قازاقستان رەسپۋبليكاسى پارلامەنتى سەناتىنىڭ توراعاسى قاسىم-جومارت توقاەۆ ەۋروپالىق پارلامەنتتىڭ دەپۋتاتتارى ەليزابەت يەگگل مەن دانيەل ۆان دەر ستۋپتى قابىلدادى, دەپ حابارلادى وسى پالاتانىڭ ءباسپاسوز قىزمەتى.
مەيمانداردىڭ ءوتىنىشى بويىنشا ق.توقاەۆ قازاقستان ساياسي جۇيەسىندەگى سەناتتىڭ ءرولى, ەلىمىزدەگى ساياسي پارتيالاردىڭ قىزمەتى, ۇلتارالىق كەلىسىمنىڭ نەگىزدەرى تۋرالى اڭگىمەلەدى. ول مەملەكەتتىڭ كۇن تارتىبىندەگى ادام قۇقىقتارىن قامتاماسىز ەتۋ جونىندەگى جۇمىستاردىڭ داۋسىز باسىمدىعىن اتاپ ءوتتى.
ەۋروپالىق وداقپەن ىنتىماقتاستىق ماسەلەلەرىنە قاتىستى سەنات توراعاسى قازىرگى كەزدە قازاقستان ەۋروپا وداعىمەن كەڭەيتىلگەن ارىپتەستىك جانە ىنتىماقتاستىق تۋرالى جاڭا كەلىسىم ازىرلەۋگە جانە قول قويۋعا ەرەكشە ءمان بەرەتىنىن اتاپ ءوتتى.
اڭگىمە بارىسىندا ەقىۇ پارلامەنتتىك اسسامبلەياسى اياسىنداعى ءوزارا ءىس-قيمىل, گااگادا وتكەن يادرولىق قارۋسىزدانۋ جونىندەگى ءۇشىنشى جاھاندىق سامميت قورىتىندىلارى, پرەزيدەنت ن.نازارباەۆتىڭ «قازاقستان-2050» ستراتەگياسىن ىسكە اسىرۋ ماسەلەلەرى دە قوزعالدى.