استانادا 9 مامىر كۇنى ۇلى وتان سوعىسىنداعى جەڭىستىڭ 65 جىلدىعىنا ارنالعان سالتاناتتى شەرۋ ءوتتى.
سالتاناتتى ءسات ەلوردانىڭ سيمۆولىنا اينالعان “قازاق ەلى” مونۋمەنتىنەن باستاۋ الىپ, “وتان قورعاۋشىلار” مونۋمەنتى ارالىعىنا دەيىن جالعاستى. بۇل شەرۋگە كەۋدەلەرىنە وردەن, مەدال تاعىپ, كولونناداعى ارنايى مەرەكەگە ساي جابدىقتالعان ۋاز ماركالى 30 اسكەري اشىق اۆتوموبيلمەن جول باستاعان قالانىڭ 120 سوعىس ارداگەرى, باسقا دا استانالىقتار مەن ەلىمىزدىڭ ءار وڭىرىنەن جانە تمد مەن الىس شەتەلدەردەن كەلگەن قوناقتار قاتىستى. وسى ساپ ارقىلى ولار كەشەگى قان مايداندا قازا تاپقان جاۋىنگەرلەرگە, ەلىمىزدىڭ وزگە وڭىرلەرىندەگى كوزى ءتىرى ارداگەرلەرگە قۇرمەت كورسەتىپ, شىنايى ىستىق ىقىلاستارىن ءبىلدىردى دەۋگە بولادى.
وسى كەزدە “وتان قورعاۋشىلار” مونۋمەنتىنىڭ ماڭگىلىك الاۋىنا پارلامەنت سەناتىنىڭ توراعاسى قاسىم-جومارت توقاەۆ, پارلامەنت ءماجىلىسىنىڭ توراعاسى ورال مۇحامەدجانوۆ, پرەمەر-مينيستر كارىم ءماسىموۆ, پرەزيدەنت اكىمشىلىگىنىڭ باسشىسى اسلان مۋسين, مەملەكەتتىك حاتشى – سىرتقى ءىستەر ءمينيسترى قانات ساۋداباەۆ, قورعانىس ءمينيسترى ادىلبەك جاقسىبەكوۆ پەن استانا اكىمى يمانعالي تاسماعامبەتوۆ گۇل شوقتارى مەن گۇل سەبەتتەرىن قويىپ, مايداندا قازا بولعان جاۋىنگەرلەر جانە جەڭىستىڭ 65 جىلدىعىنا جەتە الماي ومىردەن وزعان ارداگەرلەردى ءبىر ءسات ءۇنسىزدىكپەن ەسكە الدى. ەسكە الۋ ءراسىمى اياقتالعان سوڭ, قورعانىس مينيسترلىگىنىڭ ورتالىق اسكەر وركەسترى, پرەزيدەنت وركەسترى, ىشكى اسكەرلەردىڭ وركەسترى, “جاس ۇلان” رەسپۋبليكالىق مەكتەبىنىڭ بارابانشىلارى, سونىمەن بىرگە وسى ايتۋلى كۇنگە ارنايى دايىندالىپ, تەاترلاندىرىلعان قويىلىم كورسەتكەن تەاتر ارتىستەرى كولوننانىڭ كەلە جاتقانى تۋرالى بەلگى بەرىپ تۇردى. وسىنداي بەلگىلەر ارقىلى كولوننانىڭ الدىندا اقمولادا قۇرىلعان اتاقتى ديۆيزيا مەن پولكتىڭ اسكەري توبى كەلە جاتقانى بەلگىلى بولدى. اسكەري توپ “وتان قورعاۋشىلار” مونۋمەنتىنە كەلگەندە ولاردان سوڭ جاۋىنگەر-ينتەرناتسيوناليستەر, رەسپۋبليكالىق ۇلاننىڭ قۇرمەتتى قاراۋىل روتاسى, ىشكى اسكەر وفيتسەرلەرى, ۇلتتىق قاۋىپسىزدىك كوميتەتىنىڭ شەكارا قىزمەتىنىڭ وكىلدەرى كەلىپ, ساپ تۇزەدى. وسى جەردە جەڭىستىڭ 65 جىلدىعىنا ارنالعان سالتاناتقا اۋعان سوعىسىنىڭ ارداگەرلەرىنىڭ قاتىسقانى ۇلى وتان سوعىسىنىڭ جاۋىنگەرلەرىنە كورسەتكەن ۇلكەن قۇرمەتى دەۋگە بولادى. ويتكەنى, سوعىستى كوزىمەن كورىپ, جانىمەن ءتۇسىنگەن اۋعان سوعىسىنىڭ ارداگەرلەرى كەشەگى قان مايداندا وتان ءۇشىن وت كەشكەن اكەلەرىنىڭ قاندايلىق ەرلىك پەن باتىرلىقتىڭ ۇلگىسىن كورسەتكەنىن جاقسى بىلەدى. بۇل شاراعا جۇزدەن استام اۋعان سوعىسىنىڭ ارداگەرلەرى قاتىستى. قازىر قالادا ولاردىڭ 2000 جىلى قۇرىلعان “اۋعان سوعىسى مۇگەدەكتەرى مەن ارداگەرلەرىنىڭ وداعى” قوعامدىق بىرلەستىگى جۇمىس ىستەيدى. اتالمىش ۇيىمنىڭ دەرەكتەرىنە قاراعاندا, اۋعانستانعا قازاقستاننان 22 269 اسكەري قىزمەتشى جىبەرىلىپ, ونىڭ 924-ءى مەرت بولعان. ال 1015-ءى ءمۇگەدەك بولىپ, 21 ازامات ءىز-ءتۇزسىز كەتكەن كورىنەدى.
وسىدان كەيىن “وتان قورعاۋشىلار” مونۋمەنتى الدىنا كولوننانى جالعاستىرعان ازاماتتىق كاسىپ يەلەرى, جاستار, ستۋدەنتتەر مەن مەكتەپ جانە كوللەدجدىڭ ۇزدىك وقۋشىلارى كەلىپ, سوعىستا قازا تاپقان جاۋىنگەرلەردىڭ رۋحىنا تاعزىم ەتتى. سالتانات ودان ءارى ۇرپاق ساباقتاستىعىن ايشىقتايتىن ء“ومىر اعاشىنىڭ” بۇتاقتارىنىڭ ءبىر جاق بەتىنە اقمولا قالاسىنان جىبەرىلگەن قىزىل اسكەرلەردىڭ اتى-جوندەرى جازىلعان “جەڭىس لەنتالارىن” بايلاۋمەن جالعاستى. كەيبىر دەرەكتەر بويىنشا, ۇلى وتان سوعىسىنا اقمولادان اتتانعان 28 مىڭ جاۋىنگەردىڭ تەك ءبىرنەشە مىڭى عانا سوعىستان ورالعان كورىنەدى. ال قازىر استانادا ۋاقىت وتكەن سايىن قاتارى سيرەپ بارا جاتقان سوعىس ارداگەرلەرىنە بارلىق جاعداي جاسالۋدا. ولاردىڭ ءبارى وتكەن جىلى پاتەرلەرمەن قامتاماسىز ەتىلدى. بيىلعى مەرەكە قارساڭىندا ارداگەرلەر مەن تىل ەڭبەككەرلەرىنە قالا اكىمى يمانعالي تاسماعامبەتوۆ ەلباسىنىڭ تاپسىرماسى بويىنشا سالتاناتتى تۇردە مەملەكەتتىك ناگرادالاردى تابىس ەتكەن بولاتىن.
وسى كۇنى استانادا مەرەكەلىك شارالار قالانىڭ بارلىق جەرىندە جالعاستى. قالالىق الاڭدا, “جاستار” سارايىنىڭ جازعى ساحناسى, “بايتەرەك” مونۋمەنتى مەن ەلوردا ساياباعىندا ۇرمەلى اسپاپتار وركەسترى مەن ءان-بي ءانسامبلىنىڭ قاتىسۋىمەن كونتسەرت ءوتتى. سونىمەن بىرگە قالالىق اكىمدىك الدىنداعى الاڭدا پاتريوتتىق اندەر فەستيۆالى ءوتىپ, وعان كاسىبي جانە كوركەمونەرپاز ۇجىمدارى, قازاقستاننىڭ قارۋلى جانە قورعانىس ۆەدومستۆولارىنىڭ ۇرمەلى اسپاپتار وركەسترى قاتىستى. ولار باعدارلاما بويىنشا سوعىس جىلدارىنداعى اندەر مەن وتانىن قورعاعان سارباز ەرلىگى تۋرالى كومپوزيتسيالار ورىندادى. ال جوعارىدا ايتقان ۇلى وتان سوعىسىنداعى جەڭىستىڭ 65 جىلدىعىنا ارنالعان شەرۋگە سوڭعى مالىمەتتەر بويىنشا 7 مىڭنان استام ادام قاتىستى.
داستان كەنجالين.