بالالار تولقۇجاتىنىڭ قولدانۋ مەرزىمىن قىسقارتۋ ۇسىنىلدى

«بالالارعا ارنالعان تولقۇجات بەرۋدە حالىقارالىق تاجىريبەنى ەسكەرە وتىرىپ, ونىڭ مەرزىمىن قىسقارتۋدى ۇسىنامىز. سەبەبى بالالاردىڭ سىرتقى كەلبەتى تەز وزگەرەدى. ياعني بالالار تولقۇجاتىن 12 جاسقا دەيىن ەمەس, 5 جاسقا دەيىن ەتىپ بەرىپ, سودان سوڭ قايتا اۋىستىرسا. 12 جاستان 16 جاسقا دەيىن بەرىلەدى. ودان ءارى تولقۇجات پەن جەكە كۋالىكتىڭ جارامدىلىعى ادەتتەگىدەي 10 جىل بولىپ قالا بەرەدى.

سونىمەن قاتار كامەلەتكە تولماعان بالالارعا بەرىلەتىن تولقۇجات ءۇشىن مەملەكەتتىك باج سالىعىن 8 اەك-تەن (23 336 تەڭگە) 4 اەك-كە (11 668 تەڭگە) دەيىن تومەندەتۋ ۇسىنىلادى», دەدى قر پارلامەنتى ءماجىلىسىنىڭ دەپۋتاتى ەرلان سمايلوۆ ءماجىلىستىڭ زاڭناما جانە سوت-قۇقىقتىق رەفورما كوميتەتىنىڭ وتىرىسىندا جاساعان بايانداماسىندا.

ونىڭ ايتۋىنشا, قازاقستاندىقتار جىل سايىن 600-700 مىڭ تولقۇجات راسىمدەيدى ەكەن. ونىڭ 20%-ى بالالار تولقۇجاتى.

«سوڭعى 5 جىل ىشىندە ەلىمىزدە 3 035 956 ەرەسەك ازاماتتارعا ارنالعان تولقۇجات جانە 610 061 بالالار تولقۇجاتى دايىندالىپتى. بالالار تولقۇجاتىنىڭ مەرزىمىن قىسقارتۋعا قاتىستى جوعارىدا ايتىپ وتكەنىمدەي, ولاردىڭ سىرتقى كەلبەتى تەز وزگەرەدى. ياعني بالا تەز وسەدى دە, 2-3 جىلدان كەيىن تولقۇجاتتاعى سۋرەتى, ءدال سول كەزدەگى تۇرىنە سايكەس كەلمەي جاتادى. سول سەبەپتى كەيدە اتا-انالارعا جاڭا تولقۇجات جاساتۋعا تۋرا كەلەدى. بۇل اتا-انانىڭ قالتاسىنا جۇك تۇسىرەدى, اسىرەسە وتباسىندا 2-3 بالا بولسا», دەيدى ول.