تاۋەلسىزدىك مەرەكەسىنىڭ ەرتەسىندە-اق وسكەمەندەگى ورتالىق الاڭعا شىرشا تىكتەلىپ, بەزەندىرۋگە كىرىسكەن. بىراق بۇل جولعى جاساندى شىرشا بۇرىنعىدان وزگەرەك. الەم-جالەم ويىنشىعى جوق. جان-جاعىنا قازاقتىڭ قوشقار ءمۇيىز ويۋى جاپسىرىلعان.
جاڭا جىل قارساڭىندا وسكەمەن شاھارى جالت-جۇلت ەتىپ, ەرتەگىدەگىدەي ەرەك كەيىپكە ەنەدى. اسىرەسە ورتالىق الاڭ وزگەشە قۇلپىرادى. جاسىل جەلەكتى ورماننان قيىپ اكەلمەيدى, جاساندى. دۇرىس تا بۇل. بەس كۇنگى قىزىققا بولا جايقالىپ تۇرعان شىرشاعا بالتا شابۋ – قيانات. دەگەنمەن, كەيبىر اۋىلداردا شىرشا كەسىپ, الاڭعا ورناتۋ الدە دە تىيىلماي تۇر. ال وبلىس ورتالىعىندا نەشە جىلدان بەرى مەرەكەنى جاساندى شىرشامەن-اق وتكىزىپ ءجۇر. ال بيىلعى ساۋكەلە ءتارىزدى شىرشا ەلدى ەلەڭ ەتكىزبەي قويمادى. قوعام پىكىرى دە ەكىگە جارىلدى. ءبىرى شىرشا جاڭا جىلدىق كوڭىل كۇي سىيلاۋى كەرەك دەسە, ەندى ءبىرى ويۋلى شىرشا قازاقى رۋحىمىزدى كوتەرىپ سالدى دەستى.
– وسكەمەندەگى الاڭعا ورناتىلعان جاڭاجىلدىق شىرشا ءبىرازىنىڭ بەتپەردەسىن شەشتى. ۇلتارالىق تاتۋلىقتى قولدامايتىن, كەرىسىنشە ورشىتە تۇسكىسى كەلگەن وزگە ۇلت وكىلدەرى سۋ بەتىنە قالقىپ شىعا كەلدى. ال قالا باسشىلىعى بيىل باتىل قادامدار جاساي ءبىلدى. ءدال وسكەمەنگە ورناتىلعان شىرشا قازاقستاننىڭ ەشبىر قالاسىندا جوق. شىرشانى قازاقىلاندىردىق. ەرتەڭ اياز اتاعا دا قازاقتىڭ شاپانىن كيگىزسەك, ارتىق بولمايدى, – دەيدى قوعام بەلسەندىسى ايان قالىمبەك.
ءيا, ساۋكەلە ىسپەتتەس شىرشانى كەمسىتىپ, كەلەكە ەتكەن ەل دە جوق ەمەس. قالاي بولعاندا دا, وسكەمەننىڭ وزگەشە شىرشاسى كوپشىلىكتىڭ نازارىن وزىنە اۋدارماي قويمادى. شىرشانى قىزىقتاپ سۋرەتكە ءتۇسىپ جۇرگەن جۇرتتىڭ قاتارى قالىڭ...
وسكەمەن