فۋتبول. استانادا ەۋروپا فۋتبول قاۋىمداستىعىنىڭ (ۋەفا) كەزەكتى XXXVIII كونگرەسى وتەدى.
جيىندا ەۋروپاداعى فۋتبولدى دامىتۋ ماسەلەسى قارالادى. وعان فيفا پرەزيدەنتى يوزەف بلاتتەر قاتىسىپ, ءسوز سويلەيدى. سودان كەيىن ول قىرعىزستان مەن تاجىكستانعا ءتورت كۇندىك رەسمي ساپارمەن بارادى. وسى ەلدەردە ول بىرنەشە فۋتبول الاڭدارىنىڭ اشىلۋىنا قاتىسادى دەپ كۇتىلۋدە.
تەننيس. جاقىندا قازاقستان قۇراماسى دەۆيس كۋبوگىنىڭ شيرەك فينالىندا شۆەيتساريا كومانداسىمەن كەزدەسەتىن قۇرامدى جاريالادى.
بۇل ماتچقا قازاقستاننىڭ ۇلتتىق كومانداسىنىڭ كاپيتانى دياس دوسقاراەۆ, ميحايل كۋكۋشكين, اندرەي گولۋبەۆ, الەكساندر نەدوۆەسوۆ پەن ەۆگەني كورولەۆتى شاقىردى. كەزدەسۋ 4-6 ءساۋىر كۇندەرى جەنەۆادا وتەدى.
اۆتوراللي. «جىبەك جولى – 2014» ءرالليىنىڭ ءۇش كەزەڭى قازاقستان اۋماعىندا وتەدى.
جارىستار 4 شىلدەدە ماسكەۋدەگى قىزىل الاڭدا باستالىپ, 12 ءشىلدەدە استانادا اياقتالادى. «ءماسكەۋ – چەبوكسارى – قازان – بۋگۋلما – ورال – بەينەۋ – اتىراۋ – استراحان» باعىتىندا وتەتىن جولدىڭ جالپى ۇزىندىعى – 5 مىڭ شاقىرىم.
«جىبەك جولى» 2009 جىلدان بەرى رەسەي, قازاقستان جانە تۇرىكمەنستان اۋماعىندا وتكىزىلىپ كەلەدى.
حوككەي. قاراعاندىنىڭ «سارىارقا» كومانداسى كراسنوداردىڭ «كۋبان» حوككەيشىلەرىن جەڭىپ, جوعارى حوككەي ليگاسى پلەي-وفف سەرياسىندا جارتىلاي فينالعا شىقتى.
بۇل ماتچتا «سارىارقا» ويىنشىلارى سىرت الاڭدا «كۋباندى» 3:0 ەسەبىمەن ۇتتى. ءسويتىپ, ءتورت جەڭىسكە دەيىن جالعاساتىن سەريادا قارسىلاستارىن 4:0 ەسەبىمەن ۇتقان قاراعاندىنىڭ كومانداسى جارتىلاي فينالعا جولداما الدى.
فريستايل. يتاليانىڭ كەزا ين ۆالمالەنكو قالاسىندا ەۋروپا كۋبوگىنىڭ قورىتىندى كەزەڭى ءوتتى.
وندا ايەلدەر اراسىندا شاڭعى اكروباتيكاسىنان وتكەن سىندا قازاقستاندىق جانبوتا الدابەرگەنوۆا ۇزدىك ۇشتىككە ەندى. كەلەسى كۇنى دە ول اكروباتيكالىق سەكىرۋدەن ۇزدىك ناتيجە كورسەتتى. ءسويتىپ, جالپى ەسەپتە 350 رەيتينگتىك ۇپاي جيناپ, ەكىنشى ورىندى يەلەندى.
تاەكۆوندو. تايۆاندا ءجاسوسپىرىمدەر مەن جاستار اراسىندا ءوتىپ جاتقان الەم چەمپيوناتىندا قازاقستان قۇراماسى العاشقى جۇلدەگە يە بولدى.
جاستار اراسىندا ارتۋر كيم 48 كيلو سالماقتا كۇمىس جۇلدەگەر اتاندى. وسىنىڭ الدىندا ءجاسوسپىرىمدەر اراسىندا وتكەن سىندا 48 كيلودا عالىمجان ەلشىباي ۇزدىك سەگىزدىككە ەنىپ, جاسوسپىرىمدەر اراسىندا وتەتىن وليمپياداعا جولداما الدى. بيىل وليمپيادا تامىزدا قىتايدا وتەدى.
گرەك-ريم كۇرەسى. كەشە الماتىداعى «دوستىق» سپورت كەشەنىندە قازاق حالقىنىڭ داڭقتى بالۋانى داۋلەت تۇرلىحانوۆتىڭ جۇلدەسى ءۇشىن ءداستۇرلى رەسپۋبليكالىق تۋرنير باستالدى.
وعان 1997-1999 جىلدارى تۋعان بالۋاندار قاتىسۋدا. تۋرنير بۇگىن كەشكە اياقتالادى. وسىنىڭ الدىندا قازاقتىڭ اتاقتى بالۋانى تۋعان جەرى شىعىس قازاقستان وبلىسىندا كوپسالالى بولات تۇرلىحانوۆ اتىنداعى سپورت كەشەنىن سالىپ بەرگەن بولاتىن.
باسكەتبول. «استانا» باسكەتبول كلۋبىنىڭ «ۆتب بىرىككەن ليگاسىنىڭ» پلەي-وفف كەزەڭىندەگى قارسىلاسى انىقتالدى.
ەندى 1/8 فينالدا ەلوردالىق كوماندا رەسەيدىڭ «نيجني نوۆگورود» كومانداسىمەن كەزدەسەدى. العاشقى ماتچ استانادا وتەدى. وسى سىندا قاي كوماندا ەكى رەت جەڭسە, شيرەك فينالعا شىعادى. ونىڭ كەلەسى اينالىمداعى قارسىلاسى «حيمكي» كومانداسى بولادى.
ۆولەيبول. تاراز قالاسىندا ۇلتتىق ليگا كوماندالارى اراسىندا وتكەن ەل چەمپيوناتى اياقتالدى.
«الماتى» كومانداسى التىن مەدال ءۇشىن وتكەن سوڭعى ويىندا ورالدىڭ «كوندەنسات-جايىقمۇناي» كلۋبىن 3:1 ەسەبىمەن ۇتىپ, بيىلعى قازاقستان چەمپيونى اتاندى. الماتىلىقتار وسىمەن ەل چەمپيونى اتاعىن كەزەكتى رەت جەڭىپ الدى. ەندى ولار ءساۋىر ايىندا كلۋبتىق كوماندالار اراسىندا ازيا چەمپيوناتىندا قازاقستان نامىسىن قورعايدى.
«ەگەمەن-اقپارات».