ەلباسى نۇرسۇلتان نازارباەۆ «تاۋەلسىزدىك تاعىلىمى» ماقالاسىندا ەل ءۇشىن ەڭ باستى قۇندىلىق – تاۋەلسىزدىك ەكەنىن, ول قازاقتىڭ باعىنا بەرىلگەن ماڭگىلىك سىي ەكەنىن اتاپ ءوتتى.
ءيا, تۇڭعىش پرەزيدەنت ايتقانداي, تاۋەلسىزدىك – اتا-بابالارىمىزدىڭ ازاتتىق جولىنداعى جان الىسىپ, جان بەرىسكەن سان عاسىرلىق كۇرەسىنىڭ جالعاسى. جالپى, ء«بىز تاۋەلسىزدىككە قالاي قول جەتكىزدىك؟» دەگەن ساۋالعا ايتىلار جاۋاپ سان قىرلى. ەل ىشىندە ء«بىز تاۋەلدى بولاتىن ەل قالماعاندىقتان تاۋەلسىزدىگىمىزدى جاريالادىق» دەگەن پىكىردى جاقتايتىندار جوق ەمەس. شىنتۋايتىندا, تاۋەلسىز ەل بولۋ تاۋەلسىزدىكتى جاريالاۋمەن شەكتەلمەيدى. تاۋەلسىزدىگىن جاريالاسا دا الپاۋىت ەلدەردىڭ جەمساۋىندا جۇتىلىپ كەتكەن ەلدەردىڭ تاريحى – سونىڭ دالەلى.
ەلباسى نۇرسۇلتان نازارباەۆ كەزەكتى ماقالاسىندا تاۋەلسىزدىكتى جاريالاۋعا دايىندىقتىڭ قانداي جاعدايدا جۇرگىزىلگەنى باياندالدى. بۇل دەرەكتى ەلباسى سوزىمەن ساباقتاساق «ساياساتتىڭ قىزۋى كوتەرىلىپ, گورباچەۆ پەن ەلتسيننىڭ تەكەتىرەسى شەگىنە جەتىپ, ءبىر كەزدەرى تەمىردەي تارتىپكە نەگىزدەلگەن ورتالىقتاعى باسشىلىقتان بەرەكە كەتكەن سول تۇستا قازاقستان تاراپىنان جىبەرىلگەن جالعىز قاتەلىكتىڭ ءوزى ورنى تولماس تراگەدياعا اكەپ سوقتىرۋى ابدەن مۇمكىن ەدى. ءبىز اشۋدى اقىلعا, اسىعىستىقتى سابىرعا جەڭدىرىپ, ۇنەمى ءالىپتىڭ ارتىن باعىپ, اڭىسىن اڭدۋمەن بولدىق».
ادامدار عانا ەمەس, قوعام دا تاريحتان تىرەك ىزدەيدى. بۇل – الەمدىك تاجىريبەدە بار ءۇردىس. ودان ءبىز دە قالىس قالا المايمىز. ەلباسى اتاپ وتكەندەي, دانا بابالارىمىز ءوزىن عانا ەمەس, ادال عۇرپىن, دارحان كوڭىلىن, تازا ءتىلىن, اسەم ءانى مەن قوڭىر كۇيىن, مايەكتى مادەنيەتى مەن باي ادەبيەتىن قوسا ساقتاپ, ۇرپاعىنا اماناتتاپ, بۇگىنگە جەتتى. ەندى وسى قاسيەتتى بورىشتى كەلەر ۇرپاققا جەتكىزۋ – بىزگە سىن. دەمەك, تاۋەلسىزدىك اماناتىنا ادال بولۋ دا بىزگە سىن.
ەلباسى نۇرسۇلتان نازارباەۆ تاۋەلسىزدىك ءۇشىن كۇرەس تاۋەلسىزدىككە دەيىن ەمەس, تاۋەلسىزدىكتەن كەيىن باستالعانىن ءجيى ايتادى. ءبىز مۇنى كۇندەلىكتى ومىردە ءوز تاجىريبەمىزدەن بىلەمىز. بيزنەستە تەحنولوگيالىق تىزبەك دەگەن ۇعىم بار. ەندىگى ماقسات سول تەحنولوگيالىق تىزبەكتەن ءوز ورنىمىزدى ايقىنداۋ. مۇنىڭ ايتۋعا عانا وڭاي ەكەنى بەلگىلى.
ءبىزدىڭ بۋىن, اسىرەسە ءومىرىن بيزنەسپەن بايلانىستىرعان بۋىن – تاۋەلسىزدىكتىڭ ەكونوميكالىق قىرىنا باسىمدىق بەرىپ, بۋىنى قاتقان بۋىن. قازىر بيزنەس وكىلدەرىنە ايتىلار سىن دا, وكپە دە كوپ. يمپورتتاعى قازاق تاۋارلارىنىڭ كەمشىندىگى – بىزگە قاراتا ايتىلاتىن وكپەگە نەگىز بولاتىنىن تۇسىنەمىن. مەنىڭ بيزنەستەگى دوستارىمنىڭ ارقايسىسى ءۇشىن ىشكى نارىقتاعى قازاقستاندىق تاۋاردىڭ ۇلەس سالماعىن كوبەيتۋدەن ارتىق ماقسات جوق. وسى باعىتتا جۇمىس ءجۇرىپ جاتىر. ينۆەستيتسيانىڭ تابيعاتى ساياسي تۇراقتى ەلدەرگە باسىمدىق بەرەدى. حالىقارالىق تاجىريبەدە بيلىكتىڭ بەيبىت جاعدايدا, ءوزارا كەلىسىمىمەن اۋىسۋى – ساياسي تۇراقتىلىق كەپىلى. دەمەك, بيزنەس ينتەگراتسياسى ءۇشىن ساياسي تۇراقتىلىقتان ارتىق ەشتەڭە جوق. بيزنەستىڭ تابيعاتى تىنىشتىقتى قالايدى.
ەلباسى كەشەگى ماقالاسىندا قازاقستان تىزگىنىن ۇستاعان ەكىنشى تۇلعا – پرەزيدەنت قاسىم-جومارت توقاەۆتىڭ كەزدەيسوق ۇسىنىلماعانىن ايتتى. «وتىز جىلعا جۋىق ەل باسقارعان كەزىمدە مەن جانىما قانشاما ازاماتتى سەرىك ەتىپ, كوپتەگەن شاكىرت تاربيەلەدىم. سولاردىڭ ىشىندە ۇكىمەت باسقارعان, بىرىككەن ۇلتتار ۇيىمى باس حاتشىسىنىڭ ورىنباسارى رەتىندە جاھاندىق ساياساتقا جەتىكتىگىن تانىتقان, تاۋەلسىزدىكتىڭ العاشقى جىلدارىنان باستاپ قاسىمنان تابىلعان ناعىز پاتريوت, جوعارى بىلىكتى كاسىپقوي تۇلعا قاسىم-جومارت كەمەل ۇلى توقاەۆتى پرەزيدەنتتىك قىزمەتكە ۇسىندىم. سايلاۋدا حالىقتىڭ باسىم كوپشىلىگى ونى قولدادى. وسىلايشا, ءبىز حالقىمىزدىڭ اۋىزبىرلىگىن, ساياساتتاعى ساباقتاستىعىمىزدى كۇللى الەم قوعامداستىعىنا تاعى ءبىر قىرىنان تانىتا بىلدىك», دەدى ەلباسى.
قازىر دە مەملەكەت باسشىسىنىڭ باستاماسىمەن بيزنەسكە ۇلكەن قولداۋلار كورسەتىلىپ, ءناسىبىن كاسىپتەن تاۋىپ جۇرگەن ازاماتتار ءۇشىن كوپتەگەن باعدارلاما قولعا الىندى. قازىر ورتاشا ەسەپپەن 3,5 ملن قازاقستاندىق بيزنەس سالاسىندا ءجۇر. بۇل – 19 ملن حالقى بار قازاقستان ءۇشىن ۇلكەن كۇش.
ماحامبەت اساباەۆ,
كاسىپكەر, KazComfort
جشس باس ديرەكتورى