ۇلتتىق بانك ەل ەكونوميكاسىنىڭ بيىلعى ءوسىمىن 3,9-4,2 پايىز دەڭگەيىندە بولجايدى. بۇل تۋرالى ۇكىمەتتىڭ كەڭەيتىلگەن وتىرىسىندا قر ۇلتتىق بانك توراعاسى عالىمجان ءپىرماتوۆ ايتتى, دەپ حابارلايدى Egemen.kz.
«حالىقارالىق ۆاليۋتا قورىنىڭ باعالاۋى بويىنشا, 2021 جىلى جاھاندىق ىشكى جالپى ءونىمنىڭ ءوسۋ قارقىنى 40 جىلدان استام ۋاقىت ىشىندە ەڭ جىلدام بولىپ, 5,9 پايىزدى قۇرادى. 2022 جىلى ەكونوميكانىڭ قالپىنا كەلۋى جالعاسادى. بىراق ءوسۋ قارقىنى تومەندەپ, حالىقارالىق ۆاليۋتا قورىنىڭ بولجامدارى بويىنشا 4,4 پايىزدى قۇرايدى. حالىقارالىق ۇيىمداردىڭ باعالاۋى بويىنشا, قازاقستان ەكونوميكاسى 2022 جىلى 3,7-4,0 پايىزعا وسەدى, ۇلتتىق بانك ونى 3,9-4,2 پايىز دەڭگەيىندە بولجاپ وتىر», دەدى ول.
ۇلتتىق بانك توراعاسىنىڭ اتاپ وتۋىنشە, شامادان تىس سۇرانىس تۋدىرعان الەمدىك ەكونوميكانىڭ تەز قالپىنا كەلۋى اياسىندا 2021 جىلى شيكىزات, ماتەريالدار مەن ازىق-ت ۇلىك باعاسى ەڭ جوعارى دەڭگەيگە جەتتى. بۇل ەنەرگەتيكالىق داعدارىسپەن بىرگە الەمنىڭ كوپتەگەن ەلدەرىندە رەكوردتىق ينفلياتسياعا الىپ كەلدى.
«حالىقارالىق ۇيىمدار قىسقا مەرزىمدى كەزەڭدە ديسبالانستار اياقتالسا, 2022 جىلدىڭ ورتاسىنا تامان باعانىڭ تۇراقتانۋىن بولجاۋدا. تاۋار جەتكىزۋدەگى بارىنشا ۇزاق توقتاپ قالۋلار جانە شيكىزات پەن ازىق-ت ۇلىك باعاسىنىڭ ءوسۋى جالعاسسا, ينفلياتسيانىڭ تۇراقتانۋىنا ۇزاق ۋاقىت كەرەك بولادى. ۇدەپ كەلە جاتقان ينفلياتسيالىق قىسىمدى تەجەۋ اياسىندا ورتالىق بانكتەر اقشا-كرەديت تالاپتارىن كۇشەيتە باستادى. ول 2022 جىلى بەلسەندى تۇردە جالعاساتىن بولادى جانە قازىردىڭ وزىندە نارىقتارعا قىسىم كورسەتۋدە. سىرتقى جانە ىشكى ينفلياتسيالىق قىسىمنىڭ كۇشەيۋى كەزىندە ۇلتتىق بانك 2021 جىلدىڭ ورتاسىنان باستاپ بازالىق ستاۆكانى ءۇش رەت 9,75 پايىزعا دەيىن 75 بازالىق تارماققا ءوسىردى», دەدى عالىمجان ءپىرماتوۆ.