پرەمەر-ءمينيستردىڭ ورىنباسارى گۇلشارا ابدىقالىقوۆا باستاعان دەلەگاتسيا سولتۇستىك قازاقستان وبلىسىندا بىرقاتار مەكەمە-ۇيىمداردى ارالاپ, جولداۋ تالاپتارى بويىنشا ىسكە اسىرىلىپ جاتقان شارالارمەن تانىستىردى.
ادام دەنساۋلىعى – بارىنەن قىمبات
وڭىرىمىزگە جۇمىس ساپارىمەن كەلگەن پرەمەر-ءمينيستردىڭ ورىنباسارى گۇلشارا ابدىقالىقوۆا, دەنساۋلىق ساقتاۋ ءمينيسترى ساليدات قايىربەكوۆا جانە وبلىس اكىمى سامات ەسكەندىروۆ م.جۇماباەۆ اۋدانىنىڭ ورتالىعى بۋلاەۆ كەنتىندە پايدالانۋعا بەرىلگەن ەمحانانىڭ اشىلۋ سالتاناتىنا قاتىستى. جاڭا نىسان «100 مەكتەپ, 100 اۋرۋحانا» باعدارلاماسى شەڭبەرىندە جۇزەگە اسىرىلدى. ول ءۇشىن رەسپۋبليكالىق قازىنادان 1,5 ميلليارد تەڭگە ءبولىنىپ, جارتى ميلليارد تەڭگەگە وسى زامانعى مەديتسينالىق قۇرال-جابدىقتار ورناتىلدى. كۇنىنە 250 ناۋقاسقا دەيىن قابىلداۋعا قاۋقارلى ەمحانانىڭ اشىلۋىندا سويلەگەن گ.ابدىقالىقوۆا ەلباسىنىڭ تىكەلەي باستاماسىمەن ىسكە اسىرىلىپ جاتقان باعدارلاما 2016 جىلى تولىق ورىندالاتىنىن, سوعان سايكەس اۋىلدىق جەرلەردە مەديتسينالىق قىزمەت ساپاسىنىڭ جاقسارعانىن, بۇل باعىتتا الدا كوپ جۇمىستار كۇتىپ تۇرعانىن جەتكىزدى.
ورتالىق اۋرۋحانانىڭ باس دارىگەرى ۆالەري ۋۆاروۆ مارتەبەلى قوناقتاردى دەنساۋلىق ساقتاۋ سالاسىنىڭ جايىمەن تانىستىردى. بۇگىندە ەمحانادا 45 دارىگەر, 67 مەيىربيكە جۇمىس ىستەيدى. بۇدان تىسقارى ورتالىق اۋرۋحانانىڭ قارجىلىق ەسەبىنەن 4 مامان دايارلانۋدا. بيىل «ديپلوممەن – اۋىلعا!» باعدارلاماسى اياسىندا تاعى بەس جوعارى ءبىلىمدى دارىگەر كەلمەك. بارلىق بولىمشەلەرگە شەتەلدىك قوندىرعىلار ورناتىلعان.
بىلتىر وبلىستىڭ دەنساۋلىق ساقتاۋ ۇيىمدارى 900 ميلليون تەڭگەنىڭ زاماناۋي مەديتسينالىق قۇرال-جابدىقتارىن الىپ, ءتيىمدى قولدانۋدىڭ ارقاسىندا اسا قاتەرلى اۋرۋلاردىڭ, انا ءولىمىنىڭ تومەندەگەنى بايقالادى.
پرەمەر-ءمينيستردىڭ ورىنباسارى باس دارىگەرلەردىڭ قاتىسۋىمەن وتكەن اكتيۆتە ەلباسىنىڭ قازاقستاندىقتاردىڭ ءومىر ءسۇرۋ ۇزاقتىعىن 80 جاسقا دەيىن جەتكىزۋ مىندەتىن قويعانىن ايتا كەلىپ, بىرقاتار تاپسىرمالار جۇكتەدى. وبلىستا جۇرەك-قان تامىرلارى اۋرۋلارى ءالى باسەڭدەر ەمەس. بالا تۋ كورسەتكىشى تومەن. جوعارى ءبىلىمدى دارىگەرلەردىڭ جەتىسپەۋشىلىگى سەزىلەدى.
دەنساۋلىق ساقتاۋ ءمينيسترى س.قايىربەكوۆا مەن ايماق باسشىسى س.ەسكەندىروۆ ءوزارا ىنتىماقتاستىق تۋرالى مەموراندۋمعا قول قويدى.
ەڭبەكاقى تولەۋدىڭ جاڭا جۇيەسى
اكىمدىكتىڭ ءماجىلىس زالىندا پرەمەر-ءمينيستردىڭ ورىنباسارى گ.ابدىقالىقوۆا مەن وبلىس اكىمى س. ەسكەندىروۆتىڭ قاتىسۋىمەن الەۋمەتتىك سالا قىزمەتكەرلەرىنىڭ جيىنى ءوتتى. وعان ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا, ءبىلىم جانە عىلىم ءمينيسترى اسلان ءسارىنجىپوۆ, دەنساۋلىق ساقتاۋ ءمينيسترى ساليدات قايىربەكوۆا قاتىسىپ, جولداۋدىڭ باسىم قاعيداتتارى ءتۇسىندىرىلدى. 2015 جىلعى 1 شىلدەدەن باستاپ تولەنەتىن ەڭبەكاقىنىڭ جاڭا جۇيەسىنە قاتىستى كەلەلى اڭگىمە قوزعالدى.
ول جونىندە ت.دۇيسەنوۆا كەڭىنەن ءتۇسىندىرىپ بەردى. ەلباسى تاپسىرمالارىنا سايكەس ەلىمىزدە ازاماتتىق قىزمەتشىلەرگە ەڭبەكاقىنىڭ جاڭا جۇيەسى كەلەسى جىلدان قولدانىلىپ, ءۇش كەزەڭدە جۇزەگە اسىرىلادى. ءبىرىنشى كەزەڭدە ازاماتتىق قىزمەتشىلەردىڭ بىلىمىنە, بىلىكتىلىگىنە, اتقاراتىن جۇمىسىنىڭ كۇردەلىلىگىنە بايلانىستى تولەنەدى. بۇل ورايدا, قىزمەتشىلەردىڭ لاۋازىمىن باسقارۋشى, نەگىزگى, اكىمشىلىك-شارۋاشىلىق جانە تەحنيكالىق پەرسونال دەپ 4 ساناتقا ءبولۋ قاراستىرىلعان. جاڭا ەڭبەكاقى تولەۋ جۇيەسىنىڭ ەنگىزىلۋىنە بايلانىستى جالاقى ارتۋى سارالانادى. جولداۋدا اتاپ كورسەتىلگەندەي, دەنساۋلىق ساقتاۋ سالاسىنىڭ نەگىزگى قىزمەتكەرلەرىنىڭ ەڭبەكاقىسى – 28, الەۋمەتتىك قورعاۋدا – 40, ءبىلىم بەرۋ سالاسىندا – 29 پايىزعا كوتەرىلەدى. ەكىنشى كەزەڭدە ەڭبەكاقى تولەۋدىڭ ىنتالاندىرۋشى كومپونەنتتەرى ەنگىزىلىپ, جۇمىستىڭ تۇپكى ناتيجەسى, كورسەتىلەتىن قىزمەتتىڭ سانى مەن ساپاسى باستى ولشەمگە الىنادى. ءۇشىنشى كەزەڭدە ازاماتتىق قىزمەتشىلەرگە وڭىردەگى ءومىردىڭ ناقتى باعاسىنا قاراي سارالانعان اقى تولەۋ تيىمدىلىگى مەن مۇمكىندىگى قاراستىرىلادى. بيىل ەڭ تومەن ەڭبەكاقى ەسەپتەۋدىڭ عىلىمي نەگىزدەلگەن ادىستەمەسىن ازىرلەۋدى اياقتاپ, تالقىلاۋعا شىعارۋ كوزدەلىپ وتىر.
تامارا قاسىمقىزى زەينەتاقى, الەۋمەتتىك تولەمدەر سالاسىنداعى وزگەرىستەرگە دە توقتالدى.
جۇمىسسىزدىقتى ازايتاتىن باعدارلاما
حالىقتىڭ الەۋمەتتىك-ەكونوميكالىق الەۋەتىنىڭ باسىم باعىتتارىن بەلگىلەپ بەرگەن باستى قۇجاتتى ءتۇسىندىرۋ بارىسىندا مۇمكىندىگى شەكتەۋلى جاندار ماسەلەسىنە ەرەكشە نازار اۋدارىلدى. ەڭبەك جانە حالىقتى الەۋمەتتىك قورعاۋ ءمينيسترى ت.دۇيسەنوۆانىڭ «نۇر وتان» پارتياسىنىڭ فيليالىندا وتكەن جۇزدەسۋىندەگى ءسوزى وسى باعىتتا ءوربىدى.
– ەلباسىنىڭ ۇكىمەتتىڭ كەڭەيتىلگەن وتىرىسىندا بەرگەن تاپسىرمالارىنا سايكەس قوعامداعى ءالجۋاز توپتاردىڭ بارلىق ساناتتارىنا تولەنەتىن جاردەماقىنى ارتتىرۋدى كوزدەيتىن زاڭ جوباسى پارلامەنتتىڭ قاراۋىنا بەرىلدى. بيىل 1 ساۋىردەن زەينەتاقى – 14, باسقا الەۋمەتتىك تولەمدەر 12 پايىزعا كوبەيەدى. 2015 جىلدىڭ 1 شىلدەسىنەن باستاپ مۇگەدەكتىگىنە جانە اسىراۋشىسىنان ايىرىلعانىنا بايلانىستى بەرىلەتىن جاردەماقى كولەمى 25 پايىزعا ارتادى, دەي كەلىپ, رەسپۋبليكا بويىنشا 1200-دەن استام نىساننىڭ مۇگەدەكتەرگە بەيىمدەلەتىنىنە توقتالدى. قىزىلجار وڭىرىندە وسىنداي 70 نىسان جوسپارلانعان. كەمتار ادامداردى جۇمىسپەن قامتۋ جايى دا جان-جاقتى ويلاستىرىلعان. قازىر ەلىمىزدە 400 مىڭداي ەڭبەككە جارامدى مۇگەدەك بولسا, ولاردىڭ بەستەن ءبىرى جۇمىسقا تارتىلعان.
مينيستر «جۇمىسپەن قامتۋ جول كارتاسى-2020» باعدارلاماسىندا مۇگەدەك جاندارعا جەڭىلدىكتەر قاراستىرىلعانىن جەتكىزدى. وسى جوبا شەڭبەرىندە 2,5 جىلدا 153 مىڭ ادام جۇمىسقا ورنالاستىرىلعان.
ءومىر ەسقالي,
«ەگەمەن قازاقستان».
سولتۇستىك قازاقستان وبلىسى.