بيىلدان باستاپ اتاۋى Astana Qazaqstan Team بولىپ وزگەرگەن قازاقستاندىق ۆەلوكلۋب 2022 جىلعى العاشقى جارىسىن يسپانيا تاس جولدارىنداعى ءداستۇرلى «ۆالەنسيا ۆۋەلتاسىنان» باستايتىن بولدى.
1929 جىلى تۇساۋى كەسىلگەن حالىقارالىق جارىس بيىل 73-ءشى مارتە وتكەلى وتىر. العاشىندا بۇل جارىس Vuelta al Levante دەگەن اتاۋمەن وتكىزىلسە, 1984 جىلدان باستاپ قازىرگى اتىمەن ۇيىمداستىرىلىپ كەلەدى. بۇل دودادا قازاقستاندىق سپورتشىلار ءبىر مارتە جەڭىس تۇعىرىنا كوتەرىلدى. اتاپ ايتساق, 1999 جىلى فرانتسيالىق Ag2r Prévoyance كومانداسىندا ونەر كورسەتكەن, قازىرگى تاڭدا Astana Qazaqstan Team كلۋبىنىڭ باس مەنەدجەرى الەكساندر ۆينوكۋروۆ توپ جاردى. ال 2019 جىلى قازاقستاندىق «استانا» كلۋبىنىڭ يسپانيالىق وكىلى يون يساگيررە جەڭىسكە جەتكەن بولاتىن. 2018 جىلى «استانانىڭ» ەكى وكىلى لۋيس لەون سانچەس پەن ياكوب فۋلسانگ ءبىرىنشى جانە ەكىنشى ورىندى بولىسسە, «استانا» ەڭ ۇزدىك كوماندا اتانعان-دى.
Astana Qazaqstan Team ساپىنان بيىلعى جارىستا مانۋەلە بوارو (يتاليا), داۆيد دە لا كرۋس (يسپانيا), فابيو فەللينە (يتاليا), انتونيو نيبالي (يتاليا), ۆينچەنتسو نيبالي (يتاليا), الەكساندر ريابۋشەنكو (بەلارۋس) جانە اندرەي زەيتس (قازاقستان) ۇزدىكتەر قاتارىنان كورىنۋدى كوزدەيدى.