قازاقستان – شيرەك فينالدا

ەۋروپا چەمپيوناتىنىڭ الدىندا بىر­قاتار فۋتزال ماماندارى بيىلعى بىرىن­شىلىك تۋرالى ءوز ويلارىن ورتاعا سالىپ, ۆ تو­بىن­داعى ءتورت قۇرامانىڭ ىشىن­دە يتاليانىڭ كەلەسى كەزەڭگە شى­عۋ مۇمكىندىگىن جوعارى باعا­لاعان ەدى. ءتىپتى ساراپشىلار «سكۋاد­را ادزۋررالىقتار» ءوز توبىن­دا ءبىرىنشى ورىن الىپ, پلەي-وفف ساتىسىنا ەش قيىن­دىق­سىز شىعاتىنىن ايتۋدان جالىق­قان جوق-تىن. ويتكەنى يتا­ليا قۇراماسى 1996 جىلدان بەرى وتكىزىلىپ كەلە جاتقان چەمپيوناتتىڭ ەڭ تيتۋلدى كو­مان­­دا­لارىنىڭ ءبىرى سانالادى. اتاپ ايتار بولساق, ولار وسى كۇنگە دەيىن 11 مارتە جالاۋى جەلبىرەگەن ەۋروپا چەمپيونا­تىن­دا 6 رەت جۇلدەگەرلەر قاتارى­نان كورىن­گەن. 2003 جانە 2014 جىلعى تۋرنيرلەردە باس جۇلدەنى ولجالاعان بولسا, 2007 جىلعى دودا­ن­ىڭ فينالىندا يسپانيادان جەڭىلىپ, كۇمىس جۇلدەنى قاناعات تۇتقان. ال 1999, 2005 جانە 2012 جىلدارى ءۇشىنشى ورىنعا تابان تىرەگەن بولاتىن. كارى قۇرلىق بىرىنشىلىگىندە وسىنداي جۇلدەگە يە كوماندا كەشەگى ويىننىڭ ءسوزسىز ءفاۆوريتى ەدى.

گرونينگەندەگى ماتچتىڭ العاشقى بەس مينۋتىن يتاليا قۇراماسى قارقىندى باستادى. يگيتا قورعاعان قاقپاعا بىرقا­تار قاۋىپتى شابۋىل ۇيىمداس­تى­رىپ, قاقپاشىمىز­دىڭ الەۋە­تىن ءبىر بايقاپ كورگەندەي بولدى. قۋا­نى­شىمىزعا وراي, بۇل جولى يگيتا وتە جاقسى وينادى. ال ۋاقىت ۇزاعان سا­يىن جەر­لەستەرى­مىز بىرتە-بىرتە ويىن تىزگىنىن ءوز قول­دارىنا الىپ, ماتچتىڭ 6-مينۋتىن­دا كەزدەسۋدىڭ ەسەبىن اشتى. دۋگلاس جۋنيور­د­ان تاماشا پاس العان ءبىرجان ورازوۆ قار­سى­لاستىڭ قورشاۋىندا تۇرسا دا, اسقان شەبەرلىگىنىڭ ارقاسىن­دا شابۋىلدى گولمەن تۇيىندەدى. ارادا ءۇش مينۋت وتكەندە ازات ۆاليۋللين مەرگەندىگىمەن كوزگە ءتۇ­سىپ, تابلوداعى كورسەتكىشتى 2:0-گە جەتكىزدى. جۋىر­دا عانا ۇلتتىق قۇرامانىڭ جەيدەسىن كيگەن ەدسون ناتيجەلى پاستىڭ اۆتورى اتاندى. بۇل ونىڭ ءۇشىن­شى ماتچتاعى ءتورتىنشى ناتيجەلى پا­سى ەدى. ويىن بارىسىندا ءوزى گول سوقپاسا دا, كوماندالاستارى­نىڭ گول سوعۋىنا جاقسى مۇمكىن­دىك جاساپ بەرگەنىن ايتا كەتۋ كەرەك. ءبىرىنشى تايمنىڭ بەل ورتاسىنان اۋعان شاعىندا يتاليا قۇراماسىنان نيكولودي ەسەپتى قىسقارتۋعا مۇمكىندىك الدى – 2:1. ويىننىڭ ءبىرىنشى كە­زەڭى قازاقستان قۇراماسىنىڭ باسىمدىعىمەن اياقتالدى.

ۇزىلىستەن كەيىن دە يتاليا قۇراماسىنىڭ جىگىتتەرى تارازى باسىن تەڭەستىرۋدىڭ قامىن ويلاپ, ءبىزدىڭ قاقپاعا ءجيى شابۋىل جاسادى. الايدا قورعانىستا وتە ساۋاتتى وي­ناعان جەرلەستەرىمىز قارسىلاستارىنا گول سوعا­تىن­داي ەش مۇمكىندىك بەرگەن جوق. قار­سى شابۋىل ارقىلى ويناۋدى ءجون كورگەن كاكا شاكىرتتەرى 30-مينۋتتا ەسەپتى ەسەلەي ءتۇستى. ءبىر­جان ورازوۆ شابۋىلدى ءوزى باس­تاپ, نۇكتەسىن دە ءوزى قويدى. ال­عاشقى ماتچتا ءبىر گول سوعىپ, كەيىن­گى ەكى ويىندا ءدۋبلدىڭ اۆ­تو­رى اتانعان جەرلەسىمىز وسىلايشا 5 گولمەن سۇر­مەر­گەندەر تىزى­مىندە كوش باس­­تادى. ال ماتچىڭ اياقتالۋىنا ەكى مينۋت قال­عان­دا دۋگ­لاس بوس قالعان قاق­پانى ءدال كوزدەپ, كەزدەسۋ­دىڭ نۇكتەسىن قويدى. قورىتىندى ەسەپ – 4:1.

وسىلايشا, ەكى دۇركىن ەۋروپا چەمپيوندارىنان باسىم تۇسكەن قازاقستان قۇراماسى ءوز توبىندا ءبىرىنشى ورىنمەن كارى قۇرلىق بىرىنشىلىگىنىڭ شيرەك فينالىنا شىقتى. سونداي-اق ءبىزدىڭ توپتاعى ەكىنشى ويىندا فينليانديا قۇراماسى سلوۆەنيانى 2:1 ەسەبىمەن جەڭىپ, ولار دا ەكىنشى ورىنمەن شيرەك فينالعا جولداما الدى.

وزگە توپتاردىڭ ناتيجە­لەرى­نە توقتالار بولساق, ا توبىندا ءۇش ويىننىڭ بارىندە جەڭىسكە جەتكەن پورتۋگاليا مەن تەك ءبىر ويىندا عانا ۇزدىك شىققان ۋكراينا جارىستىڭ شيرەك فينالىنا شىقتى. س توبىندا رەسەي مەن سلوۆاكيا جارىستى ءارى قاراي جالعاستىرۋعا مۇمكىندىك السا, D توبىندا يسپانيا جانە گرۋزيا قۇرامالارى شيرەك فينالدا باق سىنايتىن بولدى.

جەرلەستەرىمىز جارتىلاي فينالعا شىعۋ ءۇشىن ا توبىندا ەكىنشى ورىنعا تۇراقتاعان ۋكراينا قۇراماسىمەن وينايدى. ماتچ بۇگىن امستەردامداعى  Ziggo Dome سپورت كەشەنىندە وتەدى. وكىنىشكە قاراي, بۇل كەزدەسۋدە قازاقستان قۇراماسىنا ەكىنشى «سارى قاعازدارىن» العان تاينان مەن ەدسون كومەك­تەسە المايدى. ەسەسىنە ەكى ماتچقا ويىن­نان شەتتەتىلگەن البەرت اقبالىقوۆ بۇل ويىندا الاڭ­عا شىعادى. سونىمەن قاتار كورو­ناۆيرۋسقا شالدىققان شىڭعىس ەسەنا­مانوۆ تا قاتارعا قوسىلىپ قالۋى مۇمكىن. 

ەگەر قازاقستان قۇراماسى شيرەك فينالدا جەڭىسكە جەتە­تىن بولسا, جارتىلاي فينالدا كاكا شاكىرتتەرى رەسەي جانە گرۋ­زيا جۇبىنىڭ جەڭىمپازىمەن كەزدەسەدى.