«نۇر وتان» پارتياسىنىڭ وبلىستىق فيليالىندا وتكىزىلگەن ەلباسى نۇرسۇلتان نازارباەۆتىڭ «قازاقستان جولى – 2050: ءبىر ماقسات, ءبىر مۇددە, ءبىر بولاشاق» اتتى حالىققا جولداۋىنداعى بەرىلگەن تاپسىرمالاردى ورىنداۋ ماقساتىندا مۇگەدەك جاندارعا الەۋمەتتىك قولداۋ كورسەتۋ ماسەلەسىنە ارنالعان كەڭەيتىلگەن كەڭەسكە اۋدان اكىمدەرىنىڭ ورىنباسارلارى, مۇگەدەك جاندارمەن ءتىكەلەي جۇمىس جاسايتىن مەملەكەتتىك ورگانداردىڭ باسشىلارى, بارلىق دەڭگەيدەگى ءماسليحاتتاردىڭ دەپۋتاتتارى, جۇمىسپەن قامتۋ مەكەمەلەرىنىڭ باسشىلارى, كاسىپوداق جەتەكشىلەرى, پارتيالاردىڭ, ۇكىمەتتىك ەمەس ۇيىمداردىڭ وكىلدەرى قاتىستى.
كەڭەستى قىسقاشا ءسوز سويلەپ اشقان پارتيانىڭ وبلىستىق فيليالىنىڭ توراعاسى, وبلىس اكىمى ارحيمەد مۇحامبەتوۆ ەلباسىنىڭ بيىلعى جولداۋىندا ەلىمىزدەگى مۇمكىندىگى شەكتەۋلى جانداردى جۇمىسقا ورنالاستىرۋعا كومەكتەسۋگە جانە ولاردىڭ بەلسەندى ءومىر سۇرۋىنە قولايلى جاعداي تۋعىزۋعا بايلانىستى ناقتى تاپسىرمالار بەرىلگەنىن, بۇل تاپسىرمالاردىڭ جاۋاپكەرشىلىگى نەگىزىنەن «نۇر وتان» پارتياسىنا جۇكتەلگەنىن تىلگە تيەك ەتە كەلىپ, پارتيانىڭ وسى ماقساتتا «كەدەرگىسىز كەلەشەك» اتتى مۇگەدەكتەردىڭ تۇرمىسىن جاقسارتۋعا باعىتتالعان يدەيانى قولعا العانىن, ونىڭ ءتورت باعىتتا جۇزەگە اسىرىلاتىنىن جەتكىزدى.
كەڭەستە مۇمكىندىگى شەكتەۋلى جانداردى قولداۋعا بايلانىستى بايانداما جاساعان وبلىس اكىمىنىڭ ورىنباسارى سارا نۇرقاتوۆا ەلباسى جولداۋىنداعى مۇگەدەكتەردى جان-جاقتى قولداپ, ولاردىڭ پروبلەمالارىن وڭ شەشۋگە بەرىلگەن تاپسىرمالاردىڭ وڭىردە قالاي ورىندالىپ جاتقانىنان حاباردار ەتتى. «نۇر وتان» پارتياسىنىڭ «كەدەرگىسىز كەلەشەك» جوباسى مۇگەدەكتەردى تۇراقتى ەڭبەك ورنىنا جۇمىسقا تۇرعىزۋ, مۇمكىندىگى شەكتەۋلى جاندارعا ەش كەدەرگىسىز جاعداي جاساۋ, مۇگەدەكتەردىڭ ماسەلەسىنە قوعام مەن بيزنەستىڭ نازارىن اۋداراتىنداي دارەجەدە اقپاراتتاندىرۋ جۇمىسىن كۇشەيتۋ, سونداي-اق, مۇگەدەكتەردىڭ قۇقىعىن قورعاۋدى جاقسارتاتىن ىقپالدى شارالار الۋدى قاراستىرادى. وبلىستا وسى ءتورت باعىت بويىنشا جوسپارلى جۇمىستار قولعا الىنۋدا. وبلىس اكىمىنىڭ ورىنباسارى سارا نۇرقاتوۆانىڭ ايتۋىنشا, مۇگەدەكتەردى جۇمىسقا ورنالاستىرۋدا وبلىس رەسپۋبليكادا الدىڭعى ورىنداردا ەكەن. تەك وسى جاڭا جوبا اياسىندا ۇستىمىزدەگى جىلدىڭ سوڭىنا دەيىن وبلىس بويىنشا ءالى دە 810 مۇگەدەكتى جۇمىسقا ورنالاستىرۋ كوزدەلگەن.
وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ باسشىسى التىنبەك امىرعاليەۆ عيماراتتاردى مۇگەدەك جانداردىڭ ءجۇرىپ-تۇرۋىنا بەيىمدەۋ جۇمىستارىنا بايلانىستى قالادا, اۋدانداردا قولعا الىنعان شارالاردى حابارلادى. ونىڭ ايتۋىنشا, 2600-گە جۋىق مەكەمە مەن ۇيىمداردىڭ 800-ءى عانا مۇگەدەك جاندارعا قولجەتىمدى كورىنەدى. قالعاندارىندا مۇمكىندىگى شەكتەۋلى جانداردىڭ كىرىپ-شىعۋى قيىندىق كەلتىرەدى. 700-دەن استام نىسانعا پاندۋس ورناتۋ كەرەك. بيىل 41 ميلليون تەڭگەگە 66 نىسانعا وڭتايلاندىرۋ جۇمىستارىن ءجۇرگىزۋ كوزدەلۋدە. دىبىستى جانە ساۋلەلى جاياۋ جۇرگىنشىلەر جولدارىن جانە باعدارشامدارىن ورناتۋعا دا قارجى بولىنگەن. وسى ارادا ءوڭىر باسشىسى ارحيمەد مۇحامبەتوۆ مۇگەدەك جاندار ءۇشىن كاسىپورىنداردا بولىنەتىن 3 پايىزدىق كۆوتانى قامتاماسىز ەتۋگە اۋدان اكىمدەرى تىكەلەي جاۋاپ بەرەتىنىن, ال جاڭا نىسانداردى سالۋ بارىسىندا پاندۋستاردىڭ بولۋىن تەكسەرۋ كەرەكتىگىن جانە ونىڭ بولۋىنىڭ جولدارىن قاراستىرۋ قاجەتتىگىن قاداپ ايتتى.
كەڭەستى قورىتىندىلاعان وبلىس اكىمى اۋدان اكىمدەرىنە, مەملەكەتتىك ورگاندارعا مۇمكىندىگى شەكتەۋلى جاندارعا ۇدايى قولداۋ كورسەتۋگە ناقتى تاپسىرمالار بەردى.
سونىمەن ءبىر مەزگىلدە «نۇر وتان» پارتياسىنىڭ «كەدەرگىسىز كەلەشەك» جوباسى اياسىندا بوس جۇمىس ورىندارى جارمەڭكەسى ۇيىمداستىرىلدى. جارمەڭكەگە 98 جۇمىس بەرۋشى, ءۇش جۇمىسقا ورنالاستىرۋ اگەنتتىگى قاتىسىپ, 800-گە جۋىق بوس جۇمىس ورنى ۇسىنىلدى. سونداي-اق, جارمەڭكە اياسىندا ۇيىمداستىرىلعان كورمەدە «جۇمىسپەن قامتۋ-2020» باعدارلاماسى اياسىندا نەسيە الىپ, شارۋاسىن دوڭگەلەتىپ وتىرعان ازاماتتار مەن قولونەرمەن اينالىساتىن مۇمكىندىگى شەكتەۋلى جاندار ءوز تاۋارلارىن كوپشىلىككە ۇسىندى. ال بوس جۇمىس ورىندارى جارمەڭكەسىندە ءبىراز ادام جۇمىستى بولىپ قالدى.
ساتىبالدى ءساۋىرباي,
«ەگەمەن قازاقستان».
اقتوبە وبلىسى.