بۇل مەملەكەت باسشىسىنىڭ قاڭتار وقيعالارىنان كەيىنگى ءبىرىنشى سۇحبات بەرۋى. شىندىعىندا سۇحباتتى حالىق كۇتتى جانە ءبارىمىزدى كوپتەن بەرى مازالاپ جۇرگەن سۇراقتارعا ناقتى جاۋاپ بەرىلدى.
پرەزيدەنت ايتقان «حالىق ۇنىنە قۇلاق اساتىن مەملەكەت» قۇرامىز دەسەك, وندا ءدال قازىرگى ۋاقىتتا اشىقتىق ساياساتى كەرەك. ەڭ الدىمەن كەشەگى سۇحباتتا «قاسىرەتتى قاڭتارعا» قالاي تاپ بولعانىمىز جونىندە, سول ۋاقىتتاعى بىزگە بەيمالىم بولعان جايتتار اشىق ايتىلدى. ەلىمىز ءۇشىن قيىن ساتتەردە تىڭ شەشىمدەر قابىلداۋ قاجەتتىگى تۋىنداعانىنان حاباردار بولدىق. وسى ورايدا كۇنى كەشە وتكەن Nur Otan پارتياسىنىڭ كەزەكتەن تىس سەزىندە مەملەكەت باسشىسىنىڭ جاڭا قازاقستان قۇرۋ ءۇشىن وتكەنىمىزدى ەش ۋاقىتتا ۇمىتپاۋعا ءتيىس ەكەندىگىمىزدى باسا ايتقانى ەسكە تۇسەدى. ەلىمىزدىڭ قاۋىپسىزدىگى, ەلىمىزدىڭ تاۋەلسىزدىگى, بۇل – قازىرگى كەزەڭدە كوزىمىزدىڭ قاراشىعىنداي ساقتايتىن قۇندىلىقتار. سوندىقتان بۇكىل حالىق بولىپ وسى ماسەلەنى دۇرىس تالقىلاپ, وڭ شەشىمىن تابۋىمىز قاجەت جانە بولاشاعىمىز ءۇشىن جۇمىس ىستەۋگە ءتيىسپىز.
مەملەكەت باسشىسى ەلىمىز پارلامەنتتىك رەسپۋبليكا بولۋى مۇمكىندىگىنە قاتىستى دا پىكىرىن ءبىلدىردى. جالپى, ماجىلىستە مىقتى پارتيالار بولسا, ولار شىنايى حالىقتىڭ ورتاسىنان تابىلىپ, ناقتى جەتىستىكتەرگە قول جەتكىزە السا, وندا بۇل دا باسقارۋدىڭ ءبىر جۇيەسى بولار ەدى. بىراق بۇل بۇگىن-ەرتەڭ بولا قوياتىن جايت ەمەستىگىن ءبارىمىز دە تۇسىنەمىز. ال بولاشاقتا مۇنىڭ دا قاجەتى بار شىعار. ونى دا ويلاۋعا ءتيىسپىز. دەموكراتياسى دامىعان ەۋروپا ەلدەرىندە مەملەكەتتىك باسقارۋدىڭ پرەزيدەنتتىكپەن قاتار پارلامەنتتىك جۇيەسى دە تيىمدىلىگىن كورسەتىپ وتىر. تۇپتەپ كەلگەندە پرەزيدەنت سۇحباتىنان كەيىن قازاقستاننىڭ بولاشاعىنا قاتىستى وي قالىپتاستى. ياعني مەملەكەت باسشىسى ەلىمىزدىڭ بولاشاعى بىلىمدە, عىلىمدا, جاڭا تەحنولوگيالاردا جانە قازاقستاندىقتاردىڭ ءال-اۋقاتىنىڭ ارتۋىندا ەكەندىگىن ايتتى. سوندىقتان اتا-بابامىز اڭساعان جاڭا قازاقستاندى قۇرۋ كەزەڭىندە بۇل دا دامۋدىڭ ءبىر ءۇردىسى بولارى انىق. دەمەك ءۇمىت سونبەيدى, ارتا بەرەدى.
داريا قوجامجاروۆا,
م.اۋەزوۆ اتىنداعى وڭتۇستىك قازاقستان ۋنيۆەرسيتەتىنىڭ رەكتورى