بۇگىن كسرو مەن قازاقستاننىڭ حالىق ءارتىسى, حالىق قاھارمانى, كەڭەستىڭ جانە قازاقتىڭ وپەرا جانە ەسترادا ءانشىسى روزا باعلانوۆانىڭ تۋعانىنا 100 جىل تولدى, دەپ حابارلايدى Egemen.kz.
روزا باعلانوۆا 1922 جىلى 1 قاڭتاردا قىزىلوردا وبلىسىنىڭ قازالى وڭىرىندە تۋعان.
1941 جىلى قىزىلوردا پەداگوگيكالىق ينستيتۋتىن ءبىتىرىپ, ونەر جولىن تاشكەنت فيلارمونياسىنىڭ ءان-بي انسامبلىندە ءانشى بولىپ باستادى. ول سول انسامبل قاتارىندا ەكىنشى دۇنيەجۇزىلىك سوعىس جىلدارى مايدان دالاسىندا ونەر كورسەتىپ, 1945 جىلى 9 مامىردا بەرليندەگى جەڭىس كونتسەرتىنە قاتىسقان.
1947-1949 جىلدارى قازاق وپەرا جانە بالەت تەاترىنىڭ, 1949-1960 جىلدارى – قازاق فيلارمونياسىنىڭ, 1960 جىلدان بەرى – قازاقكونتسەرتتىڭ ءانشىسى بولىپ, ۇلتتىق ءان ونەرىن دامىتۋعا زور ۇلەس قوسقان.
1946 جىلى ماسكەۋدە وتكەن بۇكىلوداقتىق ەسترادا انشىلەرى كونكۋرسىنىڭ ديپلوماتى, 1949 جىلى بۋحارەستە وتكەن بۇكىل دۇنيەجۇزىلىك جاستار مەن ستۋدەنتتەردىڭ 2-فەستيۆالىنىڭ لاۋرەاتى اتاندى. لەنين, ەڭبەك قىزىل تۋ, «حالىقتار دوستىعى» وردەندەرىمەن, «شاپاعات» مەدالىمەن ماراپاتتالعان.
روزا باعلانوۆا 2011 جىلى 8 قاڭتاردا الماتى قالاسىندا 89 جاسىندا دۇنيەدەن ءوتتى. ءانشىنىڭ ورىنداۋىنداعى ابايدىڭ «جەلسىز تۇندە جارىق اي», كومپوزيتور م. تولەباەۆتىڭ اقىن ولەڭىنە جازعان «قاقتاعان اق كۇمىستەي كەڭ ماڭدايلى», س. مۇحامەدجانوۆتىڭ «جارق ەتپەس قارا كوڭلىم نە قىلسا دا», «قيىستىرىپ ماقتايسىز» اندەرى قازاق راديوسىنىڭ قورىندا ساقتاۋلى, ونىڭ ورىنداۋىنداعى اندەر بىرنەشە رەت كۇيتاباققا جازىلىپ, قازاق مۋزىكا مادەنيەتىنىڭ التىن قورىنا قوسىلعان. وتكەن جىلى 24 قاراشادا يۋنەسكو-نىڭ (بۇۇ ءبىلىم, عىلىم جانە مادەنيەت جونىندەگى ۇيىمى) 2022-2023 جىلدارعا ارنالعان حالىقارالىق مەرەيتويلار ءتىزىمى قابىلدانىپ, وعان قازاقستاننىڭ ۇسىنىسىمەن احمەت بايتۇرسىن ۇلىنىڭ 150 جىلدىعى مەن روزا باعلانوۆانىڭ 100 جىلدىعى ەندى. وسىلايشا, قازاقستاننىڭ قوس اڭىز تۇلعالارىنىڭ مەرەيتويلارى يۋنەسكو كولەمىندە اتالىپ وتەدى.