جەزقازعان قالاسىندا مۇمكىندىگى شەكتەۋلى جاندارعا دەگەن جاناشىرلىق جاڭا دەڭگەيگە كوتەرىلدى. اتاپ ايتقاندا, شاھارداعى جاستار سارايىندا ىشىنە 80 ادام ەركىن سىيىپ, سپورت جاتتىعۋلارىن جاساي الاتىن ورتالىق پايدالانۋعا بەرىلدى.
«شەكسىز مۇمكىندىكتەر» جوباسى اياسىندا مۇمكىندىگى شەكتەۋلى بالالارعا ارنالعان بۇل ورتالىقتا سپورتتىڭ فۋتبول, پاۋەرليفتينگ, شاحمات, دويبى, توعىز قۇمالاق, ۇستەل تەننيسى جانە ساداق اتۋ سياقتى تۇرلەرى بويىنشا سەكتسيالار جۇمىس ىستەيدى.
سپورت ورتالىعىنىڭ اشىلۋ سالتاناتىندا ءسوز سويلەگەن جەزقازعاننىڭ اكىمى قايرات ءابساتتاروۆ مۇمكىندىگى شەكتەۋلى جاندار ءۇشىن ارالاساتىن ورتاعا دەگەن قولجەتىمدىكتىڭ بولۋى اسا ماڭىزدى قاجەتتىلىك ەكەنىن اتاپ ءوتتى.
– بۇل ورتالىقتا ولار سپورتپەن شۇعىلدانىپ قانا قويماي, وزدەرىنىڭ قۇربى-قۇرداستارىمەن ارالاسىپ, جاڭا دوستار دا تابا الادى. سپورت – مۇمكىندىگى شەكتەۋلى جاندارعا بەلسەندى دە تولىققاندى ءومىر سۇرۋگە, رۋحتى تۇسىرمەۋگە جانە جەڭىسكە جەتۋگە مۇمكىندىك بەرەتىن كەرەمەت كۇش. سوندىقتان ورتالىقتىڭ كوپ ۇزاماي قالاداعى سۇيىكتى ورىنداردىڭ بىرىنە اينالاتىنىنا سەنىمدىمىن, – دەدى ول.
جوعارىدا ايتىپ وتكەنىمىزدەي, اتالعان سپورت ورتالىعىنان باسقا جەزقازعاندا ەرەكشە قاجەتتىلىكتەرى بار 55 بالا شۇعىلداناتىن «ايالى الاقان» كۇندىزگى بەيىمدەۋ ورتالىعى جۇمىس ىستەيدى. سونىمەن بىرگە قالادا اۋتيستىك سپەكترى بۇزىلعان بالالارعا ارنالعان تاعى ءبىر ورتالىق اشۋ جوسپاردا بار.
ال جاڭادان اشىلعان ورتالىقتا ارنايى وقۋ كۋرسىنان وتكەن سەگىز جاتتىقتىرۋشى ەرەكشە قاجەتتىلىگى بار جانداردى سپورتتىڭ قىر-سىرىنا باۋليتىن بولادى.
جەزقازعان