ەلباسىنىڭ ەل گازەتى «Egemen Qazaqstan» گازەتىنە شىققان «تاۋەلسىزدىك تاعىلىمى» اتتى ماقالاسىن ەڭ اۋەلى جاستار وقۋى كەرەك دەپ ويلايمىن. ويتكەنى قازىر ەل ىشىندە قازاقستاننىڭ كەڭەس وداعىنىڭ قۇرامىنان ەڭ سوڭعى رەسپۋبليكا بولىپ شىققانىن سان ساققا جۇگىرتەتىندەر كوپ. بۇل ماقالادا سول ساۋالعا ناقتى جاۋاپ بەرىلگەن. جالپى, تاۋەلسىزدىكتىڭ بىزگە قانداي جولمەن كەلگەنىن ناقتى بىلگىسى كەلەتىندەر ءۇشىن ماقالادا كوپ دۇنيە قامتىلعان.
م.گورباچەۆ قانشالىقتى جانتالاسا قيمىلداپ, وداقتى ساقتاپ قالۋعا ارەكەت ەتكەنىمەن, كسرو-نىڭ ىدىراۋىن توقتاتۋ مۇمكىن ەمەس ەدى. الدىمەن ەستونيا, ليتۆا جانە لاتۆيا تاۋەلسىزدىگىن جاريالادى. 1991 جىلدىڭ تامىز-جەلتوقسان ايلارىندا قالعان رەسپۋبليكالار تۇگەلدەي ءوز تاۋەلسىزدىگىن جاريا ەتتى. ەلباسى ايتقانداي, ساياساتتىڭ قىزۋى كوتەرىلىپ, گورباچەۆ پەن ەلتسيننىڭ تەكەتىرەسى شەگىنە جەتىپ, ءبىر كەزدەرى تەمىردەي تارتىپكە نەگىزدەلگەن ورتالىقتاعى باسشىلىقتان بەرەكە كەتكەن سول تۇستا قازاقستان تاراپىنان جىبەرىلگەن جالعىز قاتەلىكتىڭ ءوزى ورنى تولماس تراگەدياعا اكەلىپ سوقتىرۋى ابدەن مۇمكىن ەدى.
نۇرسۇلتان ءابىش ۇلى اشۋدى اقىلعا, اسىعىستىقتى سابىرعا جەڭدىرىپ, ءالىپتىڭ ارتىن باعىپ, اڭىسىن اڭدۋدىڭ ناتيجەسىندە, قازاقستاندى ەشقانداي قاتەلىككە ۇرىندىرماي تاۋەلسىز مەملەكەت ەتتى. ەلباسىنا بۇل جولدا باتىل قيمىلداۋ ءۇشىن بۇكىلحالىقتىق ماندات كەرەك ەدى. وسىلايشا, 1991 جىلدىڭ 1 جەلتوقسانىندا ەل تاريحىنداعى تۇڭعىش پرەزيدەنتتىك سايلاۋ وتكىزىلىپ, وندا حالىقتىڭ 98 پايىزدان استامى نۇرسۇلتان ءابىش ۇلىنا قولداۋ ءبىلدىردى. العاشقى سايلاۋعا ءبارىمىزدىڭ ءبىر ادامداي جۇمىلا قاتىسقانىمىز ءالى ەسىمدە. ءبىز الداعى بولاشاقتى سول جولى ەلباسىنىڭ قولىنا سەنىپ تاپسىردىق جانە ونىڭ دۇرىس قادام بولعانىن ناقتى سەزىندىك.
نۇرسۇلتان نازارباەۆتىڭ «الدىمەن – ەكونوميكا, سودان كەيىن – ساياسات» ۇستانىمىن ۇستانۋى قازاقستاننىڭ قارىشتاپ دامۋىنا جول اشتى. ەگەمەندىكتىڭ ەلەڭ-الاڭ شاعىندا قازاقستاندى ەكونوميكالىق جاڭعىرۋعا, ينفراقۇرىلىمدى جاڭارتۋ جانە شيكىزاتقا تاۋەلدىلىكتەن ارىلتۋعا باستاۋى دا سوندىقتان. بۇل رەتتە تالاي كاسىپورىننىڭ تىنىسىن اشقان يندۋستريالاندىرۋ رەفورماسىن اتاپ وتپەسكە بولمايدى. قازاقستان ءوزىنىڭ ونەركاسىپتىك بازاسىن دامىتۋعا يەك ارتىپ, يندۋستريالىق-يننوۆاتسيالىق دامۋدىڭ ءۇش باعدارلاماسى قابىلداندى. سونىڭ ناتيجەسىندە 9 تريلليون تەڭگەگە 1 500 جوبا جۇزەگە اسىرىلدى. قازاقستان بۇرىن وندىرىلمەگەن ونىمدەر – ەلەكتروۆوز, اۆتوبۋس, اۆتوموبيل, تەمىر جول ۆاگوندارى, ترانسفورماتورلار جانە باسقا دا 500-دەن استام ءونىم ءتۇرىن شىعارا باستادى. وسى باعدارلامانىڭ ناتيجەسىندە, ءوزىم تۇرىپ جاتقان ەكىباستۇز قالاسى دا دامۋدىڭ داڭعىل جولىنا ءتۇستى, قازاقستانداعى تەمىر جول كلاستەرى قالىپتاسقان شاھارعا اينالدى.
باس باسىلىم ارقىلى حالقىمەن وي بولىسكەن ەلباسىمىز امان, ەلىمىز تىنىش بولسىن! تاۋەلسىزدىكتىڭ تويى قۇتتى بولسىن!
رىشات امىرەنوۆ,
قازاقستاننىڭ ەڭبەك ەرى