باس ءمۇفتي, شەيح ءابساتتار قاجى دەربىسالى حازرەت الماتىدا نۇر-مۇباراك ۋنيۆەرسيتەتىن يسلامتانۋ ماماندىعى بويىنشا بيىل بىتىرەتىن ءتۇلەكتەردى قىزمەتكە ءبولدى. 2001 جىلى 1 قىركۇيەكتە ستۋدەنتتەرگە ەسىگىن اشقان رەسپۋبليكاداعى ءبىردەن-ءبىر جوعارى ءبىلىمدى ءدىن ماماندارىن دايارلايتىن وقۋ ورنىندا فيھق (مۇسىلمان زاڭى), اقيدا ء(دىني سەنىم), قاسيەتتى قۇران ىلىمدەرى, يسلام فيلوسوفياسى, اراب ءتىلى, اراب مادەنيەتى ءتىلىن وقىتۋ ادىستەمەسى سەكىلدى ت.ب. پاندەردەن ەگيپەتتىك جانە قازاقستاندىق پروفەسسورلار ءدارىس وقىدى. كۇنى بۇگىنگە دەيىن وسى وقۋ ورنى ەلىمىز وتە مۇقتاج 150 يمامدار دايارلاپ, قىزمەتكە اتتاندىردى.
ال بيىل ۋنيۆەرسيتەتتەن اتالمىش ماماندىق بويىنشا 40 ستۋدەنت ديپلوم الماق. سونىڭ ەكەۋى قازىردىڭ وزىندە يمامدىق قىزمەتتى قوسا اتقارىپ ءجۇر. تۇلەكتەردىڭ دەنى الماتى, پاۆلودار, قاراعاندى, تالدىقورعان قالالارى, الماتى, شىعىس قازاقستان, باتىس قازاقستان, ماڭعىستاۋ, اتىراۋ, وڭتۇستىك قازاقستان وبلىستارىنا يمامدىق قىزمەتكە جىبەرىلەتىن بولدى. ۋنيۆەرسيتەتتى 5 ۇزدىك بىتىرۋشىگە وقۋ ورنى جانىنداعى ماگيستراتۋراعا قۇجاتتارىن تاپسىرىپ, باعىن سىناۋ مۇمكىندىگى جاسالدى. ۋنيۆەرسيتەت قابىرعاسىندا مۇباراك قۇراندى تولىق جاتتاپ, شەتەلدەردەگى قاسيەتتى قۇران جارىستارىنا قاتىسىپ جۇرگەن ۇزدىك شاكىرت قۇرمەت سماعۇلوۆ نۇر-مۇباراك ۋنيۆەرسيتەتىنە قىزمەتكە قالدىرىلدى.
ءدىنباسى نۇر-مۇباراك ەگيپەت يسلام مادەنيەتى ۋنيۆەرسيتەتىن ءبىتىرۋشى شاكىرتتەردى جەكە-جەكە قابىلداپ, سۇحباتتاستى.
ءسويتىپ, ەلىمىزدىڭ بار ايماعىنا بولاشاق يمامداردى جىبەرۋگە شەشىم قابىلدادى.
باس ءمۇفتي ستۋدەنتتەرگە رەسپۋبليكادا اتقارىلىپ جاتقان ءدىني جۇمىستار, يمام قانداي بولۋ كەرەك, ءدىن قىزمەتىنىڭ جاۋاپكەرشىلىگى, يسلامي عىلىم, ءبىلىم تۋرالى اڭگىمەلەپ, اقىل-كەڭەستەر بەردى.
ءدىنباسى سونداي-اق, ەلىمىزدە 2007 جىلى اشىلعان “استانا” جانە شىمكەنت مەدرەسەلەرىنىڭ تۇڭعىش تۇلەكتەرىمەن دە كەزدەستى. ۇشىراسۋدىڭ ماقساتى – تۇلەكتەر ءبىلىمىن تەكسەرىپ, جوعارىدا ايتىلعانداي قىزمەتكە ءبولۋ. الدىمەن ول شىمكەنت مەدرەسەسىنىڭ شاكىرتتەرىمەن كەزدەستى. وڭتۇستىكتىك بولاشاق يمامدار دا, وبلىستارعا اتتاناتىن بولدى.
ءبىر ايتا كەتەتىن ءجايت, قمدب مەن مونعوليا ءدىني باسقارمالارى ءوزارا ىنتىماقتاستىق كەلىسىمى نەگىزىندە كەلگەن 2 شاكىرت ءوز ەلىنە جىبەرىلدى.
ءدىنباسى “استانا” مەدرەسەسىنىڭ دە العاشقى بىتىرۋشىلەرىمەن كەزدەستى. ولار دا ەلىمىزدىڭ ءار ايماعىنا يمامدىق قىزمەتكە ءبولىندى.
شاكىرتتەردىڭ باسىم بولىگى اتالمىش وقۋ ورىندارىن “وتە جاقسى”, “جاقسى” دەگەن باعامەن ءتامامداعان. اتاپ ايتار بولساق, شىمكەنت مەدرەسەسىنىڭ 41 تۇلەگىنىڭ 20-سى “وتە جاقسى”, ال 10-ى “جاقسى” دەگەن باعا العان ەكەن. ال استانا مەدرەسەسىن 24 شاكىرت بىتىرسە, سولاردىڭ 7-ءۋى “وتە جاقسى”, ال 10-ى “جاقسى” دەگەن باعاعا يە بولعان. اتاپ وتەرلىك ءجايت, بارلىق تۇلەكتەر اراب ءتىلىنىڭ گرامماتيكاسىن ويداعىداي مەڭگەرگەن, قاسيەتتى قۇراندى دا جاقسى وقيدى. ءۇش وقۋ ورنى تۇلەكتەرى اراسىندا قاسيەتتى قۇراننىڭ ءبىراز بولىگىن جاقسى بىلەتىندەر كوپ بوپ شىقتى. ءبىر سوزبەن ايتقاندا, بولاشاق ءدىن قايراتكەرلەرى كوڭىلدەن شىقتى. بۇل رۋحاني ومىرىمىزدەگى ەستە قالارلىق ەلەۋلى وقيعا بولدى.
ءدىنباسى, شەيح ءابساتتار قاجى دەربىسالى حازرەت وبلىستارداعى وكىل يمامدارعا جاۋاپتى قىزمەتكە اتتانعالى وتىرعان ءبىلىمدى جاس ماماندارعا تيىسىنشە جاعداي جاساپ, حالىقپەن قالاي تىعىز قارىم-قاتىناس ورناتۋ جولدارى مەن جۇيەلى جۇمىس جاساۋ ادىستەرىن ۇيرەتىپ, قولعابىس ەتۋدى تاپسىردى. ءسوز سوڭىندا باس ءمۇفتي مەدرەسە باسشىلارىنا العىسىن بىلدىرە كەلە, العاشقى تۇلەكتەرگە ەل ىنتىماعى مەن بىرلىگىن نىعايتۋعا, اسىل ءدىنىمىزدىڭ وركەنيەتتى جولمەن كەڭ قانات جايۋىنا ايانباي قىزمەت ەتە بەرۋگە دەگەن تىلەكتەستىگىن جەتكىزدى. ءسوز سوڭىندا ەلباسى مەن ەل قامىندا جۇرگەن ازاماتتارىمىزعا اماندىق تىلەپ, اللا تاعالا ەلىمىزگە ابىروي, اۋىزبىرلىك, بەيبىتشىلىكتى ءناسىپ ەتكەي دەپ باتا بەردى.
“ەگەمەن-اقپارات”.