جاقىندا ەلباسى نۇرسۇلتان نازارباەۆ «ەلدىكتىڭ جەتى تۇعىرى» اتتى قاعيداتتار جيىنتىعىن تانىستىردى. ەگەمەندىكتىڭ وتىز جىلدىعىنا تۇسپا-تۇس كەلگەن بۇل جاڭا ۇندەۋ قازاق ەلىنىڭ جاڭا ساياسي باعدارىن انىقتاپ, بىرلىگى مەن تۇتاستىعىن بەكەمدەيتىن جاڭا قۇجاتقا اينالماق. وسى ورايدا ەل ىشىندە اتقارىلعان ىستەردىڭ بارلىعى بەرەكەنى ارتتىرۋعا, بىرلىكتى بەكەمدەۋگە باعىتتالىپ وتىرعانىن ايتۋىمىز كەرەك.
تاۋەلسىزدىكتىڭ 30 جىلىندا جەتكەن جەتىستىگىمىز مەن العان اسۋىمىز از ەمەس. وسى جولدا مەملەكەتتىڭ قۇرىلىمدىق جۇيەسىنىڭ قالىپتاسۋى جولىندا ايانباي ەڭبەك ەتكەن ەلباسى نۇرسۇلتان نازارباەۆتىڭ قاجىرى مەن قايراتى بۇگىنگى كۇنىمىزدىڭ جارقىن بولۋى ءۇشىن جۇمسالعانىن ايتا كەتۋىمىز كەرەك.
بيىل جىل باسىندا پارلامەنت ءماجىلىسى جانە بارلىق دەڭگەيدەگى ءماسليحات دەپۋتاتتارىن سايلاۋعا جەتىسۋ جەرىنىڭ ازاماتتارى بەلسەندى قاتىسىپ, 360 دەپۋتاتتىق مانداتتى قولدادى. ولاردىڭ ارقايسىسى ءار پارتيانىڭ وكىلى سانالادى. اتاپ ايتقاندا 304 دەپۋتات Nur Otan پارتياسىنىڭ اتىنان حالىق قالاۋلىسى اتانسا, «اۋىل» پارتياسىنان – 32, «اقجول» پارتياسىنان – 7, قازاقستان حالىقتىق پارتياسىنان – 15, «ادال» پارتياسىنان 2 ادام ءماسليحاتتان ورىن الدى. وبلىستىق ماسليحاتتاعى 45 دەپۋتاتتىڭ 37-ءسى Nur Otan پارتياسىنىڭ, تورتەۋى «اۋىل» پارتياسىنىڭ, تورتەۋى قازاقستان حالىقتىق پارتياسىنىڭ اتىنان ءسوز سويلەپ, حالىقتىڭ مۇڭ-مۇقتاجىن جەتكىزىپ ءجۇر. وسىنشا دەپۋتاتتىڭ 14-ءى ايەل بولسا, 8 دەپۋتات 35 جاسقا تولماعان. مىنە, وسى كورسەتكىشتەر ەلىمىزدەگى دەموكراتيالىق قادامداردى تانىتسا كەرەك. اسىرەسە, جەتىسۋ جەرىندەگى جاريالىلىق پەن اشىقتىقتان حابار بەرەدى.
قازىرگىدەي قىم-قۋىت زاماندا كەز كەلگەن سالانىڭ جۇمىسىن بىلىكتى مامان, ءبىلىمدى قىزمەتكەر جانداندىراتىنى بەلگىلى. بۇل ەڭ الدىمەن جۇمىس ساپاسىنا اسەر ەتەتىنى انىق. سوندىقتان الماتى وبلىسىنداعى بارلىق دەڭگەيلى ءماسليحاتتاردىڭ دەپۋتاتتارى نەگىزىنەن قوعامنىڭ تامىرىن تانيتىندىعىمەن, زاماناۋي ءبىلىمدى مەڭگەرگەنىمەن, ءاربىر سالانىڭ قيىندىعى مەن تابىسىن جەتىك بىلەتىندىگىمەن ەرەكشەلەنەدى.
جالپى, وبلىستىق ءماسليحاتتا 6 تۇراقتى كوميسسيا جۇمىس ىستەيدى. تۇرعىن ءۇي كوممۋنالدى شارۋاشىلىعى جانە قۇرىلىس ماسەلەلەرى, اۋىل شارۋاشىلىعى, جەر قاتىناستارى, ۆەتەريناريا جانە ەكولوگيا ماسەلەلەرى, ەكونوميكا, بيۋدجەت, قۇقىقتىق ءتارتىپ, سىبايلاس جەمقورلىققا قارسى كۇرەس, دەپۋتاتتىق وكىلەتتىلىكتەر مەن ەتيكا ماسەلەلەرى, يندۋستريالىق-يننوۆاتسيالىق, كولىكتىك-لوگيستيكالىق دامۋ, كىشى جانە ورتا بيزنەستى, تۋريزم مەن سپورتتى قولداۋ ماسەلەلەرى, دەنساۋلىق ساقتاۋ, ءبىلىم, حالىقتى الەۋمەتتىك قورعاۋ جانە مادەنيەت ماسەلەلەرى, ءدىن, ءتىل, ەتنوسارالىق قاتىناستار, ىشكى جانە جاستار ساياساتى ماسەلەلەرى بويىنشا كوميسسيالار جىل باسىنان بەرى 12 وتىرىس وتكىزىپ, 24 شەشىمنىڭ قابىلدانۋىنا ىقپال ەتتى.تۇرعىنداردىڭ جاي-كۇيى مەن مۇڭ-مۇقتاجىن ءوز اۋزىنان ەستىپ, ءتۇيىندى ماسەلەنى شەشۋدىڭ جولدارىن قاراستىراتىن دەپۋتاتتار Nur Otan, «قازاقستان حالىقتىق پارتياسى», «اۋىل», «اقجول», «ادال» پارتيالارىنىڭ اۋداندىق, قالالىق جانە وبلىستىق قوعامدىق قابىلداۋ كابينەتتەرىندە قوعامدىق قابىلداۋ وتكىزىپ وتىرادى. اتاپ ايتقاندا, بارلىق دەڭگەيدەگى ءماسليحاتتىڭ 360 دەپۋتاتى 693 ادام كوتەرگەن ماسەلەنىڭ 391-ءىنىڭ وڭتايلى شەشىلۋىنە ىقپال ەتتى. قالعان 302 ماسەلە بويىنشا ءتيىستى تۇسىنىكتەمە بەرىلىپ, باقىلاۋعا الىندى. نەگىزگى مىندەتى – ەل-جۇرتتىڭ مۇڭ-مۇقتاجىن بيلىك نازارىنا جەتكىزۋ. سول ارقىلى ماسەلەنىڭ شەشىلۋىن قامتاماسىز ەتۋ بولعاندىقتان حالىق قالاۋلىلارى ۇنەمى تۇرعىندار مەن مەملەكەتتىك ورگاندار اراسىنداعى مامىلەنى بەكىتىپ كەلەدى.
قازاق حالقىنىڭ باستى ۇلتتىق قۇندىلىعىنىڭ ءبىرى – دانالىق. بۇعان تەرەڭ ماعىنا بەرەتىن ءبىر اۋىز سوزبەن ەلدىڭ داۋىن, ەردىڭ قۇنىن شەشكەن حالقىمىزدىڭ ماقال-ماتەلدەرى دالەل. سونىڭ بىرىندە: «ادامگەرشىلىككە ارنالعان ءۇش ساۋاپ بار: شولگە قۇدىق قازعان ءبىر ساۋاپ, وزەنگە كوپىر سالعان ءبىر ساۋاپ, جولعا اعاش ەككەن ءبىر ساۋاپ» دەلىنەدى. راس ءسوز. وبال مەن ساۋاپتى ايىرا بىلگەن دەپۋتاتتارىمىز مۇقتاجدارعا قايىرىمدىلىق جاساۋدان تانعان ەمەس. بيىل جىل باسىنان دەپۋتاتتاردىڭ قاتىسۋىمەن 3003 ادامعا 87 ميلليون 578 مىڭ 500 تەڭگەنىڭ قايىرىمدىلىق قىزمەتى كورسەتىلدى.
جانبولات جورگەنباەۆ,
الماتى وبلىستىق ءماسليحاتىنىڭ حاتشىسى