وتكەن 26 قاڭتار كۇنى «Egemen Qazaqstan» گازەتىنە ءورت ءسوندىرۋ بولىمدەرىنىڭ بىرقاتار پروبلەمالارى قاۋزالعان «قۇتقارۋشىعا دا قۇتقارۋشى كەرەك» اتتى ماقالا جارىق كورگەن-ءدى. ءورت سوندىرۋشىلەردىڭ ماقالادا ايتقان ۋاجدەرىنە بايلانىستى شىعىس قازاقستان وبلىستىق توتەنشە جاعدايلار دەپارتامەنتىنىڭ باستىعى ە.نۇرپەيىسوۆكە دە رەسمي ساۋال جولدادىق. ال وسى ماقالاعا دەپارتامەنت باستىعىنىڭ ورىنباسارى, پولكوۆنيك د.تيتوۆ بەرگەن جاۋاپتى پايدالاندىق. تەك, قايتالانىپ كەتپەۋى ءۇشىن كەيبىر جاۋابى ماقالاعا كىرىستىرىلمەگەن ەدى. بۇگىن تولىقتىرىلعان رەسمي جاۋاپتى گازەتكە تولىق بەرۋدى ءجون كوردىك.
«ب.شىلاي مەن ا.ە.موجانوۆتىڭ تالاپتارى 2021-2022 جىلدارى شىعىس قازاقستان وبلىسىنىڭ وسكەمەن قالالىق سوتىندا مەملەكەتتىك قىزمەت اگەنتتىگى دەپارتامەنتى مەن ەڭبەكتى قورعاۋ بويىنشا دەپارتامەنتىنىڭ قاتىسۋىمەن قاراستىرىلىپ, وندا بارلىق قاتىسۋشى تۇلعالاردىڭ ءىس-ارەكەتتەرىنە قۇقىقتىق باعا بەرىلگەن جانە ب.شىلاي مەن ا.ە.موجانوۆتىڭ تاراپىنان بولعان بۇزۋشىلىقتار راستالىپ, شقو تجد ءىس-ارەكەتىندە تەرىس قىلىق انىقتالعان جوق», دەپ جازادى توتەنشە جاعدايلار دەپارتامەنتى باستىعىنىڭ ورىنباسارى د.تيتوۆ.
1.اۋدانداردا ءورت ءسوندىرۋ تەحنيكاسى ىستەن شىققان كەزدە قوسالقى بولشەكتەردى ساتىپ الۋعا اقشا قاراجاتى بولىنە مە؟
– قوسالقى بولشەكتەردى ساتىپ الۋ مەملەكەتتىك ساتىپ الۋ جوسپارىنا سايكەس قازاقستان رەسپۋبليكاسى توتەنشە جاعدايلار مينيسترلىگى بولەتىن قاراجات ەسەبىنەن جۇزەگە اسىرىلادى. قوسالقى بولشەكتەردى بەرۋ بارلىق اۋداندىق جانە قالالىق بولىمشەلەردىڭ قاجەتتىلىگىنە قاراي جۇزەگە اسىرىلادى.
2.نەلىكتەن كاتونقاراعاي اۋدانىنىڭ ءورت ءسوندىرۋ ءبولىمىنىڭ قىزمەتكەرلەرى قوسالقى بولشەكتەردى ءوز ەسەبىنەن ساتىپ الدى؟
– ءورت ءسوندىرۋ بولىمدەرىنىڭ جەكە قۇرامى ەسەبىنەن قوسالقى بولشەكتەردى ساتىپ الۋ تۋرالى اقپارات تۇسكەن جوق. قوسالقى بولشەكتەردى ساتىپ الۋ مەملەكەتتىك ساتىپ الۋ پورتالى ارقىلى جۇزەگە اسىرىلادى جانە قاجەتتىلىك بويىنشا بولىمشە باسشىسىنىڭ باياناتى بويىنشا, سونداي-اق رۇقسات قاعازى بويىنشا بەرىلەدى.
3.ەسكى تەحنيكا قاشان جاڭارتىلادى؟ وسى ماسەلە بويىنشا ءسىزدىڭ تاراپىڭىزدان قانداي دا ءبىر جوسپارلار جاسالدى ما؟
– ءورت ءسوندىرۋ تەحنيكاسىن ساتىپ الۋدى قازاقستان رەسپۋبليكاسى توتەنشە جاعدايلار مينيسترلىگى ورتالىقتاندىرىلعان تۇردە رەسپۋبليكالىق بيۋدجەت قاراجاتىنان جۇزەگە اسىرادى. ءورت ءسوندىرۋ بولىمشەلەرىندە ءورت تەحنيكاسىن جاڭارتۋ جاڭا ءورت ءسوندىرۋ اۆتوموبيلدەرىنىڭ تۇسۋىنە قاراي قارالادى.
4.27-ءوسب جۇرگىزۋشىسى اعا سەرجانت ازات موجانوۆ نەگە جۇمىستان بوساتىلدى؟ سونىمەن قاتار ريددەر قالاسىنىڭ 14 – ءوسب باستىعى باقىتبەك شىلاي نەگە لاۋازىمىنان تومەندەدى؟ ناقتى سەبەپتەردى تۇسىندىرۋلەرىڭىزدى سۇرايمىز.
– ەرىكتى تۇردە جۇمىستان شىعۋ تۋرالى ا.موجانوۆتىڭ راپورتىنا سايكەس, ول ازاماتتىق قورعاۋ ورگاندارىنان شىعارىلدى. قىزمەتتىك تەرگەۋ ناتيجەلەرى جانە تارتىپتىك كوميسسيانىڭ شىعارعان شەشىمى بويىنشا ب.شىلاي ءوز فۋنكتسيونالدىق مىندەتتەرىن تيىسىنشە ورىنداماعانى ءۇشىن لاۋازىمىنان تومەندەتىلدى.
ەستەرىڭىزگە سالا كەتسەك, سۇراۋىمىزعا بۇل جاۋاپتار توتەنشە جاعدايلار دەپارتامەنتى باستىعىنىڭ ورىنباسارى, پولكوۆنيك د.تيتوۆتىڭ اتىنان كەلگەن ەدى.
P.S. باقىتبەك شىلاي مەن ازات موجانوۆتىڭ تاراپىنان بولعان بۇزۋشىلىقتار راستالعانىمەن, ەكى ازامات تا اتالعان دەپارتامەنتتىڭ شەشىمىمەن كەلىسپەيتىندەرىن العا تارتىپ, سوتقا ارىزدانعان. بولىپ جاتقان كەلىسپەۋشىلىكتەرگە زاڭ بويىنشا نۇكتەسى ءالى قويىلعان جوق.
شىعىس قازاقستان وبلىسى