تاۋەلسىزدىكتىڭ 30 جىلىن تويلاۋ دەگەنىمىز – سالتاناتتى ءىس-شارالار وتكىزۋ عانا ەمەس, ەڭ الدىمەن, ويلاۋ, ويلانۋ, وتكەن جولدى سارالاۋ. بۇل رەتتە, بيىلعى مەرەيلى جىل قازاقستاننىڭ تۇڭعىش پرەزيدەنتى – ەلباسى نۇرسۇلتان نازارباەۆتىڭ ەسىمىمەن تىكەلەي بايلانىستى.
ەندەشە ەلباسىنىڭ «تاۋەلسىزدىك تاعىلىمى» اتتى ماقالاسى ارقىلى ەگەمەن ەلدىڭ ءجۇرىپ وتكەن جولىن سارالاۋى, ونى وسكەلەڭ ۇرپاققا وسيەت رەتىندە جەتكىزۋى ماڭىزدى ماسەلە دەۋگە بولادى. سوندىقتان ەلباسىنىڭ وتكەن كەزەڭدەگى وقيعالاردى ويعا الىپ, تاۋەلسىزدىكتىڭ قانداي قيىندىقپەن جاريالانعانى, سول جىلدارداعى پارلامەنتتەگى ايتىس-تارتىس تۋرالى ايتىپ وتىرعانىندا ۇلكەن ءمان بار.
«ارعىدا ساق, عۇن بابالارىمىز, بەرىدە قاھارمان تۇرىك اتالارىمىز الاساپىران زاماندارداعى الاقۇيىن داۋىلدارعا توتەپ بەرىپ, ۇلى دالادا ۇلىق ۇلىس قۇردى. تالاي جۇرت الاپات سوعىستار مەن ارپالىسقان ايقاستاردا ۇدەرە كوشىپ, بورداي توزىپ, تاستاي ۇگىلىپ, قۇمداي شايىلىپ كەتكەن زامانداردا قازاقتار تۇرىك جۇرتىنىڭ اتا قونىسىن, قارا شاڭىراعىن ساقتاپ قالدى», دەيدى تۇڭعىش پرەزيدەنت – ەلباسى نۇرسۇلتان نازارباەۆ.
راسىمەن دە, ۇلتىمىز ۇلى دالا توسىندە ۇلىق ۇلىس قۇرا وتىرىپ, بايىرعى قونىسىن دا, سالت-ءداستۇرى مەن مادەنيەتىن دە, ءتىلىن دە, قايسار رۋحىن دا ساقتاپ قالدى. زامانا داۋىلى ديىرمەننىڭ تاسىنداي شىر اينالعان تۇستا دا حالقىمىزدىڭ ۇنتاقتالىپ ۇگىلىپ, قيىندىقتان بەلى بۇگىلىپ كەتكەن جوق. سولاي بولا تۇرعانىمەن, ەگەمەندىك ەلىمىزگە اسپاننان سالبىراپ تۇسە سالماعانى دا انىق. بۇل جونىندە ەلباسىنىڭ ماقالاسىندا دا جان-جاقتى باياندالعان. ەڭ باستىسى, تاۋەلسىزدىك حالقىمىزدىڭ عاسىرلار بويعى اڭساعان ارمانى, ۇلتتىڭ ۇلى مۇراتى, ەكىنىڭ ءبىرىنىڭ باعىنا بۇيىرا بەرمەيتىن باعا جەتپەس بايلىعى. ال وعان داۋىرلەر بويى جالعاسىپ كەلە جاتقان تاريحي ءداستۇر مەن قازاق حالقىنىڭ ازاتتىققا دەگەن قۇلشىنىسىنىڭ, تالپىنىسىنىڭ, وتانداستارىمىزدىڭ جىلدار بويى ءۇردىسى ۇزىلمەگەن قايسار كۇرەسىنىڭ ناتيجەسىندە قول جەتكىزدىك. ەگەمەندىك – سول ۇلتتىق ۇمتىلىستاردىڭ زاڭدى قورىتىندىسى.
ايدوس سارىم,
پارلامەنت ءماجىلىسىنىڭ دەپۋتاتى