باس ۇيىمداعى ناۋرىز مەيرامى

نيۋ-يوركتە حالىقارالىق ناۋرىز مەيرامىنىڭ تويلانۋىنا ارنالعان سالتاناتتى ءىس-شارا بولىپ ءوتتى. بۇۇ اتىنان باس حاتشىنىڭ ءبىرىنشى ورىنباسارى يان ەلياسسون قۇتتىقتاۋ ءسوز سويلەدى. ول باتىس, ورتالىق جانە وڭتۇستىك ازيا, كاۆكاز, بالقان جانە تاعى باسقا وڭىرلەردە كوپ عاسىرلىق داستۇرگە اينالعان كوكتەمنىڭ وسى ءبىر كۇنىن تويلايتىن عالامشارىمىزدىڭ بارلىق حالقىنا ىستىق لەبىزىن ءبىلدىردى. سونداي-اق, اۋعانستان, ازەر­بايجان, ءۇندىستان, يران, يراك, قازاقستان, قىرعىزستان, پاكىستان, تاجىكستان, تۇركيا, تۇرىكمەنستان جانە وزبەكستاننىڭ تۇراقتى وكىلدەرى شاراعا قاتىسقان 400-دەن اسا قوناقتى ناۋرىز مەيرامىمەن قۇتتىقتادى. قاتىسۋشىلار ءىس-شارانى ۇيىمداستىرۋشى مەملەكەتتەردىڭ ارقايسىسىندا ناۋرىزدىڭ تويلانۋى تۋرالى فيلمدەردى تاماشالاي وتىرىپ, ۇلتتىق داستارقان تاعامدارىنان ءدام تاتتى, سالت-داستۇرلەرمەن جانە كوكتەم مەرەكەسىنىڭ ماعىناسىمەن تانىس­تى. 2009 جىلعى 30 قىركۇيەكتە ناۋرىز يۋنەسكو ادامزاتتىڭ بەيماتەريالدىق مادەني مۇراسى ءتىزىمىنىڭ قاتارىنا ەنگىزىلگەن بولاتىن. 2010 جىلعى 19 اقپاندا بۇۇ باس اسسامبلەياسىنىڭ 64-سەسسياسىندا ازەربايجان, ال­بانيا, اۋعانستان, ءۇندىستان, يران, قازاقستان, قىرعىزستان, ماكەدونيا, تاجىكستان, تۇركيا جانە تۇرىكمەنستان باستامالارىمەن «حالىقارالىق ناۋرىز كۇنى» قارارى قابىلدانعان ەدى. «ەگەمەن-اقپارات».