ەل پرەزيدەنتكە سەنىم ارتادى

ساياسي رەفورمالاردىڭ ما­ڭىزى جوعارى. ماسەلەن, مەم­لەكەت باسشىسى ءبىر سوزىندە ەل بايلىعىنىڭ جارتىسىنا جۋى­عى 162 ادامنىڭ يەلىگىندە ەكەنىن ايتتى. ال ولاردىڭ قارا­ماعىندا ىقپالدى ونداعان, جۇزدەگەن كومپانيا مەن بانك بار جانە بۇلار ەكونوميكالىق تۇرعىدان عانا ەمەس, ساياسي تۇر­عىدان دا ۇلكەن كۇشكە يە. بەلگىلى ءبىر دەڭگەيدە ۇكىمەتكە دە ىقپالىن جۇرگىزە الاتىنى بەلگىلى. پارلامەنتتە سولاردىڭ مۇددەسىن قورعايتىن ادامدار بار. سوندىقتان قازىر­گى ۇكىمەتتىڭ پرەزيدەنت اتا­عان ىقپالدى توپتىڭ ەكو­نو­ميكالىق, قارجىلىق مۇددە­سى­نە قارسى جۇمىس ىستەۋى قيىن­داۋ. وليگوپوليالىق, مونوپو­ليالىق جاعدايىمەن كۇرەسۋگە پارمەنى جەتپەيدى.

بىرىنشىدەن, ۇكىمەتتىڭ ساياسي ەرىك-جىگەرى تومەن. ولاردى حالىق سايلاعان جوق. ەكىنشىدەن, قازىرگى ۇكىمەتتىڭ 70-80 پايىزى بۇرىنعى جۇيەدە جۇرگەن ادامدار. ال ەسكى ادامدارمەن جاڭا قازاقستان قۇرا المايمىز.

Qazaqstan ۇلتتىق ارناسىنا بەرگەن سۇحباتىندا پرەزيدەنت وسى ماسەلەگە توقتالدى. كادر تاپشى دەگەن وي ايتتى. بۇرىن­عى كادرلاردى بىردەن الىپ تاستاۋعا تاعى بولمايتىنىن جەتكىزدى. شىندىعىندا سولاي. دەگەنمەن ولاردىڭ ىشىندە دە مەملەكەتشىل, حالىقشىل قىز­مەتكەرلەر بار. سولارعا مۇم­كىندىك بەرىلۋى كەرەك.

مەنىڭشە, ءبىر-بىرىمەن تەڭ ءارى ءبىر-ءبىرىن قاداعالاپ وتىراتىن ساياسي باسقارۋ جۇيەسى قۇرىلۋى كەرەك. ول ءۇشىن ساي­لاۋ تۋرالى زاڭدى قايتا قاراۋ كەرەك. سايلاۋ ءادىل ءوتۋى كەرەك. بۇعان دەيىنگى ساياسي شارا­نىڭ قالاي ءوتىپ كەلگەنى بارشا­عا ءمالىم. حالىقتىڭ سايلاۋ جۇ­يە­سىنە دەگەن سەنىمىن كوتەرۋ ما­ڭىز­دى. حالىق ءوز وكىلدەرىن ماجى­لىستەن باستاپ وبلىستىق, اۋدان­دىق ماسليحاتقا دەيىن ساي­لاۋ قۇقىعىنا يە بولۋى قاجەت.

بۇدان سوڭ پارتيالاردى تىركەۋدى جەڭىلدەتۋ كەرەك. كەيبىر شەكتەۋلەر اقىلعا سىيمايدى. مەنىڭشە, پارتيالاردان قورقۋدىڭ قاجەتى شامالى. قازىر قوعامدا ءتورت-بەس توپتىڭ پارتيا قۇرۋعا تال­پىنىپ جۇرگەنىن بايقاپ وتىر­مىز. سولارعا مۇمكىندىك بەرىلۋى كەرەك. قولدان جاسالعان وپپو­زيتسيالىق پارتيا­لاردان گورى, جاڭادان قۇرىلعان كىشى­گىرىم پارتيالاردىڭ ىقپا­لى مىقتى بولماق. ولارعا پار­لامەنتتەن ماندات ءتيۋى كەرەك.

بۇدان قورقۋدىڭ قاجەتى جوق, نەگىزگى بيلىك ءبارىبىر Nur Otan-نىڭ قولىندا بولادى. حالىقتىڭ ءبىرشاما بولىگى ونسىز دا قاسىم-جومارت توقاەۆتى قولدايدى. ويتكەنى ەل قازىرگى پرە­زيدەنتكە زور سەنىم ارتىپ وتىر. تۇراقتىلىقتى قالاي­تىنداردىڭ بارلىعى دەرلىك Nur Otan-عا داۋىس بەرەدى. سون­دىق­تان وزگە پارتيالار بيلىك پار­تياسىن ىعىستىرىپ تاستايدى دەگەننەن ۇرەيلەنۋدىڭ قاجەتى جوق.

سونداي-اق پارلامەنت پالاتالارى جونىندە دە ويلانۋ كەرەك. سەبەبى ەلدەگى حالىقتىڭ سانى از.

سوت جۇيەسىنە دە رەفورما كەرەك. وڭىرلەردەگى سۋديالاردى جەرگىلىكتى ءماسليحات دەپۋتاتتارى, جوعارعى سوت سۋديالارىن ءماجىلىس سايلاۋعا ءتيىس. قازىر­گى جاعداي بايقاتقانداي, ولار­دى تاعايىنداۋ وڭدى قادام ەمەس. سۋديالار دا پارلامەنت­تىڭ, ءماسليحاتتىڭ الدىندا ەسەپ بەرۋى كەرەك.

مىنە, وسىنداي ىرگەلى سايا­سي رەفورمالار جۇزەگە اسى­رىل­­عاندا عانا ەكونومي­كالىق رە­فور­مالار وڭ ناتيجە بەرەدى.

تالعات دەمەسىنوۆ,

ەكونوميست