قاراعاندى وبلىسىنىڭ تۇرعىنى كورشىسىنىڭ ۇيىنە كىرىپ, 3 ملن تەڭگەگە جۋىق اقشاسىن ۇرلاپ كەتكەن, دەپ حابارلايدى Egemen.kz Polisia.kz سايتىنا سىلتەمە جاساپ.
وتكەن جىلدىڭ 22 قاراشاسىندا قاراعاندى وبلىسى قارقارالى اۋدانىنىڭ پوليتسيا بولىمىنە ءبىر ەلدى مەكەننىڭ 29 جاستاعى تۇرعىنى ارىزدانعان. ارىزدانۋشىنىڭ ۇيدە جوقتىعىن پايدالانىپ, بەلگىسىز بىرەۋ ۇيگە كىرىپ, اقشا ۇرلاپ كەتكەن. كەلتىرىلگەن شىعىن كولەمى 2,8 ملن تەڭگەنى قۇرادى.
پوليتسەيلەر قر قىلمىستىق كودەكسىنىڭ 188-بابى (ۇرلىق) بويىنشا قىلمىستىق ءىس قوزعادى.
10 اقپاندا جەدەل-ىزدەستىرۋ ءىس-شارالارىنىڭ بارىسىندا كريمينالدىق پوليتسيا قىزمەتكەرلەرى جابىرلەنۋشىمەن ءبىر كوشەدە تۇراتىن 24 جاستاعى جەرگىلىكتى تۇرعىندى انىقتادى. ول ۇرلانعان قاراجاتتى نەگىزىنەن زەرگەرلىك بۇيىمدار ساتىپ الۋعا جۇمساعانىن ايتىپ, كىناسىن مويىندادى.
ايعاقتاردىڭ ءبىر بولىگى تاركىلەندى. قازىرگى ۋاقىتتا تەرگەۋ امالدارى جۇرگىزىلۋدە.