وسكەمەندەگى كىتاپحانالار ءوڭىر زيالىلارىنىڭ باسىن قوسىپ, رۋحاني شارالار ءجيى وتەدى. جۋىقتا وبلىستىق بالالار جانە جاسوسپىرىمدەر كىتاپحاناسىندا «بالالار – كىتاپ الەمىندە» اتتى قىزىقتى كورمە اشىلدى.
پرەزيدەنت قاسىم-جومارت توقاەۆ 2022 جىلدى «بالالار جىلى» دەپ جاريالاعانى بەلگىلى. سوعان وراي بالالار جانە جاسوسپىرىمدەر كىتاپحاناسى بيىل جاڭا جوبالاردى قولعا الدى. جۇزدەگەن جوبالاردىڭ ءبىرى «بالالار – كىتاپ الەمىندە» اتتى كىتاپ كورمەسىنىڭ اشىلۋى ەدى.
كورمەگە بالالارعا ارنالعان كلاسسيك جازۋشىلاردىڭ تۋىندىلارى, حالىق اۋىز ادەبيەتىنىڭ وزىق ۇلگىلەرى, بالالار ەنتسيكلوپەدياسى جانە بۇلدىرشىندەرگە ارنالعان ەرتەگى كىتاپتار قويىلدى. سونداي-اق قىزىقتى وقيعالاردى باياندايتىن ءارتۇرلى باعىتتاعى كىتاپتاردان تۇراتىن «ادەبي ساندىق» ءوز وقىرماندارىنا ەرەكشە كوڭىل كۇي سىيلادى. وقۋشىلار وسى كورمەنى جىل كولەمىندە تاماشالاپ, وزدەرىن قىزىقتىرعان كىتاپتارىن الىپ وقي الادى.
– كىتاپحانامىزدىڭ كىشكەنتاي وقىرماندارى ءۇشىن وزدەرى سۋرەتىن سالعان, «كنيجكي-مالىشكي» سەرياسىمەن شىققان كىتاپشالار دا كورمە سورەلەرىنەن ورىن الادى. بۇل ءبىزدىڭ بولاشاق سۋرەتشىلەرىمىز بەن جازۋشىلارىمىزدىڭ العاشقى تۋىندىلارىنىڭ ءبىرى دەسەك تە بولادى. بۇدان بولەك جازۋشى, جۋرناليست مارات قابانباەۆتىڭ «جيھانكەز تيتي» اڭگىمەسىن وقىرمانداردىڭ سۇرانىسى بويىنشا بالالار جازۋشىسى, ۇستاز بانۋ احمەتبەكوۆا ورىس تىلىنە اۋداردى. بۇل كىتاپ «ۆكپك ارگو» باسپاسىنان باسىلىپ شىعىپ, ءوز وقىرماندارىنا جول تارتتى, – دەپ كورمەمەن تانىستىردى كىتاپحانا قىزمەتكەرى تالانت مەيرامباەۆ.
كىتاپ كورمەسىنىڭ اشىلۋىندا قازاقستان جازۋشىلار وداعىنىڭ شىعىس قازاقستان وبلىستىق فيليالىنىڭ توراعاسى, جازۋشى الىبەك قاڭتارباەۆ جاس وقىرمانداردى اتاۋلى جىلمەن قۇتتىقتاپ, جۇرەكجاردى تىلەگىن جولدادى.
– ادام بالاسىنىڭ ەڭ جاقىنى دا, ەڭ جاقسى كورەتىنى دە – بالا. ءتىپتى ءومىردىڭ ءسانى مەن ءمانى دە وسى بالادا. قازاقتا «بالالى ءۇي – بازار, بالاسىز ءۇي – قۋ مازار», «بالا – ادامنىڭ باۋىر ەتى» دەگەندەي ماقال-ماتەلدەر وتە كوپ. ادام بولىپ دۇنيەگە كەلگەن سوڭ, مەيلى ەركەك, مەيلى ايەل بولسىن, مەنىڭشە ءبىر عانا مۇراتپەن ءومىر سۇرەتىن شىعار, ول – ومىرگە ۇرپاق اكەلۋ, ارتىڭا ۇرپاق قالدىرۋ. جالپى, پرەزيدەنتىمىزدىڭ وسى جىلدى «بالالار جىلى» دەپ اتاۋى تەگىننەن-تەگىن ەمەس. حالقىمىز «ەل بولام دەسەڭ, بەسىگىڭدى تۇزە» دەيدى. بەسىك دەگەن – مەملەكەت. سونىڭ ساياساتى. سونىڭ يدەولوگياسى. سوندىقتان بالاعا ءبىر جىلدى عانا ارناپ, شارۋانى ءبىتىرىپ تاستادىق دەپ شىرەنۋگە بولماس. بۇل تاقىرىپ – پرەزيدەنتتىڭ دە, پارلامەنتتىڭ دە, ءاربىر اتا-انانىڭ دا كۇن تارتىبىندە ماڭگىلىك تۇرۋى شارت, – دەدى قالامگەر.
ايتا كەتەرلىگى, كىتاپحانا ۇجىمى ۇيىمداستىراتىن شارالاردىڭ كوبى جاستاردى كىتاپ وقۋعا تارتۋ ماقساتىندا اتقارىلادى. ناتيجە جوق ەمەس. كۇن سايىن وقىرماندار سانىنىڭ ارتىپ كەلە جاتقانى قۋانتادى.
وسكەمەن