مەملەكەت باسشىسى قاسىم-جومارت توقاەۆ Nur Otan پارتياسىنىڭ كەزەكتەن تىس سەزىندە پارتيانىڭ الداعى دامۋ باعىتتارىن ايقىندادى. سونىڭ ىشىندە مەن ءبىر ماسەلەگە ايرىقشا توقتالعىم كەلەدى. پرەزيدەنت سەزدە سويلەگەن سوزىندە پارتيا مۇشەلەرى سىبايلاس جەمقورلىققا قاتىستى ءىس-قيمىل جۇمىستارىنا بەلسەنە قاتىسۋى كەرەك ەكەنىن ايتتى.
Nur Otan پارتياسى اتاۋىن وزگەرتپەي تۇرعاندا دا سىبايلاس جەمقورلىققا قارسى جۇمىستارعا اتسالىسقان. بۇعان ونداعى سىبايلاس جەمقورلىققا قارسى كەڭەستىڭ جۇمىس ىستەيتىنى ايقىن دالەل بولا الادى. باستاۋىش ورگانداردا, فيليالداردا كەڭەس, كوميتەت بولدى. ەندى سول ۋاقىتتاعى اتقارىلعان جۇمىستاردى جاڭعىرتىپ, جاڭا ءبىر اعىسىن كورسەتە بىلسەك, ناتيجە وزدىگىنەن كورىنەدى.
نەگىزى مۇنىڭ باعىتى بار, جوعارىدا اتاپ كەتكەن پارتياداعى سىبايلاس جەمقورلىققا قارسى كەڭەس پەن فيليالدارداعى باقىلاۋ كوميتەتتەرى جۇمىس ىستەپ تۇر. سول كەڭەس پەن كوميتەتتىڭ وكىلدەرى ەڭ الدىمەن پارتيانىڭ اتىنان ارنايى ورگاندارعا قاراۋعا جىبەرىلگەن جەمقورلىققا قارسى ىستەردى جەكە-جەكە باقىلاۋعا الۋى قاجەت. سونىمەن قاتار تاعى ءبىر ماڭىزدى جۇمىس, وسىنداي تەكسەرۋگە ىلىككەن ىستەردى بولدىرماۋدىڭ جولدارىن, ياعني الدىن الۋ شارالارىن ىسكە قوسقانى ءجون. بۇل جۇمىستار رەسمي كەزدەسۋلەر مەن ستسەناري الدىن الا جازىلىپ قويعان فورمالدى ءىس-شارالار ارقىلى ەمەس, جاندى تالقىلاۋلار مەن بەتپە-بەت ديالوگتەر ارقىلى ىسكە اسىرىلعانى ابزال. مىسالى, دەپۋتاتتار جەرگىلىكتى جەرلەرگە ىسساپارمەن ءجيى شىعادى, سول جۇمىس ساياحات سياقتى وتۋمەن, ەسەپ تولتىرۋمەن اياقتالماۋى كەرەك. ءاربىر وبەكتىنى ارالاۋ كەزىندە ناقتى ماسەلەلەر قارالىپ, تالقىعا سالىنىپ, تۇيتكىلدەردىڭ ءتۇيىنىن تارقاتۋدىڭ جولدارى ارنايى انىقتامادا تولتىرىلۋعا ءتيىس.
جالپى, شەتەلدىك پارتيالاردا «جەكە ءىس» دەگەن ۇعىم بار. جەمقورلىققا قاتىستى جەكە ادامداردىڭ ءىسى ەڭ الدىمەن پارتيانىڭ بيۋروسىندا نەمەسە باستاۋىش ۇيىمدارىندا قارالۋى قاجەت. قازىر كوبىنە جەكەلەگەن ادامدار پارتياعا ونداعى قىزمەتىن پايدالانۋ ءۇشىن مۇشە بولادى. قىزمەتىن پايدالانۋ سىبايلاستىققا سوقتىرۋى مۇمكىن. پارتيانىڭ ەرەجەلەرىن بۇزعان, سىبايلاس جەمقورلىققا قانداي دا ءبىر قاتىسى بار مۇشەلەرگە قاتاڭ شەشىمدەر قابىلدانۋى كەرەك. قاجەت بولسا, پارتيادان شىعارۋ, شەتتەتۋگە دەيىن بارۋعا بولادى. سوندا عانا ونىڭ مۇشەلەرى جەمقورلىقتان تازا بولۋعا ۇمتىلادى. ىرگەلى پارتيادا وسىنداي رۋح بولۋى قاجەت. سوندىقتان وزگەرىستەرگە بەت العان پارتياعا مۇشەلىككە قابىلداۋدىڭ ەرەجەسىنە دە وزگەرىستەر ەنگىزگەن ءجون. مۇشەلىككە ءوتىنىش بەرگەندە ۇمىتكەردىڭ پارتياعا كىرۋدەگى ماقساتى, پارتيانى دامىتۋداعى كەشەندى جوسپارلارى قوسا تاپسىرىلۋى كەرەك. ويتكەنى پارتياعا سان جاعىنان ەمەس, ساپالىق قۇرامدى وزگەرتەتىن كەز كەلدى.
داۋلەتكەرەي راحمەتۋللين,
«جاڭارۋ» سىبايلاس جەمقورلىققا قارسى جالپىۇلتتىق قوزعالىسىنىڭ باسشىسى