پرەمەر-ءمينيستردىڭ ورىنباسارى – يندۋستريا جانە جاڭا تەحنولوگيالار ءمينيسترى ا.يسەكەشەۆ مامىر ايىنىڭ باسىندا جۇمىس ساپارىمەن تۇركيادا بولدى. مينيستر باستاعان دەلەگاتسيا قۇرامىندا پاۆلودار وبلىسىنىڭ اكىمى ب.ساعىنتاەۆ, اقتوبە جانە سولتۇستىك قازاقستان وبلىستارى اكىمدەرىنىڭ ورىنباسارلارى, مەملەكەتتىك حولدينگتەردىڭ, ۇلتتىق كومپانيالاردىڭ جانە جەكە سەكتوردىڭ وكىلدەرى بولدى.
ساپار بارىسىندا ا.يسەكەشەۆ تۇركيا پرەزيدەنتى ا.گۇلدىڭ قابىلداۋىندا بولدى جانە تۇركيا رەسپۋبليكاسى پرەمەر-ءمينيسترىنىڭ ورىنباسارى ءارى مەملەكەتتىك ءمينيسترى ا.باباجانمەن, سونداي-اق مەملەكەتتىك مينيستر ز.چاعلايانمەن كەلىسسوزدەر جۇرگىزدى. تۇركيا رەسپۋبليكاسىنىڭ پرەزيدەنتى ا.گۇلمەن كەزدەسۋ بارىسىندا ەلباسى ن.نازارباەۆتىڭ باستاماسىمەن قۇرىلعان تۇركى حالىقتارىنىڭ كەڭەسى توڭىرەگىندە ساۋدا-ەكونوميكالىق جانە عىلىمي-تەحنيكالىق ىنتىماقتاستىققا بايلانىستى ماسەلەلەر قاراستىرىلدى. سول سياقتى تۇركيا پرەزيدەنتىنىڭ قازاقستانعا جاسايتىن ساپارىنا قاتىستى ماسەلەلەر اڭگىمە بولدى. ا.يسەكەشەۆتىڭ تۇركيانىڭ مەملەكەتتىك ءمينيسترى ا.باباجانمەن كەزدەسۋىندە 2009 جىلدىڭ قازان ايىندا قول قويىلعان ستراتەگيالىق ارىپتەستىك جونىندەگى كەلىسسوز توڭىرەگىندە تۋىسقان ەكى ەل اراسىنداعى ەكونوميكالىق ىنتىماقتاستىق ماسەلەلەرى تالقىلاندى. كەزدەسۋلەر بارىسىندا ا.يسەكەشەۆ وسى جىلدىڭ 1 قاڭتارىنان باستاپ كۇشىنە ەنگەن بەلورۋسسيا, رەسەي جانە قازاقستان اراسىنداعى كەدەن وداعىنىڭ ءوزارا ينۆەستيتسيالىق جوبالار ءۇشىن جاڭا مۇمكىندىكتەر اشاتىنىن اتاپ ءوتتى. كەزدەسۋ سوڭىندا جاڭا شارتتار جاعدايىندا ەكى ەل اراسىندا ۇكىمەتتەرارالىق دەڭگەيدە جۇمىس جاساپ جاتقان ەكونوميكالىق كوميسسياعا قوسىمشا ەكونوميكالىق ىنتىماقتاستىقتىڭ ناقتى ءارى ءتيىمدى مەحانيزمىن قۇرۋ جونىندە كەلىسىمدەرگە قول جەتكىزىلدى. ساپار بارىسىندا سونداي-اق وتاندىق جانە تۇرىك كاسىپكەرلەرىنىڭ قاتىناسۋىمەن ەكى بيزنەس-فورۋم بولىپ ءوتتى.
“ەگەمەن-اقپارات”.