دۇنيەدە ەڭ اياۋلى كورىنىس – ءسابيدىڭ العاشقى ادىمىن باسقان ءساتى. ۇلكەن ومىرگە قاراي جىلجىعان كىشكەنتاي بالدىرعاننىڭ ەڭبەگىندە انانىڭ جان تولعانىسى جاسىرىنىپ جاتادى. اتا-انانىڭ باۋىرىنان ۇزاپ شىققان نارەستەنىڭ ەرتەڭگى ءومىرى ءاربىر باسقان قادامىنان باستاۋ السا كەرەك. جولبەلگىسىز جولداردا ءومىر باعدارشامىنا قاراماي العا ۇمتىلعان بالانىڭ تالابىندا تاعدىرىنىڭ ءمورى بار.
ءدال وسى ساتتە سۋرەتشى ومىرگە ءبىر ءسات ءسابي كوزىمەن قاراعان سەكىلدى. ۆەرتيكال فورماتتى تاڭداي وتىرىپ, كومپوزيتسيانى جوعارعى راكۋرستان باقىلاۋ ارقىلى كەنەپكە قوندىرعان قىلقالام شەبەرى قۇرالاي ۇمبەتوۆا بىزگە وسىنداي تاماشا كارتينا سىيلادى. 2011 جىلى جازىلعان «قادام» شىعارماسى – اۆتوردىڭ انالىق مەيىرىمىنەن تۋعان ەرەكشە تۋىندى.
سۋرەتكەر ۇلىنىڭ قۇتتى قادامىنا قاراپ ءومىر جولىندا كەزدەسەر بەلەستەردى وڭاي اتتاپ وتەرىنە سەنىم ءبىلدىرىپ تۇرعانداي. قىم-قيعاش سىزىقتارمەن شاقپاقتانا تۇسكەن ەدەن مەن بيىك مۇنارالى كوپقاباتتى ۇيلەر سيلۋەتى جانە قالىقتاپ كوشكەن كوك اسپان كەنەپ بەتىندە كەرىلە تۇسەدى. ەدەندە ەڭبەكتەپ بارا جاتقان بالا ءبىر ساتتە كوككە, بەلەسكە ورمەلەپ بارا جاتقانداي اسەر قالدىرادى. ءسابيدىڭ بۇل ارەكەتىن جانىندا قيمىلسىز جاتقان دوپ قانا توقتاتقانداي. دوڭگەلەك ءپىشىن قوزعالىستىڭ سيمۆولى.
باقساڭىز, دوپتىڭ قوزعالىسسىز بەينەسى كورەرمەن كوزىن ونىڭ جازىقتىقتا ورنالاسقانىنا يلاندىرادى. كوزىمىزدى ەدەندەگى سىزىقتاردى بويلاي كەنەپتىڭ جوعارعى جاعىنا قاراي بالامەن بىرگە جىلجىتساق جازىقتىقتىڭ كەڭىستىككە ۇلاسقان ءساتىن تاماشالاپ, قيالعا ەرىك بەرەمىز. جازىقتىق كەڭىستىككە ۇلاسىپ, تۋىندىدا ولاردىڭ يلليۋزياسى كەزەك-كەزەك كورەرمەن نازارىن اۋلايدى.
قۇرالاي ۇمبەتوۆا شاقپاقتى لينوليۋم بەدەرىن ءساتتى پايدالانا وتىرىپ, ەدەن مەن اسپاننىڭ 3D كورىنىسى ارقىلى پەرزەنتىنىڭ بولاشاق عۇمىرىنىڭ ب ۇلىڭعىر بولماۋىن تىلەيدى. اسپانىنىڭ اشىق, جولىنىڭ دارا, الار بەلەسىنىڭ ايقىن بولعانىن قالايتىنىن بايقايمىز. بۇل تەك سۋرەتشىنىڭ ەمەس, بارلىق انانىڭ اسقاق ارمانى ەكەنى انىق. سۋرەتكەر ومىرگە ءسابي اكەلگەن اياۋلى جانداردىڭ كوڭىل تولقىنىسىن جەتكىزىپ تۇر.