اۋىل شارۋاشىلىعى ءمينيسترى ەربول قاراشوكەەۆ كۇزگى جيىن-تەرىم كوپ مەملەكەت ءۇشىن ءساتسىز بولعانىن ايتا كەلە, كورتوپ ەكسپورتىن شەكتەۋ تۋرالى شەشىم قابىلدانعانىن مالىمدەدى, دەپ حابارلايدى Egemen.kz.
ۆەدومستۆوارالىق كوميسسيا كورتوپ ەكسپورتىن شەكتەۋدى كوكتەمگە دەيىن ىشكى نارىقتى تولىق قامتىپ, ءونىم باعاسىن ارتتىرماۋ ماقساتىندا قابىلداعان.
«كورشى ەلدەردى قاراساق, مىسالى قىرعىزستانداعى كارتوپتىڭ كوپ بولىگى ەكسپورتتالعان. وزبەكستان دا سىرتقى نارىققا تاۋەلدى. ال رەسەيدە بيىل 8,3 پروتسەنتكە از كارتوپ الىنعان. ياعني, قازاقستاندىق ءونىمدى تۇگەل ساتىپ الۋى مۇمكىن دەگەن ءسوز. وسى جاعدايلاردى ەسكەرە وتىرىپ, ۆەدومستۆوارالىق كوميسسيا ەكسپورتتى شەكتەۋ تۋرالى شەشىم قابىلدادى», دەدى ەربول قاراشوكەەۆ.
كورشى ەلگە كارتوپتىڭ 80 مىڭ تونناسى قاجەت. مينيستر «ونىڭ ءبارىن ءبىز ەكسپورتتايتىن بولساق, كوكتەمگى جاعداي ءبىر ايدا قايتالانار ەدى» دەيدى. سەبەبى ەلدە القاپ كەڭەيتىلگەنمەن, قامبا بىلتىرعىدان 100 مىڭ تونناعا از. 3 ملن 900 مىڭ توننا كارتوپ جينالعان.
قازىر قورداعى ءونىم مەن ىشكى سۇرانىس قايتا سارالانىپ جاتىر. ارتىلعان كارتوپ سىرتقا شىعارىلۋى مۇمكىن. دەگەنمەن, ونىڭ ءوزى جەتكىلىكسىز بولادى. ويتكەنى, سۇرانىستى وتەۋ مۇمكىن ەمەس. ەلىمىز جىل سايىن 40-50 مىڭ توننا ءونىمدى يمپورتتايدى. ەندى قۇزىرلى ماماندار وندىرۋشىلەرگە ىشكى نارىققا كوڭىل بولۋگە كەڭەس بەرەدى.