مىندەت.
تاياۋدا قازاقستان مەن رەسەي پرەزيدەنتتەرىنىڭ كەزدەسۋىندە رەسپۋبليكامىزدا ينجەنەرلىك-تەحنيكالىق سالا بويىنشا جوعارى بىلىكتى مامانداردىڭ قاجەتتىگىن ەسكەرە وتىرىپ, ءبىلىم بەرۋ سالاسىنداعى ىنتىماقتاستىققا ەرەكشە ءمان بەرىلدى. كەلىسسوز قورىتىندىلارى بويىنشا قول قويىلعان قۇجاتتاردىڭ دەنى ءبىلىم بەرۋ, تسيفرلاندىرۋ, عارىشتى يگەرۋ جانە اتوم ەنەرگەتيكاسى سالالارى بويىنشا ماماندار دايارلاۋعا قاتىستى بولدى. مۇنىڭ ءبارى بارشا قازاقستاندىقتار ءۇشىن قۋانتارلىق جايت.
ءسوز جوق, ءبىز ۇمىتپەن كۇتىپ وتىرعان جاڭا قوعامنىڭ حالىق مۇددەسىنە ساي دامۋى ءۇشىن بىلىكتى, ءبىلىمدى, وزىق ويلى ماماندار قاجەت. ءبىزدىڭ مىندەتىمىز – وسى ماقساتقا قىزمەت ەتۋ.
قاسىم-جومارت توقاەۆ: ء«بارىمىز تۇتاس ەل بولىپ, جاڭا قازاقستاندى قۇرايىق! جاڭا قازاقستان – بارشامىزدىڭ ورتاق ءۇيىمىز, ونىڭ ىرگەسىن بىرگە قالايىق! بۇل وسكەلەڭ ۇرپاق ءۇشىن كەرەك», دەدى. پرەزيدەنتتىڭ بۇل سوزدەرىنەن ەلىمىزدىڭ الدىندا نەگىزگى قانداي مىندەت تۇرعانىن انىق اڭعارۋعا بولادى. ال بۇگىنگى قوعامىمىزدىڭ وسى مىندەتتى ءوز دەڭگەيىندە ەڭسەرۋگە الەۋەتى تولىق جەتەتىنىنە سەنىم مول.
تالعات قۇلاجانوۆ,
الماتى تەحنولوگيالىق ۋنيۆەرسيتەتىنىڭ رەكتورى,
ۇلتتىق عىلىم اكادەمياسىنىڭ اكادەميگى