شىعىستىڭ قاي پۇشپاعىندا بولسىن, جورتقان اڭ, ۇشقان قۇس كوپ. بايقاپ وتىرساق, ولاردىڭ سوڭىنا تۇسكەن اڭشىلار, دۇرىسى براكونەرلەر از ەمەس. جۋىقتا پوليتسەيلەر تاعى دا براكونەرلىكپەن اينالىسىپ كەلگەن بىرنەشە توپتى ۇستادى. تاعى دا دەپ وتىرعانىمىز, وتكەن ايدا عانا سىلەۋسىن سوعىپ العاندارعا قاتىستى حاتتاما تولتىرىلعان ەدى.
قاسكويلەردىڭ ىزىنە تۇسكەن قۇقىق قورعاۋشىلار تاۋلىك بويى جۇمىس ىستەيتىن ارنايى ءموبيلدى توپتار قۇردى. بۇلار ءۇش اۋداندا براكونەرلىككە قاتىسى بار بىرنەشە توپتى انىقتادى. زاڭسىز اڭعا شىققان ازاماتتاردىڭ كولىكتەرىنەن تىركەلمەگەن قارۋ دا تابىلدى. بەسقاراعاي اۋدانىندا 29-42 جاس ارالىعىنداعى 4 ەر ادام ۇستالىپ, ولاردىڭ ءتورت ەلىك اتىپ العانى بەلگىلى بولدى. سونىمەن قاتار كولىك سالونىنان «سايگا» جانە «يج» ماركالى ەكى مىلتىق, پىشاقتار, دۇربىلەر جانە 7,62 جانە 12 كاليبرلى كوپتەگەن پاترون تابىلدى.
ال تارباعاتاي اۋدانىندا تىركەلمەگەن مىلتىقپەن جابايى قاباندى اتىپ قۇلاتقان 53 جاستاعى تۇرعىن ۇستالدى. رۇقساتسىز اڭ اۋلاعان ازاماتتان قارۋمەن قاتار وق-دارىلەر تاركىلەندى. ءۇشىنشى براكونەرلىك جاعداي بورودۋليحا اۋدانىندا ورىن العان. مۇندا ەكى ازامات اڭشىلىققا قاردا جۇرەتىن موتوشانامەن شىققان. جۇيرىك شانامەن ءجۇرىپ, قوس ەلىكتى قانجىعاعا باسىپتى. تەكسەرۋ كەزىندە «يج» ماركالى تەگىس ۇڭعىلى مىلتىق, وق-دارىلەر مەن پىشاقتار الىندى.
شىعىس قازاقستان وبلىستىق پوليتسيا دەپارتامەنتى باستىعىنىڭ ورىنباسارى تالعات شاياحمەتوۆتىڭ ايتۋىنشا, كۇدىكتى ازاماتتارعا قاتىستى اتالعان بارلىق فاكتىلەر بويىنشا قر قك-ءنىڭ 337-بابى (زاڭسىز اڭ اۋلاۋ) بويىنشا سوتقا دەيىنگى تەرگەۋ جۇرگىزىلۋدە. ونىڭ سانكتسياسى نەگىزىندە 5 جىلعا دەيىنگى مەرزىمگە باس بوستاندىقتارىنان ايىرۋ جازاسى كوزدەلگەن.
ءتارتىپ قاتال بولعانىمەن, تابيعاتقا زالال كەلتىرىپ جۇرگەن براكونەرلەر بوي بەرمەي تۇر. بالكىم زاڭدى الدە دە كۇشەيتۋ كەرەك پە, كىم ءبىلسىن؟! ايتەۋىر, زاڭسىز قارۋ اسىنىپ, كوز جانارى مولدىرەگەن ەلىكتەردى سۇلاتىپ سالىپ جۇرگەن ازاماتتاردىڭ بۇل ارەكەتتەرى اشتىقتان ەمەس, توقتىقتان ەكەنى ايتپاسا دا تۇسىنىكتى.
شىعىس قازاقستان وبلىسى