ەلىمىزدىڭ 11 وڭىرىندە تۇرعىندار تسيفرلى تەلەۆيزيا تەحنولوگياسىن تۇتىنىپ وتىر. بۇل تۋرالى قر اقپارات جانە قوعامدىق دامۋ ءمينيسترى اسقار ۋماروۆ ايتتى, دەپ حابارلايدى Egemen.kz.
«2021 جىلى مينيسترلىك قۇقىعى بۇزىلعان جۋرناليستەردىڭ قۇقىعىن قورعاۋ رەگلامەنتىن قابىلدادى. قۇجاتتى قوعام وكىلدەرىمەن, بۇقارالىق اقپارات قۇرالدارىمەن جانە ءتيىستى ورگاندارمەن بىرلەسىپ مۇقيات تالقىلادىق. ءتورت مىڭنان استام مامان سالالىق جۋرناليستيكا بويىنشا تاجىريبەدەن ءوتتى.
اتاپ ايتقاندا, مەديتسينالىق, ەكولوگيالىق, ءدىني جانە IT سالالارى بويىنشا ءتالىم الدى. جۋرناليستەردى اككرەديتتەۋدىڭ جاڭا قاعيدالارى بەكىتىلدى. سالاۋاتتى ءومىر سالتىن ناسيحاتتايتىن الەۋمەتتىك جارنامالاردى وتاندىق تەلەارنالاردا كورسەتۋ قاعيدالارى ناقتىلاندى», دەدى اسقار ۋماروۆ مينيسترلىكتىڭ القا وتىرىسىندا.
ونىڭ سوزىنە قاراعاندا, سالاداعى باستى ماسەلەنىڭ ءبىرى – وتاندىق بۇقارالىق اقپارات قۇرالدارىندا مەملەكەتتىك ءتىلدى قولدانىلۋى.
«بىلتىر العاش رەت «سوزتۇزەر. قاتە قولدانىستار سوزدىگى» سوزدىگى جارىق كوردى. بۇل جوبانىڭ قازاقتىلدى باق وكىلدەرىنە پايداسى كوپ بولادى دەپ ويلايمىن. تسيفرلى تەلەراديونى ەنگىزۋ جوباسىن ىسكە اسىرۋ بىلتىر دا جالعاستى. بۇگىندە 11 ءوڭىر تسيفرلى تەلەۆيزياعا تولىقتاي كوشتى», دەگەن مينيستر ەل تاۋەلسىزدىگىنىڭ 30 جىلدىعىن مەرەكەلەۋ اياسىندا 73 مەديا جوبا قولعا الىنعانىن اتاپ ءوتتى.
«پرەزيدەنتتىڭ تاپسىرماسىنا سايكەس, 2021 جىلى وتاندىق تەلەسەريالدار, دەرەكتى تاريحي فيلمدەر ءوندىرىسىن ۇلعايتۋعا دەن قويدىق. تەلەارنالاردان احمەت بايتۇرسىن ۇلى, قانىش ساتپاەۆ سەكىلدى ۇلت زيالىلارى تۋرالى سەريالدار كورسەتىلىپ, كورەرمەن كوزايىمىنا اينالدى.
الەۋمەتتىك ماڭىزى زور جوبالاردىڭ اراسىندا «Balapan» تەلەارناسى جانىنان اشىلعان ەرەكشە ءبىلىم بەرۋ قاجەتتىلىكتەرى بار بالالارعا ارنالعان انيماتسيا مەكتەبىنىڭ جۇمىسىن ايتقىم كەلەدى. بۇل جوبانىڭ ىسكە اسىرىلۋى بيىل دا ءوز جالعاسىن تابادى», دەدى مينيستر.