پرەزيدەنت قاسىم-جومارت توقاەۆ «جاڭا جاعدايداعى قازاقستان: ءىس-قيمىل كەزەڭى» اتتى جولداۋىندا ورمان قورى جەرلەرىنە 2 ملرد ءتۇپ اعاش وتىرعىزۋ جونىندە تاپسىرما بەرگەنى بەلگىلى. جەر-جەرلەردە قولعا الىنعان تال ەگۋ جۇمىستارى شىعىستا دا تىڭعىلىقتى تۇردە جۇزەگە اسىپ جاتىر. وبلىستا ورمانعا ورانعان وڭىرلەر كوپ بولعانىمەن, بيىل ورمان جانە تابيعات قورعاۋ مەكەمەلەرى 4 151 گەكتار اۋماققا ورمان داقىلدارىن ەكتى.
رەسپۋبليكا بويىنشا ەڭ ۇلكەن ورمان رەزەرۆاتى «سەمەي ورمانى» اۋماعىنداعى كانونەر فيليالىندا ورنالاسقان. وندا ورتالىق ازيادا بالاماسى جوق ورمان تالىمباق كەشەنى مەن اعاش تۇقىمىنىڭ بەكەتى جۇمىس ىستەپ تۇر. كونونەر فيليالىندا يننوۆاتسيالىق تەحنولوگيالار ارقىلى جىل سايىن 3 ملن دانا جابىق تامىر جۇيەلى سەپپە كوشەتتەر وسىرىلەدى. شۆەدتىك تەحنولوگيانىڭ دامىعانى سونشالىق, كادىمگى قاراعايدىڭ سەپپە كوشەتتەرى 2 جىل ىشىندە ەمەس, بار-جوعى 70 كۇننىڭ ىشىندە ءوسىپ شىعادى. زاماناۋي ادىسپەن بۇل كەشەندە 5 جىل ىشىندە قاراعايدىڭ 15 ملن كوشەتى ءوسىرىلدى.
الداعى بەس جىلدا وبلىس اۋماعىنداعى 40,6 مىڭ گەكتار جەرگە 196,8 ملن ءارتۇرلى اعاش كوشەتتەرىن وتىرعىزۋ جوسپارلانعان. ونىڭ ىشىندە 2021-2025 جىلدارى ورمان شارۋاشىلىعى كوممۋنالدىق مەكەمەلەرى قىزمەتكەرلەرىمەن 15 مىڭ گەكتار الاڭعا 76 ملن ءتۇپ اعاش, «سەمەي ورمانى» مەملەكەتتىك ورمان رەزەرۆاتىنىڭ اۋماعىندا 119,4 ملن ءتۇپ, كاتونقاراعاي مەملەكەتتىك ۇلتتىق تابيعي پاركىنىڭ اۋماعىندا 792 مىڭ ءتۇپ اعاش وتىرعىزىلادى. سونىمەن قاتار اسۋبۇلاق, سامار ورمان شارۋاشىلىعى مەكەمەلەرىندەگى تالىمباقتاردا كوشەت ەگۋ جۇمىستارى جۇيەلى تۇردە جۇرگىزىلىپ جاتىر. بۇل تۋرالى ورمان شارۋاشىلىعى جانە جانۋارلار دۇنيەسى اۋماقتىق ينسپەكتسياسىنىڭ باسشىسى دىلدابەك ورازباەۆ ايتىپ بەرگەن.
– كەشەندى جوسپاردى ىسكە اسىرۋ ماقساتىندا بيىل وبلىستىڭ ورمان جانە تابيعات قورعاۋ مەكەمەلەرى 4 151 گەكتار اۋماققا ورمان داقىلدارىن وتىرعىزدى. سونداي-اق وتكەن جىلدارداعى ەكپەلەردى تولىقتىرۋدى ەسكەرە وتىرىپ, 23 ملن 581 مىڭ دانا اعاش وتىرعىزدى, – دەيدى دىلدابەك ءتاجىباي ۇلى.
پرەزيدەنت تاپسىرماسىنا سايكەس ورمان قورىن مولايتۋ ماقساتىندا وبلىستا ازىرلەنگەن كەشەندى جوسپار جۇمىسى ناتيجەلى جەمىسىن بەرىپ كەلەدى. وسى تۇستا ايتا كەتەرلىگى, ورمان قورىن مولايتۋ ماقساتىندا جۇمىستار جۇرگىزىلىپ جاتقانىمەن, جاسىل جەلەككە بالتا شاباتىندار دا جوق ەمەس. اسىرەسە جاڭا جىل قارساڭىندا شىرشا كەسۋ فاكتىسى ءىشىنارا بولىپ تۇرادى. ال مەملەكەتتىك مەكەمەلەرگە شىرشا زاڭدى تۇردە بوساتىلادى ەكەن. ماسەلەن, بىلتىر وبلىستا 760 ءتۇپ شىرشا مەكتەپ, بالاباقشالارعا بەرىلگەن. كوك بازاردا ساتىلىپ تۇراتىن شىرشالاردى كاسىپكەرلەر كوبىنەسە رەسەيدەن جەتكىزەدى. ودان باسقا ايماقتا ونعا جۋىق جەكە مەنشىك تالىمباقتار بار. ولار دا شىرشالارىن زاڭدى تۇردە ساتا الادى.
جاڭا جىل قارساڭىندا بەلگىلى مولشەردە جاسىل شىرشا قيىلعانىمەن, ورنى ءۇش ەسە, ءتورت ەسە تولىعىپ وتىراتىنى انىق. وعان جوعارىدا كەلتىرىلگەن تسيفرلار دالەل. دەيتۇرعانمەن, ءۇش-ءتورت كۇندىك شاراعا جاساندى شىرشا پايدالانۋعا دا بولار ەدى. ايتىپ وتكەندەي, ورمان قورىن مولايتۋ ماقساتىنداعى 2025 جىلعا دەيىنگى پرەزيدەنت تاپسىرماسى وبلىستا جالعاسىن تاباتىنى انىق.
شىعىس قازاقستان وبلىسى