“جان اڭساعان جالعىز ءسوز”

جەڭىسپەن قۇرداس اقىن سەرىكباي وسپانوۆتىڭ جىر كەشى وسىلاي اتالدى بەلگىلى اقىن سەرىكباي وسپانوۆتىڭ جىر كەشى بولىپ ءوتتى. جەڭىسپەن قۇرداس اقىن بيىل 65 جاسقا تولدى. ول وقىرماندارىمەن بۇل كەزدەسۋىن “جان اڭساعان جالعىز ءسوز” دەپ اتادى. – سوعىس جىلدارى اۋىلدا جۇرتتىڭ مايدان جاققا قۇلاعىن توسىپ, سارىلا كۇتكەنى, اڭساپ, ارمانداعانى “جەڭىس!” دەگەن جالعىز ءسوز ەدى. قانسىراعان حالقى­مىزعا وسى “جەڭىس” دەگەن ءبىر اۋىز ءسوز قۋات بولعان جىلى ومىرگە بىزدەر كەلگەن ەكەنبىز. 1945 جىلى تۋعاندار مايداننان مۇگەدەك, اقساق-توقساق بوپ كەلگەندەردىڭ بالالارى. مەنىڭ اكەمنىڭ دە سوعىستان ءبىر قولى جوق بولىپ ورالدى. ءوزى اعاشتان ءتۇيىن تۇيگەن شەبەر ەدى. مەنىڭ بالا كەزىمدە ءبىر قولىمەن دومبىرا جاسادى. ونى جالعىز قولىمەن تارتا الماي, تەك قاراپ وتىراتىن. بۇرىن دومبىرا تارتقان ادامعا مۇنان ارتىق قاسىرەت بار ما؟–دەيدى اقىن. بالا كەزدەگى وسى سۋرەتتىڭ بارلىعى دا كەيىن اقىن قالامىنان ولەڭ بولىپ توگىلدى. “قالدىرعىسى كەلدى مە ەكەن ول مۇرا, دومبىرا تارتۋ الدە ارمانى بولدى ما؟ جالعىز قول بوپ ورالىپ اكەم مايداننان, قاراعايدان جاساپ بەردى دومبىرا”,– دەپ جازدى ول. مايداننان قولسىز, مۇگەدەك بولىپ كەلگەن اكە بالاسىنا ءۇي تۇرعىزىپ, استىنا ماشينا الىپ بەرە المادى, تەك ونەرىن مۇرا ەتىپ قالدىردى. وسى كەشتە سەرىكباي وسپانوۆتىڭ نەگىزىنەن سوعىس تاقىرىبىنا ارنالعان ولەڭدەرىن ءى.وماروۆ اتىنداعى وبلىستىق دراما تەاترىنىڭ ارتىستەرى وقىدى. اقىن پوەزياسىنداعى ليريكالىق كەيىپكەر بايانداعان سۇراپىل جىلدار سۋرەتى الىستا قالسا دا, سانادا جاڭعىرىپ تۇرادى. سونىمەن بىرگە سەرىكباي وسپانوۆتىڭ سوزىنە جازىلعان اسەم اندەر كەش اجارىن اشا ءتۇستى. ءنازيرا جارىمبەتوۆا. قوستاناي.