قر دەنساۋلىق ساقتاۋ ءمينيسترىنىڭ مىندەتىن اتقارۋشى جاندوس بۇركىتباەۆ قازاقستاندا كوروناۆيرۋس جۇقتىرۋ جاعدايلارى ازايعانىن ايتتى, دەپ حابارلايدى Egemen.kz.
«رەسپۋبليكادا وڭ پتر تەستىمەن كوروناۆيرۋس ينفەكتسياسىنىڭ 984 079 جاعدايى جانە تەرىس پتر تەستىمەن 83 732 جاعدايى تىركەلدى, ناۋقاستاردىڭ 96%-دان استامى ساۋىعىپ شىقتى. 18 852 ناۋقاس ەمدەۋدى جالعاستىرۋدا. جالپى, قازاقستاندا سوڭعى ءتورت ايدا سىرقاتتانۋ 16 ەسەگە تومەندەدى», دەدى جاندوس بۇركىتباەۆ ۇكىمەت وتىرىسىندا.
ونىڭ ايتۋىنشا, تامىز ايىمەن سالىستىرعاندا 1,2 ەسە تومەندەۋ بايقالادى جانە رەپرودۋكتيۆتىلىك سانى - 0,9 قۇرايدى.
«ينفەكتسيالىق جانە رەانيماتسيالىق توسەكتەردىڭ پايدالانىلۋى 19%-دى كورسەتتى, سوڭعى ءۇش ايدا ەمدەۋدى جالعاستىراتىن ادامدار سانى 4,5 ەسەگە ازايدى (قىركۇيەك ايىنداعى 84 268-دەن جەلتوقسان ايىندا 18 852 ناۋقاسقا دەيىن)», دەدى ج. بۇركىتباەۆ.