ۋكرايناداعى جاعدايعا الاڭداعان الەم جۇرتى ەكى ەل بيلىگىنىڭ ورتاق كەلىسىمگە كەلۋىن تىلەپ وتىر. الايدا ازىرگە بۇل تىلەكتىڭ ورىندالار ءتۇرى جوق سىڭايلى.
ۋكراينا يەن رەسەي وكىلدەرىنىڭ ەكىنشى كەزدەسۋىندە قانداي شەشىم قابىلداناتىنى بەلگىسىز. ازىرگە وتەتىنى عانا بەلگىلى. دەگەنمەن شابۋىل توقتاماي تۇر. كەلىسسوز جۇرگىزۋشىلەردىڭ ءبىرى داۆيد اراحاميا ۋكراينا كەم دەگەندە بەيبىت تۇرعىندارعا قاقتىعىستان زارداپ شەككەن اۋدانداردان كەتۋگە مۇمكىندىك بەرەتىن گۋمانيتارلىق دالىزدەر تالاپ ەتەتىنىن جاريالادى.
ۋكراينادا ءبىر ميلليوننان استام ادامنىڭ شەكارا اسقانى تۋرالى مالىمەت بار. ال رەسەي ەلدىڭ وڭتۇستىك اۋماعىنداعى بىرنەشە قالانى اتقىلاپ, قورشاۋعا العان. رەسەي سىرتقى ىستەر ءمينيسترى سەرگەي لاۆروۆتىڭ ايتۋىنشا, كەلىسسوزدەر كەزىندە رەسەيدىڭ تالاپتارى – «ۋكراينانى قارۋسىزداندىرۋ جانە ەلدى ۇلتشىلداردان ازات ەتۋ», «قىرىمدى رەسەي اۋماعى رەتىندە مويىنداۋ» جانە «ۋكراينانىڭ شىعىسىندا بولىنگەن ەكى ايماقتى, ياعني ءوزىن «دونەتسك حالىق رەسپۋبليكاسى» (دنر) جانە «لۋگانسك حالىق رەسپۋبليكاسى» (لنر) دەپ تانىعان اۋماقتاردى رەسمي مويىنداۋ».
بۇل شارتتارعا ۋكراينا تاراپى نە دەيتىنىن بولجاۋ قيىن. سەبەبى سوعىس جاعدايىندا كەسىپ ايتۋ مۇمكىن ەمەس. الايدا ۋكراينانىڭ ۇستانىمى بەلگىلى. وسىعان دەيىن دە رەسەيدىڭ ۋلتيماتۋم قويۋىنا جول بەرمەيمىز دەگەن-ءدى.
ماجارستان پرەمەر-ءمينيسترى ۆيكتور وربان رەسەي مەن ۋكراينا اراسىندا بەيبىت كەلىسسوزدەر جۇرگىزۋگە دايىن ەكەنىن مالىمدەدى. وسىلايشا, كەلىسىمگە شاقىرىپ, كەلىسسوزدەردى ءوز ەلىندە ۇيىمداستىرۋعا دايىن مەملەكەتتەر قاتارى كوبەيىپ كەلەدى.
رەسەي اسكەرى ۋكراينانىڭ وڭتۇستىگىندەگى پورتتى حەرسون قالاسىن باقىلاۋعا العانى حابارلاندى. بۇل – رەسەي اسكەرى باسىپ العان العاشقى ءىرى قالا. ماريۋپول قالاسىندا دا جاعداي كۇردەلى, شابۋىل تولاستاماي تۇر. كيەۆتە ءىرى جارىلىستار بولعانىمەن, ەل استاناسى ۋكراينا ۇكىمەتىنىڭ باقىلاۋىندا ەكەنى ايتىلدى. ۋكراينا قازا بولعاندار مەن جارالانعاندار تۋرالى دەرەكتى كۇندەلىكتى جاريالاپ وتىرعانىمەن, ونى ناقتى راستايتىن دالەل جوق. دەگەنمەن مىڭداعان ساربازدىڭ ءولىم قۇشقانى بەلگىلى. ەكى ەل ۇسىنعان مالىمەتتىڭ الشاقتىعى وراسان.
رەسەيگە سالىنعان سانكتسيالار سانى دا كوپ. حالىقارالىق كومپانيالار دا رەسەيدە ساۋدا جاساۋعا قارسىلىق ءبىلدىرىپ, دۇكەندەرىن جاۋىپ, تاۋارلارىن جەتكىزبەۋ تۋرالى شەشىم قابىلداپ جاتىر.
ءوز ازاماتتارىن رەسەيدەن كەتۋگە شاقىرىپ جاتقان مەملەكەتتەر دە بار. مىسالى, فرانتسيا ۇكىمەتى سوڭعى جاعدايعا بايلانىستى ەلدە بولۋى مىندەتتى ەمەس ازاماتتارىن رەسەيدەن كەتۋگە شاقىرادى. بۇل قاتاردا ۇلىبريتانيا مەن اقش تا بار.
وعان قوسا حالىقارالىق پاراليمپيادا كوميتەتى رەسەي جانە بەلارۋس سپورتشىلارىنا بەيجىڭدەگى پاراليمپيادا ويىندارىنا قاتىسۋعا تىيىم سالدى. وسىعان دەيىن قوس ەل سپورتشىلارىنا بەيتاراپ مارتەبەدە قاتىسۋعا رۇقسات بەرگەن ەدى. سونداي-اق وزگە دە سپورتتىق نەمەسە شىعارماشىلىق جارىستار مەن ۇيىمداردىڭ رەسەيمەن بايلانىسى كۇردەلەنىپ كەتتى.
رەسەي مەن فرانتسيا پرەزيدەنتتەرى ۆ.پۋتين مەن ە.ماكرون اسكەري قاقتىعىس باستالعالى ءۇشىنشى رەت تەلەفون ارقىلى سويلەسكەنى بەلگىلى بولدى. وندا پۋتين رەسەي ءوز ماقساتتارىنا جەتەتىنىن جانە ۋكراينا ۋاقىت ۇتۋ ءۇشىن كەلىسسوزدى سوزعان سايىن كرەمل تالابى قوسىلا بەرەتىنىن مالىمدەگەن.
ۋكرايناداعى داعدارىس قاشان جانە قالاي اياقتالاتىنىن بولجاۋ كۇننەن-كۇنگە قيىنداپ بارادى.