پرەمەر-ءمينيستردىڭ ورىنباسارى ەرالى توعجانوۆ ەكىباستۇزدا قيىن ومىرلىك جاعدايعا تاپ بولعان وتباسىلاردى قولداۋ ماسەلەلەرى بويىنشا كەڭەس وتكىزدى, دەپ حابارلايدى Egemen.kz.
قازاقستاننىڭ ۆيتسە-پرەمەرى پاۆلودار وبلىسىنا جۇمىس ساپارىمەن باردى.
ەكىباستۇز قالاسىندا ەرالى توعجانوۆتىڭ توراعالىعىمەن حالىقتىڭ الەۋمەتتىك قورعالماعان توپتارىنا الەۋمەتتىك قورعاۋ جانە مەديتسينالىق كومەك كورسەتۋ جۇيەسىندە ورىن العان پروبلەمالار مەن ولاردى شەشۋ جولدارى تالقىلاندى.
كەڭەسكە جەرگىلىكتى جانە ورتالىق مەملەكەتتىك ورگانداردىڭ باسشىلارى قاتىستى. كەزدەسۋدە ۇزاق ۋاقىت قوعامنان وقشاۋ ءومىر سۇرگەن ءتورت بالامەن بولعان جاعداي بولەك تالقىلاندى.
قيىن ومىرلىك جاعدايعا تاپ بولعان وتباسى ەكىباستۇز پاتەرلەرىنىڭ بىرىنەن انىقتالدى. قازىر ولارعا جان-جاقتى قولداۋ كورسەتىلۋدە, ال قۇزىرەتتى ورگاندار كومەككە مۇقتاج بالالار مەن ولاردىڭ اتا-انالارى جەرگىلىكتى اتقارۋشى ورگاندار تاراپىنان نەلىكتەن نازاردان تىس قالعانىن ءتۇسىنۋ ءۇشىن تەرگەۋ جۇرگىزۋدە.
«بالالاردى الەۋمەتتىك قامسىزداندىرۋ, ولاردىڭ قۇقىقتارى مەن مۇددەلەرىن قورعاۋ مەملەكەتتىك ساياساتتىڭ باسىمدىعى بولىپ تابىلادى. ەلىمىزدە 6,3 ميلليون بالا بار, بۇل قازاقستان حالقىنىڭ 32%-ىن قۇرايدى. ءبىز ءار بالانىڭ ومىرىنە جاۋاپ بەرەمىز», دەدى پرەمەر-ءمينيستردىڭ ورىنباسارى.
ۆيتسە-پرەمەر ءبىر اي مەرزىمدە الەۋمەتتىك جانە مەديتسينالىق كومەككە مۇقتاج وتباسىلاردى انىقتاۋعا كىرىسۋدى, بالالاردىڭ تۇرعىلىقتى جەرى بويىنشا ەمحاناعا تىركەلۋىن قاداعالاۋ مۇمكىندىگىمەن ولاردىڭ قوزعالىسىن ەسەپكە الۋدىڭ ەلەكتروندىق كارتاسىن ەنگىزۋدى جانە ومىرلىك قيىن جاعدايعا تاپ بولعان ادامدارعا قولداۋ كورسەتۋ ماسەلەلەرى بويىنشا ۆەدومستۆوارالىق ءوزارا ءىس-قيمىل الگوريتمىن بەكىتۋدى تاپسىردى.