دوستارىم كەلسە قارسى الۋ ءۇشىن,
قوسىلىپ بىرگە ءان سالۋ ءۇشىن,
كوگىلدىر تۋعا,
ەگەمەن ەلگە,
تۋعان جەرىمدە تامسانۋ ءۇشىن,
ورالدىم ساعان, اقجايىق! – دەگەن جولدار مەنىڭ جۇرەگىمنەن شىققان شىنايى قۋانىش جىرى ەدى! ەدىلىنەن ايىرىلعان ۇلتىمىز جايىعىنىڭ ءبىر جاعالاۋىن عانا مەكەندەگەن ولكەدە بابالار زارىن تىڭداپ ءوستىم عوي. ءبىزدىڭ ۇرپاققا ەركىندىك تاڭى بۇيىردى! ول تاڭنىڭ بەيبىت اتقانىنان وتكەن قانداي باقىت بولۋى مۇمكىن!
مۇنى ەستى ازاماتتار تەگىس ءتۇسىنۋى كەرەك.
ەلباسىمىزدىڭ «تاۋەلسىزدىك تاعىلىمى» ماقالاسى زۋلاپ وتكەن جىلداردى قايتا ەسكە ءتۇسىردى. ءيا, ءبارى راس, ءبىز دە بارىنە كۋامىز.
بەيبىت اسپان استىندا كوك تۋىمىز جەلبىرەدى, كەۋدەنى كەرىپ ءوز ءانۇرانىمىزدى شىرقادىق. كوك ءتۇستى تولقۇجاتپەن «مەن – قازاقپىن» دەپ ساپارعا شىقتىق. جاس ۇرپاق الەم ءتىلىن مەڭگەرىپ, الەمدىك وقۋ ورىندارىنا ءبىلىم الۋعا اتتاندى!
ءومىر جولى قيىندىقسىز بولمايدى, قازاق ايەلى ۇرپاعىنىڭ قامى ءۇشىن الا قاپ ارقالاپ, بازار جاعالادىق, ول كۇندەر دە جىلجىپ ءوتتى. ونىڭ وتەمى – ديپلوم العان ۇل-قىزىمىز, ۇيلەنۋ, بەسىك تويلارى.
ۇلى دالا ۇرپاعىنا ەندى كەرەگى ەڭبەكقورلىق پەن تاتۋلىق, بىلىمدىلىك پەن تۋعان ەلگە دەگەن ماحاببات.
ءار ازامات ەلىمدى كوركەيتۋ ءۇشىن نە ىستەدىم دەپ تەبىرەنۋى كەرەك. ءار شاڭىراق يەسى ءوز ۇرپاعى الدىنداعى بورىشىن ناقتى ءتۇسىنۋى ءتيىس. ءار انا ءوز بالاسىنىڭ تاربيەسىن ۋىسىنان شىعارىپ الماۋى قاجەت.
سوزگە شەشەن حالقىمىز بىلاي دەگەن:
بالا جەتىم بولمايدى,
قاسىندا بولسا اناسى.
حالىق جەتىم بولمايدى,
باسقارسا ەلدى داناسى.
ۇلى دالامىزدىڭ ءتول ۇرپاعى ەركىندىك العان ءوز اتامەكەنىندە, بايلىعىنا ءوزى قوجالىق ەتىپ, ەندىگى جەردە جوقتىق پەن جەتىمدىك كورمەي ءوسىپ-ونسە ەكەن.
مەنىڭ تىلەگىم – بەيبىت كۇن!
اقۇشتاپ باقتىگەرەەۆا,
اقىن, قازاقستان رەسپۋبليكاسى مەملەكەتتىك سىيلىعىنىڭ لاۋرەاتى