وتكەن جىلدىڭ 24 تامىزىندا جامبىل وبلىستىق «اق جول» گازەتىندە د.ا.قوناەۆ اتىنداعى حالىقارالىق قوردىڭ وبلىستىق بولىمشەسىنىڭ اتقارۋشى ديرەكتورى قيبات اسقاربەكتىڭ ء«ار ازامات ءوز ۇلەسىن قوسادى دەگەن سەنىمدەمىز» تاقىرىبىمەن ماقالاسى جاريالاندى.
وندا بىرقاتار زيالى قاۋىم وكىلىنىڭ جامبىل وبلىسى باسشىلىعىنا دىنمۇحامەد قوناەۆتىڭ 110 جىلدىعىنا وراي تاراز قالاسىندا ەسكەرتكىشىن ورناتۋ تۋرالى ۇسىنىس-حات جولداعانى جازىلعان بولاتىن. ۇسىنىس-حاتتى وبلىس باسشىلىعى دا قولداپ, ءتيىستى مەكەمەلەر وسى باعىتتاعى جۇمىستارىن باستاپ كەتكەن ەدى.
وسىدان كەيىن رەسپۋبليكالىق «ەگەمەن قازاقستان» گازەتىندە د.ا.قوناەۆتىڭ مونۋمەنتالدى ەسكەرتكىشىنە بايقاۋ جاريالانىپ, وعان الماتى, نۇر-سۇلتان, شىمكەنت, جەزقازعان قالالارى مەن قاراعاندى جانە جامبىل وبلىستارىنان بارلىعى 23 ونەر تۋىندىسى باق سىناعان-تىن. ءمۇسىن قولادان قۇيىلادى, بيىكتىگى – 4 مەتر, قۇنى 49 ملن تەڭگە, استىنداعى تۇعىرىنىڭ بيىكتىگى دە 4 مەتر, قۇنى 25 ملن تەڭگە دەپ بەلگىلەنگەن ەدى. سونداي-اق ەسكەرتكىشتى جەتكىزۋ, اينالاسىن اباتتاندىرۋ, ت.ب. جۇمىستارعا 10-15 ملن تەڭگە كەتەدى دەپ جوسپارلانعان بولاتىن.
قارجى جيناۋعا قوردىڭ جامبىل وبلىستىق بولىمشەسى باستاماشى بولدى. قوردىڭ قۇرمەتتى مۇشەسى, 94 جاستاعى ابىز اقساقال باتتال جاڭاباەۆ كاسىپكەر ازاماتتارعا ۇندەۋ جولداپ, زەينەتاقىسىنان ءبىرىنشى بولىپ قارجى سالدى. ەندى وسى ورىندى باستاما اياقسىز قالماسا ەكەن, ونىڭ تۇپكىلىكتى جۇزەگە اسۋىنا ەلىمىزدىڭ ازاماتتارى كوپ بولىپ كومەك قولىن سوزسا ەكەن دەگەن تىلەگىمىز بار. «كوپ تۇكىرسە – كول» دەپ بەكەر ايتىلماسا كەرەك. بۇگىندە بار ماسەلە قارجىعا تىرەلىپ تۇر.
ب.قوشماعانبەتوۆ,
تاراز قالاسىنىڭ تۇرعىنى
جامبىل وبلىسى